Ang mga ordinansa kag mga kasugtanan nagatugot sa imo nga malab-ot ang mga bugay sang Dios

Ang mga ordinansa nagatudlo sa imo kay Jesucristo. Ang ordinansa isa ka sagrado nga seremonya nga may simboliko nga mga kahulugan nga nagatudlo parte kay Jesucristo. Halimbawa, ang sakramento, indi lamang tinapay kag tubig. Ginapadumdom kita sini parte sa Manluluwas.

Ang mga kasugtanan tanda sang pagpalangga, pagsalig, kag mga ginalauman sang Dios. Ginapadalom pa gid sini ang imo relasyon sa Dios. Ang paghimo sang kasugtanan nagapakita nga palangga mo ang Dios kag komitido ka sa Iya. Makasalig ka sa Iya, kag makasalig Sia sa imo. Upod sinang mas dako nga pangako ang mas dako nga kinamatarong sa Iya gahum kag bulig samtang ginatuman mo ang imo mga kasugtanan.

Nagahimo ka sang mga kasugtanan sa Dios sang ginbunyagan ka kag ginkumpirmahan kag kon mag-ambit ka sang sakramento. Sang ginbunyagan ka, nagpromisa ka nga dalhon mo sa imo kaugalingon ang ngalan ni Jesucristo, serbisyuhan Sia, kag tumanon ang Iya mga kasugoan sa bilog mo nga kabuhi. Sa tion sang sakramento, nagapromisa ka man nga dumdumon Sia pirme. Amo ini ang imo mga promisa. Tungod handa ka nga tumanon ini, nagapromisa ang Dios nga hatagan ka sang Balaan nga Espiritu bilang kaupod mo pirme.

Kabiga ang sakramento bilang sagrado nga regalo. Ipakita ang imo pangako kay Jesucristo paagi sa paghanda para sa sagrado nga eksperiyensya sa oras sang sakramento. Binagbinaga kon ano ang pwede mo himuon para mangin tampok ini nga espirituhanon nga eksperiyensya sang imo semana.

Pangitaa ang Manluluwas sa mga ordinansa. Kon magtan-aw ka ukon magpartisipar sa isa ka ordinansa, pamangkota ang imo kaugalingon, “Ano ang matun-an ko diri parte kay Jesucristo?” ukon “Paano ako sini mas ipalapit sa Iya?” Bantayi kon ano ang ginatudlo sang Espiritu sa imo.

Tugoti nga giyahan sang imo mga kasugtanan ang imo mga aksyon. Kon may pagpili ka nga dapat himuon, panumduma ang imo relasyon sa kasugtanan upod sa Dios. Magmangin tampad sa Iya. Pamangkota ang imo kaugalingon: Nagaugyon bala ini sa akon mga kasugtanan? Halimbawa, ginapalangga kag ginaalagaran ko bala ang iban, ginapaumpawan ang mga nagakinahanglan sang kaumpawan, kag nagatindog bala ako bilang saksi ni Cristo—bisan sa diin kag sa tanan nga oras?

Makaangkon ka sang gahum para malampuwasan ang tentasyon, sala, kag mga pagtilaw sang kabuhi. Ang paghimo kag pagtuman sang mga kasugtanan nagahatag sa imo sang kinamatarong sa gahum sang Dios. Upod ang ina nga gahum, sarang mo atubangon ang bisan ano nga may kompiyansa. Si Jesucristo amo ang imo kusog!

Sarang ka nga mangin matinlo kag mapatawad. Parte sang promisa sang Dios sa imo tungod sang pagtuman sang imo kasugtanan sa bunyag amo ang kapatawaran sang imo mga sala. Buot silingon nga mientras nagahinulsol ka kag nagatuman sang imo mga promisa sa Dios, patawaron ka Niya kag buligan ka nga mas mag-uswag.

Sarang mo nga mangin kaupod pirme ang Balaan nga Espiritu. Isa pa ka promisa nga naangot sa bunyag kag sakramento amo ang pirme nga pagpakig-upod sang Iya nga Espiritu kag nagaalagad nga mga anghel. Indi mo kinahanglan atubangon ang imo mga kabudlayan nga ikaw lang. Wala gid nagatalikod ang Dios sa Iya mga anak sa kasugtanan—makasalig ka sina.

Maangkon mo ang suporta sang katawhan sang Dios sa kasugtanan. May bahin ka sa komunidad sang katawhan sa kasugtanan sa Simbahan sang Manluluwas. Pataason ninyo kag papagsikon ang isa kag isa. Magpangalisod sing ululopod kag magpangalipay sing ululupod. Ginapas-an ninyo ang mga problema sang kada isa. Ang imo pamilya, ang bishop, mga lider, kag iban pa nga mga miyembro sang Simhanan ari lang para buligan ka, kag pwede mo man sila buligan.