Mabugayan ka paagi sa mga yabi kag awtoridad sang priesthood

Ang tanan nga yabi kag awtoridad sang priesthood nagahalin kay Jesucristo. Ang tagsa ka nagakapot sang priesthood makausoy sang iya awtoridad pabalik sa Iya. Ang Manluluwas ang nagahibalo kon sin-o ang makabaton sining awtoridad kag kon sin-o ang makabaton sang mga yabi sang priesthood. Nagasalig kita sa perpekto Niya nga ihibalo.

Ginpanumbalik ni Jesucristo ang Iya priesthood sa aton panahon. Sia ang nagahatag direksyon kon paano gamiton ang priesthood. Si Adan, Moises, Pedro, kag madamo pa nga mga propeta sa bilog nga kasaysayan nakabaton sang mga yabi sang priesthood. Sa aton panahon, si Joseph Smith nakabaton sang mga yabi sang priesthood halin kay Juan Bautista, Pedro, Moises, Elias, Elijah, kag iban pa. Ang mga miyembro sang Unang Pangulohan kag ang Korum sang Dose ka Apostoles nagakapot sang tanan nga mga yabi sang priesthood sa duta sa karon. Ang lokal nga mga lider sang priesthood kag mga quorum president nagakapot man sang mga yabi sang priesthood para sa ila mga calling. Ang mga yabi sang priesthood ang nagadumala sang buluhaton sang Dios. Ginapahanugotan sini kag ginahatagan gahum ang mga lalaki kag babayi sa pagbulig sa sina nga buluhaton.

Ang awtoridad sang priesthood nagabugay sa tanan nga anak sang Dios. Tungod ginpanumbalik ang priesthood, makabaton ka sang mga ordinansa kag makahimo sang mga kasugtanan upod sa Dios. Mahimo ka nga mag-akto sa ngalan sang Dios kon makabaton ka sang tulumanon ukon calling halin sa tawo nga may awtoridad.

Magbaton sang mga calling sa Simbahan kag magserbisyo sing matutom. Kon makabaton ka sang calling sa Simbahan, ginaset apart ka nga may awtoridad halin sa Dios para magserbisyo sa sina nga tulumanon. Makabaton ka man sang giya halin sa Dios sa imo pagserbisyo. Samtang nagaserbisyo ka, ginarepresentar mo si Jesucristo. Ihatag sa Iya ang imo pinakamaayo.

Sakdaga ang mga gintawag sang Dios nga magserbisyo. Ang pagsakdag masobra pa sangsa pag-alsa sang imo kamot sa paglawag sang isa ka ngalan sa miting sang Simbahan. Nagakahulugan ini nga magsuporta kag magbulig. Magpangita sang pamaagi nga mapakita nga ginasakdag mo ang mga tawo nga gintawag ni Jesucristo nga magserbisyo sa Iya Simbahan.

Tumana ang mga tulumanon halin sa imo mga lider sa Simbahan—pati na ang halin sa pangulohan sang inyo korum ukon klase. May awtoridad sila halin sa Dios, nga ginahatag nila sa imo sa sina nga tulumanon. Mahimo nga maasayn ka sa pag-minister sa isa ka tawo, magsugata sa mga tawo samtang nagaabot sila sa sakramento nga miting, ukon magbulig sa isa ka aktibidades. Bisan ano man ina nga asaynment, kabiga ini nga oportunidad para mangin disipulo ni Jesucristo kag magserbisyo sa mga anak sang Dios.

Makasalig ka nga ang mga ordinansa nga imo nabaton awtorisado ni Jesucristo. Isa ini sa mga butang nga nagahimo sang Simbahan ni Jesucristo nga pinasahi. Paagi sa mga ordinansa sang priesthood, makita ang gahum sang Dios.

Mangin instrumento ka sa mga kamot sang Ginuo. Samtang nagaserbisyo ka sa Ginuo paagi sa Iya awtoridad kag sa idalom sang direksyon sang Iya mga alagad nga nagakapot sang mga yabi sang priesthood, buligan ka Niya nga mahibal-an kon paano magserbisyo sa iban sa Iya buluhaton. Si Jesucristo amo ang imo kusog. Ang imo pagserbisyo magalapit pa gid sa imo sa Iya kag magahatag sa imo sang kalipay.