Pwede ka magbulig sa buluhaton sang Dios

Ang buluhaton kag himaya sang Dios amo nga ipahanabo ang imo pagkawala kamatayon kag kabuhi nga wala katapusan. Ang pagkawala kamatayon amo ang pagkabuhi sa wala katubtuban nga may nabanhaw nga lawas. Ang kabuhi nga wala katapusan, ukon pangkahitaasan, amo ang mangin mas pareho sa Dios kag magpuyo upod sa Iya sa wala katubtuban bilang mga pamilya. Tanan ini nangin posible tungod kay Jesucristo kag sa Iya Pagbayad-Sala. Makasalig ka sa Iya.

Makabulig ka sa buluhaton sang Dios paagi sa pagpalapit kay Cristo kag pagbulig sa iban nga himuon man ini. Tagsa nga may ginahimo ka para buligan ang iban nga sundon si Jesucristo, nagabulig ka sa buluhaton sang Dios.

Ipangabuhi ang ebanghelyo. Padakoa ang imo pagtuo kay Jesucristo. Maghinulsol adlaw-adlaw. Magbaton sang mga ordinansa sang priesthood sang Dios kag tumana ang imo mga kasugtanan. Himoa ini nga sulundan sa bilog mo nga kabuhi.

Atipana ang mga nagakinahanglan. Magpangita sang pamaagi para magserbisyo kag mag-minister sa iban, upod na ang imo pamilya, ang imo mga abyan, kag ang imo komunidad. Isa sa maayo nga paagi para makabulig sa mga tawo nga nagakinahanglan amo ang pagtuman sang layi sang puasa kag maghatag sang halad-puasa.

Imbitara ang tanan nga batunon ang ebanghelyo. Tugoti ang imo mga tinaga kag mga aksyon nga magsalamin sang imo pagtuo kay Jesucristo. Mangin handa sa paghambal sa bisan kay sin-o nga nagapamangkot sa imo parte sa paglaum kag kalipay nga imo nabatyagan bilang Iya disipulo. Sa mga young men, ang pagserbisyo sa full-time nga misyon isa ka responsibilidad sa priesthood. Sa mga young women, isa ini ka gamhanan nga oportunidad; magpangamuyo para mabal-an kon gusto sang Ginuo nga maglakat ka sa misyon. Maghanda sa pagpakigbahin sang ebanghelyo sa bilog mo nga kabuhi.

Isahon ang mga pamilya sa wala katapusan paagi sa paghimo sang family history kag temple work. Magtuon parte sa imo mga katigulangan. Hibal-on kon sin-o ang nagakinahanglan sang mga ordinansa sang templo. Magkadto sa templo pirme para mabunyagan kag makumpirmahan para sa ila. Kon kinahanglan mo sang bulig, magkadto sa FamilySearch.org.

Makabaton ka sang bulig sang Dios. Wala nagapaabot ang Amay nga Langitnon nga himuon mo ining buluhaton nga ikaw lang. Upod mo Sia. Kon mapainubuson mo nga itanyag ang imo oras kag tagipusuon, mahimo Niya ang matahum nga mga butang paagi sa imo. Si Jesucristo amo ang imo kusog!

Mapuno ka sang kalipay. Ang buluhaton sang Dios isa ka malipayon nga buluhaton! Kon makigbahin ka diri, mabatyagan mo ang kalipay nga Iya nabatyagan. Pamensara ang kalipay nga mabatyagan mo upod sang Amay nga Langitnon kag sang Iya mga anak nga ginbuligan mo nga dalhon sa Iya!