Mensahe halin sa Unang Pangulohan

Palangga namon kamo, kag may salig kami sa inyo. Matuod gid nga upod kamo sa pinili nga mga espiritu sang Amay nga Langitnon, nga ginpadala sa duta sa sining panahon sa paghimo sang importante nga mga butang.

Mas mabaskog kamo kag mas may ikasarang sangsa ginahunahuna ninyo. Kag kon magsalig kamo sa Manluluwas, mas nagadako pa gid ang inyo kusog. Sia ang “kusog sang mga lamharon.”

Ang ini nga giya makabulig sa inyo sa pagpahamtang sang mabakod nga pundasyon sa paghimo sang mga pagpili para magpabilin sa dalan nga nagapadulong sa kabuhi nga wala katapusan. Buligan kamo sini nga maghanda sa paghimo sang sagrado nga mga kasugtanan sa templo, maghanda sa pag-alagad sa misyon, kag magpangita sang kalipay sa pagsunod kay Jesucristo sa bilog ninyo nga kabuhi. May importante kamo nga lugar sa Iya Simbahan. Buligan kamo ni Jesucristo nga tumanon ang Iya mga katuyuan para sa inyo.

Nakahibalo kami nga buhi ang Dios. Ginapangamuyo namon nga magpabilin kamo nga mabakod sa dalan sang kasugtanan—ang dalan sang paghimo kag pagtuman sang sagrado nga mga kasugtanan sa Dios. Amo ina ang dalan nga nagapadulong pabalik sa inyo Amay sa Langit. Kon himuon ninyo ini, mangin impluwensya kamo para sa kaayuhan, nga ginapakigbahin ang ebanghelyo sing malipayon, ginatipon ang mga anak sang Dios, kag ginahanda ang kalibutan para sa Ika-duhang Pagkari sang Manluluwas. Tandai: Si Jesucristo amo ang imo kusog!