Gusto sang Dios nga makig-angot sa imo

Giyahan ka sang Espiritu pakadto sa Amay nga Langitnon kag kay Jesucristo. Amo ini ang importante nga papel sang Balaan nga Espiritu. Engganyuhon ka man Niya nga maghinulsol kag sundon si Jesucristo para makabaton ka sang mga bugay sang Iya Pagbayad-Sala. Kon maghinulsol ka, tinloan ka sang Espiritu kag buligan ka nga magbag-o.

Ang Balaan nga Espiritu nagahambal sa imo kaisipan kag tagipusuon. Ang mga mensahe halin sa Espiritu pwede nga magsulod sa imo kaisipan sa madamo nga paagi—sa inspirado nga mga panghunahuna, mga paandam, maathag nga pag-intiendi, kag espirituhanon nga mga handumanan. Ang Balaan nga Espiritu sarang nga maghambal sa imo tagipusuon paagi sa makapaalsa nga mga balatyagon pareho sang kasulhay, kompiyansa, kalinong, pagpalangga, kasadya, pagpaubos, kapasalamatan, kag pasensya.

“Batona ang Balaan nga Espiritu.” Ini nga mga tinaga ginhambal sang ginkumpirma ka nga miyembro sang Simbahan ni Cristo. Paano mo ginabaton ang Balaan nga Espiritu? Paagi sa pagtuman sang mga pinanudlo ni Jesucristo. Sia amo ang imo kusog. Ang pagsunod sa Iya nagaimbitar sang Balaan nga Espiritu sa imo kabuhi.

Pangitaa ang imo Amay nga Langitnon sa pangamuyo. Ibuhos ang imo tagipusuon sa Dios. Pasalamati Sia sa madamo nga manami nga mga bugay nga ginhatag Niya sa imo. Ihambal sa Iya ang imo mga kalipay, mga ginakabalak-an, kag mga pamangkot. Magpundo kag magpamati sa Iya mga sabat, nga pwede mag-abot bilang mga pamatyagan sang kalinong, mga hunahuna sa imo kaisipan, ukon mga pagpabatyag nga maghimo sang isa ka butang.

Pamatii ang tingug sang Dios sa balaan nga kasulatan. Ang balaan nga mga kasulatan mga pulong sang Dios sa imo! Tun-i ini sila adlaw-adlaw para madiskubrehan mo ang Iya tingug kag mabatyagan ang Iya pagpalangga. Samtang nagabasa ka, binagbinaga kon ano ayhan ang Iya ginatudlo sa imo, kag isulat ang mga pagpabatyag nga nagaabot. Himoa nga adlaw-adlaw nga kagawian ang pagtuon sang balaan nga kasulatan—labi na gid ang Libro ni Mormon—sa bilog mo nga kabuhi.

Aktohi ang espiritwal nga mga pagpabatyag nga imo mabaton. Kon may pagpabatyag ka ukon impresyon nga maghimo sang isa ka maayo nga butang nga mahimo makabugay sa iban, himoa ini! Ang tanan nga maayo nagahalin sa Dios. Ipakita sa imo Amay nga Langitnon nga makasalig Sia sa imo nga magsunod sa mga impresyon halin sa Iya.

Ang Balaan nga Espiritu magapaumpaw kag magagiya sa imo. Ginakilala Sia bilang Manugpaumpaw. Suportahan ka Niya sa mga panahon sang pagtilaw. Buligan ka Niya nga mahibal-an kon ano ang ihambal ukon himuon. Upod ang Iya impluwensya, mabal-an mo ang kinalain sang matuod kag indi matuod. Mabuligan ka Niya nga makita ang maayo sa iban kag sa imo kaugalingon. Ang Espiritu magapaandam man sa imo sang katalagman. Giyahan ka Niya padulong kay Jesucristo kag palayo sa sala.

Sarang ka makabaton sang espirituhanon nga mga dulot. Madamo sang mga dulot nga ginahatag ang Dios sa Iya mga anak paagi sa Iya Espiritu. Ang iban nga ginsambit sa balaan nga kasulatan amo ang rebelasyon, pagpati kay Jesucristo, pagpanudlo, paghibalo, kag kaalam. Magpangamuyo para magpamangkot sa Amay nga Langitnon parte sa espirituhanon nga mga dulot nga ginhatag Niya sa imo, kon paano mo sila patubuon, kag kon paano Niya gusto nga imo ini gamiton sa pagbugay sa iban.