Feast Upon the Word [Magpaayaw sa Pulong], ni Liz Lemon Swindle. Sa kaalwan sang Havenlight

Hilwayon kamo sang kamatuoran

Juan 8:32

Ang Amay nga Langitnon amo ang Dios sang kamatuoran. Nahibal-an Niya ang tanan. Ang tanan nga kamatuoran nagahalin sa Iya kag nagagiya pakadto sa Iya. Ginapakita mo nga ginahatagan mo sang balor ang kamatuoran kon nagatinguha ka nga magtuon, nagapangabuhi nga may integridad, kag maisog nga ginatindugan ang nahibal-an mo nga insakto—bisan pa nga magatindog ka nga isahanon.

Wala Katapusan nga mga Kamatuoran

Gusto sang Amay nga Langitnon nga ang Iya mga anak nga babayi kag lalaki pirme nagatuon. May pareho temporal kag espiritwal ka nga mga rason para magpangita kag palanggaon ang pagtuon. Ang edukasyon indi lamang para magganar sang kuwarta. Bahin ini sang imo wala katapusan nga lalab-uton nga mangin mas pareho sa Amay nga Langitnon.

Ang pagpangabuhi nga may integridad nagakahulugan nga ginapalangga mo ang insakto sa panulok sang Dios—masobra pa sa imo pagpalangga sa personal nga kasulhayan, popularidad, ukon kahapos. Nagakahulugan ini sang paghimo sang husto tungod kay husto ini.

May malahalon ka nga ipakigbahin. Ang ebanghelyo ni Jesucristo may mga sabat sa mga pamangkot sang kabuhi. Amo ini ang alagyan pakadto sa kalinong kag kalipayan. Mahimo nga wala mo nahibal-i ang tanan, pero hustohan na ang imo nahibal-an para palanggaon ang imo isigkatawo, ipakigbahin ang matuod nga mga prinsipyo sa ila, kag hagaron sila nga magtuon pa gid.

Mga Imbitasyon

Pirme gid magtuon. Magpangita sang mga oportunidad nga pasangkaron ang imo kaisipan kag ang imo mga ikasarang. Ini nga mga oportunidad pwede nga sa pormal nga edukasyon sa eskwelahan ukon paghanas sang bokasyon, amo man sa indi pormal nga pagtuon nga makuha sa mga ginasaligan mo nga mga tulun-an. Upda ang Ginuo sa imo mga pagpaninguha, kag Iya ka giyahan.

Magtuon sang espiritwal nga mga kamatuoran. Samtang nagatuon ka parte sa kalibutan sa imo palibot, tun-i man ang parte sa Manluluwas, nga nagtuga sang kalibutan. Tun-i ang Iya kabuhi kag mga pinanudlo. Himoa ang seminary, institute, kag personal nga pagtuon sang ebanghelyo nga parte sang imo bilog-kabuhi nga pagtuon. Makabulig ini sa imo sa paghanda sa paglakat sa misyon kag pagpakigbahin sang ebanghelyo sa bilog mo nga kabuhi.

Magpangabuhi nga may integridad. Indi magpangawat, magbinutig, mangdaya, ukon manginto sa bisan ano nga paagi—sa eskwelahan, sa trabaho, online, bisan diin. Mangin pareho gihapon nga tampad nga sumulunod ni Jesucristo sa publiko kag sa pribado.

mga tawo nga nagaluhod sa atubang sang nabanhaw nga Jesucristo

Ginpromisa nga mga Bugay

Ang edukasyon nagapadugang sang imo ikasarang sa pagserbisyo sa Ginuo, pati na bilang misyonero. Ginahatagan ka sini sang gahum nga bugayan ang iban, labi na gid ang imo pamilya. Kon mas damo ang imo natun-an, mas makabulig ka sa pagpasad sang ginharian sang Dios kag makaimpluwensya sa kalibutan para sa kaayuhan.

Ang katampad nagadala sang kalinong kag respeto sa kaugalingon. Kon ang imo mga tinaga kag mga aksyon nagakumporme sa kamatuoran, ginapakita mo nga masaligan ka sang iban nga tawo kag sang Ginuo.

Kon ginatindugan mo ang mga pinanudlo ni Jesucristo, tindugan ka man Niya. Si Jesucristo amo ang imo kusog! Mahimo nga ang iban indi magkumporme sa imo mga ginapatihan, pero ang imo kaisog kag sinseridad matalupangdan. Bisan sundon sang iban ang imo ehemplo ukon indi, ang imo testimonya, kompiyansa, kag pagtuo kay Cristo magatubo.

Mga Pamangkot kag mga Sabat

Sala bala kon may mga pamangkot ka parte sa Simbahan? Paano ko pangitaon ang mga sabat? Ang mga pamangkot indi tanda sang kahuyang ukon kakulang sang pagtuo. Ang matuod, ang pagpamangkot makabulig sa pagpatubo sang pagtuo. Ang Pagpanumbalik sang ebanghelyo nagsugod sang ang 14-anyos nga si Joseph Smith nagpamangkot nga may pagtuo. Pangitaa ang mga sabat sa balaan nga kasulatan, sa mga pulong sang mga propeta sang Dios, sa imo mga lider kag matinuohon nga mga miyembro sang pamilya, kag sa Dios Mismo. Kon ang mga sabat wala dayon nagaabot, magsalig nga mahibal-an mo ini sing amat-amat. Padayona nga ipangabuhi ang imo na nga nabal-an, kag padayon nga magpangita sang kamatuoran.

Paano ko ipakigbato ang insakto nga indi makasaklaw sa iban nga lain ang ginapatihan? Sugdi sa pagsiguro nga ang imo mga tinaga kag mga aksyon inspirado sang pagpalangga sa Dios kag sa Iya mga anak. Ang pagpakigbahin sang ebanghelyo indi dapat himuon nga may espiritu sang pagbinaisay kundi sang kaathag, pagkamapainubuson, kag kaayo. Pwede ka nga mangin mapinalanggaon sa iban bisan pa nga wala ka nagakumporme sa ila mga panan-aw. Mangin maayo nga ehemplo sang isa ka sumulunod ni Jesucristo sa imo pagpangabuhi.

Tan-awa sa Mateo 5:14–16 (tugoti ang imo kasanag nga magsilak); Juan 14:6 (si Jesus ang kamatuoran); 1 Pedro 3:15 (mangin handa pirme sa pagpakigbahin sang imo paglaum kay Cristo); Doktrina kag mga Kasugtanan 88:77–80 (mga butang nga gusto sang Ginuo nga matun-an naton); 88:118 (magpangita sang kaalam sa pinakamaayo nga mga libro); 93:36 (ang himaya sang Dios amo ang kaalam); 124:15 (ang integridad nagakahulugan sang pagpalangga sang kon ano nga insakto); 130:18 (ang aton kaalam magaupod sa aton kon mabanhaw kita).

Mga Pamangkot para sa Temple Recommend

Ginatinguhaan mo bala nga mangin tampad sa tanan mo nga ginahimo?
Nagasuporta ka bala ukon nagaduso sang bisan ano nga pinanudlo, pangginawi, ukon doktrina nga supak sa iya sang Ang Simbahan ni Jesucristo sang mga Santos sa Ulihing mga Adlaw?