Buligan ka ni Jesucristo

Salmo 147:3

Si Jesucristo amo ang imo kusog. Ginhimo Niya ang tanan nga kinahanglanon para makaangkon ka sang kalipay sa sining kabuhi kag sa katubtuban. Paagi sa pagpili sa Iya kag sa Iya ebanghelyo, ginapili mo ang wala katapusan nga kalipay kag kasadya.

Bisan nga ginatinguhaan mo nga himuon ang imo masarangan para magpili sang maayo, kon kaisa makahimo ka sang mga sayop. Makahimo ka sang mga butang nga kuntani wala mo ginhimo. Ang tanan nagaeksperiyensya sini. Kon matabo ini, mahapos nga palangluyahan ukon magduda kon magakabagay ka pa ayhan. Pero may maayong balita—matahum, may paglaum nga balita! Tungod palangga ka sang Dios, ginpadala Niya ang Iya Anak, nga si Jesucristo, nga nagdala sa Iya Kaugalingon sang imo mga sala para makahinulsol ka, mapatawad, kag magpadayon sa pag-uswag.

Wala Katapusan nga mga Kamatuoran

Pabakuron ka ni Jesucristo. Buligan ka Niya nga bag-uhon ang imo mga handum, ang imo panghunahuna, kag imo mga aksyon. Kon nagakabalaka ka, nahadlok, ukon ginabudlayan sa bisan ano nga paagi, paumpawan ka Niya. Buligan ka Niya sa tanan nga aspeto sang imo kabuhi. Makasalig ka sa Iya.

Ang paghinulsol indi silot para sa kasal-anan; amo ini ang paagi sang Manluluwas para hilwayon kita sa sala. Ang paghinulsol nagakahulugan sang pagbag-o—sang pagtalikod sa sala kag pagliso sa Dios. Nagakahulugan ini sang pag-uswag kag pagbaton sang kapatawaran. Ini nga klase sang pagbag-o indi isahay lang; nagapadayon ini nga proseso.

Mga Imbitasyon

Himoa si Jesucristo nga tutok sang imo kabuhi. Pangayoa ang Iya bulig sa tanan mo nga ginahimo.

Maghinulsol. Magliso sa Ginuo upod ang handum nga mag-uswag. Kon may nahimo ka nga indi amo, akua ini sa Dios kag, kon kinahanglan, sa imo bishop kag sa bisan sin-o nga basi imo nahalitan. Himoa ang imo masarangan para tadlungon ini.

Magkalipay sa dulot nga maghimo sang mas maayo kag mangin mas maayo. Bisan pa nga indi ini mahapos kag mas madugay ini himuon sangsa gusto mo, indi gid mag-untat sa pagtinguha. Padayon nga maggiho kag magsalig sa Ginuo. Buligan ka Niya sa bug-os nga proseso.

Si Jesus nga nagapungko malapit sa bubon upod ang babayi nga Samariahanon

Ginpromisa nga mga Bugay

Patawaron ka kag paayuhon sang Amay nga Langitnon kon maghinulsol ka. Buslan Niya ang imo kasal-anan sang kalinong kag kalipay. Kalimtan Niya ang imo mga sala. Si Jesucristo amo ang imo kusog, kag upod ang Iya kusog, ang imo handum nga tumanon ang Iya mga kasuguan magadako.

Bag-uhon Niya ang imo tagipusuon kag ang imo kabuhi. Amat-amat, magatubo ka kag mangin mas pareho sa Iya.

Mga Pamangkot kag mga Sabat

Paano ko mahibal-an kon ginpatawad na ako sang Dios? Nagpromisa ang Dios nga patawaron Niya ang mga nagahinulsol. Kon mabatyagan mo ang pagpasulhay halin sa Espiritu, mahibal-an mo nga ang nagabayad-sala nga gahum sang Manluluwas nagahikot sa imo kabuhi.

San-o ko kinahanglan ang bulig sang bishop sa paghinulsol? Ang imo bishop nagakapot sang mga yabi sang priesthood kag may espirituhanon nga mga dulot para buligan ka sa paghinulsol. Pwede ka magpangayo sang iya bulig kag laygay bisan ano nga oras. Kon nakahimo ka sang seryoso nga mga sala, pareho sang paglapas sang layi sang sekswal nga katinlo, makigkita sa imo bishop. Indi ka niya paghusgaran. Sia ang representante ni Jesucristo kag buligan ka niya nga mahibal-an kon paano maghinulsol sing lubos kag mabaton ang nagapang-ayo kag nagapabakod nga gahum sang Manluluwas.

Nagatinguha ako nga maghinulsol, pero pirme ko nagakahimo ang amo man gihapon nga mga sala. Ano ang dapat ko himuon? Indi magpangampo. Magdangop kay Cristo, kag ibutang ang imo pagtuo sa Iya. Bastante ang Iya grasya. Tilawi liwat. Wala ka nagaisahanon sa imo pagpaninguha nga mag-uswag. Kaupod mo pirme si Jesucristo.

Tan-awa sa Enos 1:6 (ang kasal-anan sarang nga makakas); Mosias 4:3 (paagi sa Balaan nga Espiritu, ipahibalo sang Dios sa imo nga ginpatawad ka na); 26:30 (ang Manluluwas nagapatawad tagsa nga maghinulsol kita); Eter 12:27 (ang grasya sang Manluluwas sarang magpabakod sang mahuyang nga mga butang); Moroni 6:8 (ang mga nagahinulsol ginapatawad); 10:32 (mangin perpekto kay Cristo); Doktrina kag mga Kasugtanan 1:32 (ang Ginuo nagapatawad sang mga nagahinulsol); 58:42–43 (ang paghinulsol nagalakip sang pagkumpisar kag pagsikway sang sala).

Mga Pamangkot para sa Temple Recommend

May testimonya ka bala sa Pagbayad-Sala ni Jesucristo kag sa Iya papel bilang imo Manluluwas kag Manunubos?
May seryoso bala nga mga sala sa imo kabuhi nga kinahanglan resolbahon upod sa mga awtoridad sang priesthood bilang parte sang imo paghinulsol?