Ang mga ordinansa kag mga kasugtanan sa templo nagatugot sa imo nga mas mabaton ang mga bugay sang Dios

Ang endowment isa ka regalo sang kaalam kag gahum. Sa mga ordinansa sang endowment sa templo, mas lubos mo nga ginadala ang ngalan sang Manluluwas sa imo kaugalingon. Nagapakighisugot ka nga tumanon ang Dios, magsakripisyo para tumanon ang Iya pagbuot, ipangabuhi ang layi sang sekswal nga katinlo, kag ikonsagrar—ukon ihalad—ang imo kabuhi kag ang tanan nga ginhatag sa imo sang Dios sa Iya Simbahan. Amo ini ang imo mga promisa. Ang Dios nagapromisa nga bugayan ka sang mas dako nga ihibalo, proteksyon, kag ikasarang nga malab-ot ang Iya gahum. Nagapromisa man Sia nga hatagan ka sang kabuhi nga wala katapusan upod sa Iya. Bilang bahin sang endowment, mabaton mo ang sagrado nga pribelihiyo sang pagsuksok sang garment sang balaan nga priesthood. Ang garment isa ka simbolo ni Jesucristo kag pahanumdom sang imo mga kasugtanan sa templo.

Ang pagselyo sa templo nagahugpong sang mga mag-asawa kag mga pamilya sa wala katubtuban. Sa ordinansa sang pagselyo sa templo, ikaw kag ang imo bana/asawa magahimo sang kasugtanan upod sa Dios kag sa isa kag isa. Magapromisa kamo nga mangin lubos nga tampad sa Dios kag sa isa kag isa, nga palanggaon kag alagaran ang isa kag isa, kag magbuligay para tumanon ang mga kasuguan sang Dios. Amo ini ang imo promisa. Ang Dios nagapromisa nga ang imo relasyon sa imo bana/asawa kag sa inyo kabataan magapabilin hasta sa katubtuban. Nagapromisa man Sia nga mahimo mo mabaton ang pinakataas nga himaya upod sa Iya sa selestiyal nga ginharian kon tumanon mo ang imo mga kasugtanan. Ini nga bugay ginatawag pangkahitaasan.

Pirme gid maghupot sang temple recommend. Makigkita sa isa ka miyembro sang inyo bishopric para makabaton sini. Pamangkuton ka niya kon paano mo ginapangabuhi ang mga sulundan sang Ginuo para makasulod sa balaan Niya nga balay. Rebyuha ining mga pamangkot pirme. (Makita mo ini sa appendix sang sini nga libro.) Bisan pa malayo ang inyo balay sa templo, ang imo recommend mangin simbolo sang imo pagpalangga sa Ginuo kag sa imo pangako nga ipangabuhi ang Iya mga pagsulundan.

Magkadto sa templo pirme suno sa imo masarangan. Gamit ang imo temple recommend, pwede ka magsulod sa balay sang Ginuo kag mabunyagan kag makumpirmahan para sa imo mga katigulangan, para mabaton nila ang mga bugay nga ginhatag sa imo. Hingaliti ang tagsa ka oportunidad nga makakadto sa templo. Pangitaa ang Ginuo sa Iya balay. Pangitaa Sia sa mga ordinansa, mga simbolo, kag sa Espiritu nga imo mabatyagan. Makita mo Sia.

Maghanda sa paghimo sang mga kasugtanan sa balay sang Ginuo. Isa sang pinakamaayo nga pamaagi sa paghimo sini amo ang pagtuman sang imo kasugtanan sa bunyag. Himoa ini nga isa sang imo giya nga lalab-uton para mabaton ang mga ordinansa sa templo kag mangin manugtuman sang kasugtanan sa bilog mo nga kabuhi. Suguri na nga ipangabuhi ang mga layi nga ipangako mo nga tumanon sa templo: pagtuman sang mga kasuguan sang Dios, pagsakripisyo, ang ebanghelyo ni Jesucristo, kaputli, kag pagkonsagrar. Ang imo pamilya, ang bishop, kag iban pa nga mga lider sa Simbahan makabulig sa imo.

Pwede ka nga mangin mas pareho kay Jesucristo. Buligan ka Niya nga mangin mas dako nga sumulunod sang pagkamatarong. Ang mga ordinansa kag kasugtanan sa templo magatudlo sa imo kon paano ka makasulod sa presensya sang Dios kag makabaton sang kabuhi nga wala katapusan upod sa Iya.

Maarmasan ka sang gahum sang Dios. Ang mga kasugtanan sa templo may upod nga promisa nga ang gahum kag himaya sang Dios mangin ara sa imo. Bantayan ka sang Iya mga anghel.

Ang oras mo sa templo magalapit pa gid sa imo kay Jesucristo kag sa Balaan nga Espiritu. Mabatyagan mo ang kalinong kag kapahuwayan sang Dios. Mabatian mo ang Iya tingug nga mas maathag. Magabukas ang kalangitan sa imo, kag mas maintiendihan mo ang Iya pamaagi. Makaangkon ka sang mas dako nga kusog sa pag-atubang sang imo mga kabudlayan tungod ang imo tagipusuon naangot sa Iya.