Maghimo sang inspirado nga mga pagpili

Sa Para sa Kusog sang mga Lamharon, makita mo ang mga pinanudlo ni Jesucristo kag sang Iya mga propeta. Upod ining mga kamatuoran bilang imo giya, makahimo ka sang inspirado nga mga pagpili nga magabugay sa imo sa karon kag sa bilog nga wala katubtuban.

Pinalangga ka nga espiritu nga anak sang Dios. Ang Iya dako nga plano sang kalipayan nagapatigayon nga magtubo ka sa espirituhanon kag pauswagon ang imo diosnon nga kapalaran. Ginpadala Niya si Jesucristo nga mangin imo Manluluwas.

May salig ang Imo Amay sa Langit sa imo. Ginhatagan ka Niya sang dalagko nga mga bugay, lakip na ang kabug-osan sang ebanghelyo kag ang sagrado nga mga ordinansa kag mga kasugtanan nga nagabugkos sa imo sa Iya kag nagadala sang Iya gahum sa imo kabuhi. Ining mga kasugtanan may upod nga dugang nga kalipay kag responsibilidad. Nakahibalo Sia nga masarangan mo maghimo sang kinalain sa kalibutan, kag nagapangayo ina, sa madamo nga kahigayunan, nga mangin lain ka sa kalibutan. Pangayoa ang giya sang Amay nga Langitnon samtang nagahimo ka sang mga pagpili. Bugayan ka Niya sang inspirasyon paagi sa Balaan nga Espiritu.

Si Jesucristo amo ang dalan pakadto sa kalipay nga wala katapusan. Samtang imo ginagamit ang imo kahilwayan sa pagpili nga sundon si Jesucristo, ara ka sa dalan nga nagapadulong sa wala katapusan nga kalipayan. Himoa si Jesucristo nga imo sulundan, imo mabaskog-pa-sa-bato nga pundasyon. Itukod ang imo kabuhi sa Iya mga pinanudlo, kag taksa ang imo mga pagpili base sa mga ini. Ang mga kasugtanan nga imo ginhimo sa bunyag, sa tion sang sakramento, kag sa templo amo ang mga halamtangan sang imo mabakod nga pundasyon kay Cristo. Magapangatubang ka gihapon sang mga kabudlayan kag tentasyon, pero ang Amay nga Langitnon kag ang Manluluwas magabulig sa imo nga malampuwasan ang mga ini.

Ang tuyo sang Para sa Kusog sang mga Lamharon indi ang sabton ka sang “huo” ukon “indi” sa tanan nga posible nga pagpili nga imo atubangon. Kundi, ginaagda ka sang Ginuo nga magpangabuhi sang mas mataas kag mas balaan nga paagi—kabuhi nga nagatutok sa wala katapusan nga mga kamatuoran. Amo ini ang Iya paagi. Ining giya magatudlo sa imo parte sa Iya paagi. Ginapaathag sini ang mga kamatuoran nga Iya ginpahayag. Himoa ining mga kamatuoran nga imo giya sa paghimo sang mga pagpili—dalagko nga mga pagpili, pareho sang paghimo sang mga kasugtanan sa templo kag pag-alagad sa misyon, kag amo man sa adlaw-adlaw nga mga pagpili, pareho sang kon paano trataron ang mga tawo ukon paano gamiton ang imo oras.

Bisan makabulig ang iban sa imo, ang imo espirituhanon nga pagtubo personal nga butang. Imo ini responsibilidad. Himoa ang imo pinakamaayo para mag-uswag kada adlaw, tumana ang mga kasuguan sang Dios kag respetuha ang imo mga kasugtanan, kag buligi ang iban nga mas magpalapit sa Manluluwas.

Tan-awa sa Mosias 4:29–30 (ang paagi sa pagpakasala tama kadamo, gani kinahanglan naton bantayan ang aton kaugalingon); Helaman 5:12 (ipasad ang imo pundasyon kay Cristo); Doktrina kag mga Kasugtanan 45:57 (himoa ang Espiritu nga Balaan nga imo giya); 25:13 (magtuman sang mga kasugtanan nga imo ginhimo).