Si Jesucristo nagadala sang kalipay

Gintuyo nga makaangkon ka sang kalipay kag kasadya. Amo ina ang katuyuan sang imo kabuhi. Amo ina ang katuyuan sang plano sang kalipayan sang Amay nga Langitnon. Wala ini nagakahulugan nga indi ka gid masubuan ukon magpangatubang sang kabudlayan. Pero buot silingon sini nga mabuligan ka sang Manluluwas nga malampuwasan ang mga kabudlayan kag makakita sang kalipay.

Ang kalipay wala nagahalin sa imo mga sirkumstansya; nagahalin ini sa pagsunod kay Jesucristo. Mahimo nga malaw-ay ang imo adlaw, malaw-ay ang semana, ukon malaw-ay ang tuig. Pero ang kalipay wala nagakahulugan nga wala ka gid sang kasubo sa imo kabuhi; kundi ini ang presensya ni Cristo sa imo kabuhi.

Ang kalipay sang Manluluwas mas dako kag mas nagatiner sangsa bisan ano pa dira. Tentaron ka ni Satanas nga magpangita sang kasadya kag kabulusgan sa maiyaiyahon nga pamaagi ukon sa dutan-on nga kalipay. Ang bisan ano nga kontra kay Jesucristo kag sa Iya mga kasuguan indi makahatag sa imo sang matuodtuod, nagalawig nga kasadya kag kalipayan. Tandai nga ang mga butang sa sining duta temporaryo lang. Ang ebanghelyo ni Jesucristo nagatanyag sang kasadya kag kalipay nga masangkad, balaan, kag wala katubtuban.

Pilia ang kalipay. Bisan pa nga matuod nga may kasubo kag kabudlayan sa sining kalibutan, ginpuno man sang Amay nga Langitnon ang kalibutan sang madamo nga matahum, kag manami nga mga butang. Pangitaa ang mga ini. Tilawi nga talupangdon ang mga rason para magkasadya adlaw-adlaw—pwede mo man ini isulat. Amo ini ang mga regalo halin sa mapinalanggaon mo nga Amay sa Langit.

Magdala sang kasadya kag kalipay sa iban. Nakita ni Jesucristo ang kabug-osan sang kalipay sa pagdala sa aton sang kalipay. Pwede mo sundon ang Iya ehemplo paagi sa pagpangita sang kasadya kag kalipay sa pagserbisyo sa iban. Buligi ang isa ka tawo nga makabatyag nga ginapalangga sia. Maghatag sang sinsero nga pagdayaw. Paisoga ang isa ka tawo nga ginabudlayan. Kon pamatyag mo kinahanglan mo sang mas dako nga kalipay sa imo kabuhi, tilawi nga maghatag sang kalipay sa iban.

Mangin malipayon sa pagsimba sa Ginuo. Kon magsimba ka, tutoki ang kalipay nga ginahatag ni Jesucristo sa imo, kag dayawa Sia tungod sina! Himoa ang imo bahin para magdala sang masinadyahon nga espiritu sa mga miting ninyo sa Simbahan. Himoa ang sagrado nga musika nga bahin sang imo pagsimba sa balay kag sa simbahan.

Pwede ka magbatyag sang kalipay bisan mabudlay ang pangabuhi. Siguro matingala ka kon paano ini mahimo, pero matuod ini. Ang imo pagtuo kay Jesucristo, ang nagapang-ayo Niya nga gahum, kag ang Iya wala katapusan nga mga promisa makahatag sa imo sang pirme nga kalipay. Ang Iya kalipay nagapangibabaw sa kasubo kag nagadala sang kalinong nga lampas pa sa tanan nga paghangop.

Ang kabug-osan sang kalipay nagahulat sa imo sa selestiyal nga ginharian sang Dios. Ginlampuwasan ni Jesucristo ang tanan nga butang nga makapugong sa imo sa pagbaton sang wala katapusan nga kalipay. Kon nagasalig ka sa Iya kag nagasunod sa Iya, ining kalipay mangin imo.