Palanggaa ang Dios, palanggaa ang imo isigkatawo

Palangga ka sang Dios. Sia ang imo Amay. Ang Iya perpekto nga pagpalangga mahimo nga makainspirar sa imo nga palanggaon Sia. Kon ang imo pagpalangga sa Amay nga Langitnon amo ang pinakaimportante nga impluwensya sa imo kabuhi, mangin mas mahapos ang paghimo sang mga desisyon.

Ang duha ka pinakadako sa tanan nga kasuguan amo nga higugmaon ang Dios kag higugmaon ang imo isigkatawo. Kag sin-o ang imo isigkatawo? Ang tanan! Ang tanan nga iban pa nga gintudlo sa balaan nga kasulatan kag sang mga propeta naangot sa sining duha ka kasuguan.

Ang tanan nga tawo imo mga utod nga lalaki kag babayi—dala, siyempre, ang mga tawo nga lain sa imo ukon wala nagaugyon sa imo. Gusto sang Amay nga Langitnon nga ang Iya mga kabataan magpinalanggaanay. Kon ginaalagaran mo ang Iya mga anak, ginaalagaran mo Sia.

Ipakita ang pagpalangga sa Dios paagi sa pagtuman sang Iya mga kasuguan. Halimbawa, paagi sa pagtipig sang Adlaw nga Inugpahuway nga balaan, pati na ang tampad nga paghanda para sa kag pag-ambit sang sakramento, ginapakita mo sa Dios nga handa ka nga ihalad ang isa ka adlaw kada semana para sa Iya. Sa imo pagpuasa kag pagbayad sang ika-pulo kag mga halad, ginapakita mo sa Dios nga ang Iya buluhaton mas importante para sa imo sangsa materyal nga mga butang. Kon ginagamit mo ang mga ngalan sang Dios kag ni Cristo nga may pagtahod, indi sa wala pulos ukon kaswal nga paagi, ginapakita mo nga nagapasalamat ka sa tanan nga Ila ginhimo para sa imo.

Kabiga ang tanan bilang anak sang Dios. Bilang disipulo ni Jesucristo, pwede ka magpanguna sa pagtrato sang mga tawo sa tanan nga rasa, relihiyon, kag bisan ano nga grupo nga may pagpalangga kag respeto—ilabi na sa mga nangin biktima sang mapintas nga mga tinaga kag aksyon. Kadtu-i ang mga ginasuboan, nagaisahanon, ukon wala sang madangpan. Buligi sila nga mabatyagan ang pagpalangga sang Amay nga Langitnon paagi sa imo. Ipakigbahin sa ila ang mga bugay nga ginhatag Niya sa imo, kag hagara sila nga sundon si Jesucristo.

Siguroha nga ang imo lenggwahe nagasalamin sang imo pagpalangga sa Dios kag sa iban—bisan kon nagaistorya ka sa personal ukon online. Maghambal sang mga butang nga makaalsa—indi sang makatuga sang pagbinahinbahin, makasakit, ukon makasaklaw, bisan pa nga lahog lang. Ang imo mga tinaga gamhanan. Gamita ang gahum sini sa kaayuhan.

Ipakita ang imo pagpalangga sa imo pamilya. Ang pagpalangga sa tanan nga kabataan sang Dios nagasugod sa balay. Himoa ang imo bahin para himuon ang inyo balay nga lugar kon sa diin ang tanan makabatyag sang pagpalangga sang Manluluwas.

Ang imo relasyon sa Dios magadalom kon ginapahayag mo ang imo pagpalangga paagi sa pagtuman sang Iya mga kasuguan kag pagtuman sang imo mga kasugtanan upod sa Iya.

Ang imo relasyon sa iban magadalom samtang ginapahayag mo ang imo pagpalangga paagi sa Cristohanon nga pag-alagad. Makakita ka sang kalipay sa paghimo sang kalibutan nga mas mapinalanggaon nga lugar.