Ang imo lawas sagrado

Ang imo lawas sunod sa imahe sang Dios—ang pinakamahimayaon, harianon nga Tinuga sa uniberso. Ginakumparar sang balaan nga mga kasulatan ang aton mga lawas sa balaan nga templo, lugar kon sa diin nagaestar ang Espiritu. Siyempre, ang imo lawas indi perpekto sa karon. Pero ang imo mga eksperiyensya bangud sa imo lawas makabulig sa imo nga maghanda sa pagbaton sa pila ka adlaw sang perpekto, nabanhaw, ginhimaya nga lawas.

Ang imo kalag ginabug-os sang imo lawas kag imo espiritu. Tungod sini, ang pisikal nga ikaayo kag espirituhanon nga ikaayo konektado. Ang Manluluwas nagpahayag sang Pulong sang Kaalam para magtudlo sang mga prinsipyo sa pag-atipan sang imo lawas—kag sa pagpromisa sang pisikal kag espirituhanon nga mga bugay.

Ang sekswal nga mga balatyagon importante nga bahin sang plano sang Dios sa pagtuga sang malipayon nga mga pag-asawahay kag wala katapusan nga mga pamilya. Ini nga mga balatyagon indi sala—kundi sagrado. Tungod ang sekswal nga mga balatyagon sagrado kaayo kag mabaskog kaayo, ginhatag Niya sa imo ang layi sang sekswal nga katinlo para buligan ka nga gamiton ining mga balatyagon suno sa Iya tuyo. Ang layi sang sekswal nga katinlo nagasiling nga aprubado sang Dios ang sekswal nga buluhaton sa tunga lamang sang lalaki kag babayi nga ginkasal. Madamo nga tawo sa kalibutan ang wala nagasapak ukon nagayaguta pa gani sang layi sang Dios, pero ang Ginuo nagaagda sa aton nga mangin Iya mga disipulo kag magpangabuhi sang mas mataas nga sulundan sangsa iya sang kalibutan.

Tratuha ang imo lawas—kag ang lawas sang iban—nga may respeto. Sa pagdesisyon mo parte sa imo pamayo, estilo sang buhok, kag hitsura, pamangkuta ang imo kaugalingon, “Ginatahod ko bala ang akon lawas bilang sagrado nga regalo halin sa Dios?” Gusto sang Amay nga Langitnon nga makita naton ang kada isa sa kon sin-o gid kita: indi lang pisikal nga mga lawas kundi pinalangga Niya nga kabataan nga may diosnon nga kapalaran. Likawi ang mga estilo nga nagapalutaw ukon nagatawag sang sobra nga atensyon sa imo pisikal nga lawas imbes nga sa kon sin-o ka bilang anak sang Dios nga may wala katapusan nga bwas-damlag. Tugoti ang moral nga katinlo kag pagpalangga sa Dios nga maggiya sa imo mga pagpili. Magpangayo sang laygay sa imo pamilya.

Himoa ang mga butang nga makapabakod sang imo lawas, indi ang mga butang nga makasakit ukon makahalit sini. Gamita nga may kalipay ang madamo nga maayo nga mga butang nga ginhatag sang Dios. Tandai nga ang makahulubog nga ilimnon, tabako, kape, tsa, kag iban pa nga makahalalit nga droga kag mga butang indi para sa imo lawas ukon sa imo espiritu. Bisan ang makapaayo nga mga butang, pareho sang ginaresita nga mga bulong, pwede makahalit kon indi paggamiton sang husto.

Tipigi ang pagpakighilawas kag sekswal nga mga balatyagon nga sagrado. Indi ini dapat mangin topiko sa lahug-lahog ukon kalingawan. Kon wala pa makasal ang lalaki kag babayi, sala ang pagtandog sang pribado, sagrado nga mga parte sang lawas sang lain nga tawo, bisan pa nga may bayo. Sa imo pagpili kon ano ang imo himuon, tulukon, basahon, pamatian, pamensaron, i-post, ukon i-text, likawi ang bisan ano nga hungod nga nagapukaw sang lawasnon nga mga emosyon sa iban ukon sa imo kaugalingon. Upod diri ang bisan ano nga klase sang pornograpiya. Kon may mga sitwasyon ukon buluhaton nga nagapakusog pa gid sang tentasyon, likawi ang mga ini. Kabalo ka kon ano ini nga mga sitwasyon kag buluhaton. Kag kon indi ka sigurado, ang Espiritu, ang imo pamilya, kag ang imo mga lider makabulig sa imo sa paghibalo. Ipakita sa imo Amay sa Langit nga imo ginatahod kag ginarespeto ang sagrado nga gahum sa pagtuga sang kabuhi.

Ang imo respeto sa kaugalingon kag sa iban magadako kon imo ginatahod ang imo lawas sa imo pangginawi, hitsura, kag pamayo.

Ang Ginuo nagpromisa sang dalagko nga mga manggad sang kaalam sa mga nagasunod sang Pulong sang Kaalam. Ang maayo nga panglawas, nga wala sang adiksyon, nagapadako man sang imo ikasarang sa pagbaton sang personal nga rebelasyon, sa pagpanumdom sing maathag, kag pagserbisyo sa Ginuo.

Ang pagpangabuhi sang layi sang sekswal nga katinlo nagadala sang pagdayaw sang Dios kag personal nga espirituhanon nga gahum. Ginaprotektahan ka sini kag ang imo palaabuton nga pamilya. Kon ginkasal ka na, ining layi magadala sang mas dako nga pagpalangga, pagsalig, kag pag-hiusa sa inyo pag-asawahay. Ang pagtuman sining layi magapatigayon sa imo nga mag-uswag sa wala katapusan kag mangin mas pareho sa imo Amay nga Langitnon. Ang imo kompiyansa magadako samtang nagapangabuhi ka bilang disipulo ni Jesucristo.