Lamharon
5. Maglakat sa kasanag sang Dios
Si Jesucristo nga nagabakero sang isa ka panong sang karnero

I Shall Not Want [Ara ang Tanan nga Ginakinahanglan Ko], ni Yongsung Kim. Sa kaalwan sang Havenlight

5.

Maglakat sa kasanag sang Dios

Mga Taga-Galacia 5:25

Makahimo ka sang mas maayo nga mga pagpili kon makita mo ang mga bagay sing maathag. Amo ina kon ngaa importante kaayo ang kasanag; ginapahapos sang kasanag nga makita ang husto nga dalan. Ginhatagan ka sang Amay nga Langitnon sang kahigayunan nga magamit ang langitnon nga ginhalinan sang kasanag—ang dulot sang Balaan nga Espiritu—para buligan ka nga makita sing maathag kon ano ang maayo kag malain, husto kag sala.

Wala Katapusan nga mga Kamatuoran

Sarang mo maangkon ang Balaan nga Espiritu bilang pirme nga kaupod. Sang ginkumpirma ka nga miyembro sang Simbahan, gin-agda ka nga “batona ang Balaan nga Espiritu.” Ang oportunidad nga maangkon ang Espiritu bilang pirme mo nga kaupod isa sa pinakadako nga regalo sang Dios sa imo.

Ang paghimo sang maayo nga mga pagpili nagapauswag sang imo ikasarang nga mabatyagan ang Espiritu. Madamo sang maayo kag mapuslanon nga mga butang sa sining kalibutan. Pareho sang imo lawas nga maapektuhan sang imo ginakaon kag ginainom, ang imo kaisipan kag espiritu nagakaapektuhan man sing dako sang imo ginabasa, ginatan-aw, kag ginapamatian.

Mga Imbitasyon

Hatagi ang Ginuo sang tiyempo adlaw-adlaw. Magtuon parte sa Iya. Panumduma Sia pirme. Magpangamuyo sa imo Amay nga Langitnon. Tun-i ang balaan nga mga kasulatan kag ang mga pulong sang buhi nga mga propeta. Dayon tinguhai nga ipangabuhi ang imo natun-an.

Pangitaa inang nagapaalsa, nagainspirar, kag nagaagda sang Espiritu. Samtang nagahimo ka sang mga pagpili kon ano ang lantawon, basahon, pamatian, ukon entrahan, pamensara kon ano ang nabatyagan mo sa mga ini. Nagaagda bala ini sang maayo nga panghunahuna? Palayui ang bisan ano nga nagayaguta sa sagrado nga mga bagay ukon inang mga imoral. Indi mag-entra sa bisan ano nga nagasablag sa imo panghunahuna kag pagbatyag sang Espiritu, pareho sang kapintas, makahulubog nga ilimnon, kag makahalalit nga droga. Mangin maisog sa pagpatay sang video ukon hampang, pagbiya sang sine ukon sinaot, pag-ilis sang imo musika, ukon pagtalikod sa bisan ano nga wala nagahisanto sa Espiritu.

Gamita ang social media para mag-alsa. Ang social media isa ka mabaskog nga kasangkapan sa komunikasyon. Kon gamiton mo ini, magtutok sa kasanag, pagtuo, kag kamatuoran. Indi pag-ikumparar ang imo kabuhi sa kon anong daw ara sa iban. Panumduma nga ang imo balor nagahalin sa imo pagka-anak sang langitnon nga ginikanan, indi tungod sa social media.

Magpangita sang mapuslanon nga mga eksperiyensya kag matuodtuod, nagadugay nga mga relasyon. Halungi nga ang imo paggamit sang teknolohiya kag media wala nagabaylo sa paghatag sang tiyempo sa personal nga pagpakig-upod sa pamilya kag mga abyan. Ang social media kag iban pa nga teknolohiya nagakuha sang dako nga parte sang imo oras nga wala man sang maayo nga balik. Magpahuway sa paggawi online kag makig-angot sa mga tawo sa tunay nga kabuhi.

Si Jesucristo nga nagapanguna sang panong sang karnero sa kahilamunan

Ginpromisa nga mga Bugay

Mangin kaupod mo ang Espiritu pirme. Ini nga promisa upod sang kasugtanan nga ginahimo mo pirme kada mag-ambit ka sang sakramento. Ang Espiritu magasaksi sa imo parte sa Amay nga Langitnon kag kay Jesucristo. Paumpawan ka Niya, giyahan, paandaman, kag pakabalaanon. Buligan ka Niya nga makilala ang kamatuoran kag makita ang kaayo sa kalibutan.

Mga Pamangkot kag mga Sabat

Paano ko mahibaloan nga nabatyagan ko ang Balaan nga Espiritu? Ang pagtuon nga kilalahon ang Espiritu nagakinahanglan sang oras, paghanas, kag pasensya. Nagahambal Sia sa lainlain nga mga tawo sa lainlain nga paagi. Indi pagbale-walaa ang simple nga mga butang—ang malinong nga pamatyagan kon mabatian mo ang testimonya sang isa ka tawo ukon ang indi mahim-os nga pamatyagan pagkatapos maghimo sang sala nga pagpili. Pangitaa sa balaan nga kasulatan ang lainlain nga paagi nga nagapakighambal ang Espiritu, pangamuyoi ini, kag padayon nga magpangita sang mga oportunidad para mabatyagan ang Espiritu.

Ano ang pornograpiya? Ngaa likawan ko ini? Ang pornograpiya isa ka representasyon, sa litrato ukon sa tinaga, nga gindisenyo para pukawon ang sekswal nga balatyagon. Ang pornograpiya may madamo nga porma, lakip na sa mga video, litrato, libro, mga hampang, kag musika. Mahimo man nga mga mensahe ini ukon mga imahe nga ginapasa-pasa sang kaabyanan. Ang pornograpiya wala nagarespeto sang mga butang nga sagrado—ang aton pisikal nga mga lawas kag sekswal nga mga balatyagon. Mahimo nga makakita ka sang pornograpiya nga indi hungod. Kon makakita ka sang pornograpiya sing hungod ukon indi hungod, magpalayo gilayon. Pwede ka man makighambal sa isa ka ginikanan ukon iban pa nga ginasaligan mo nga hamtong. Ang hungod nga pagtan-aw sang pornograpiya sala kag nagahalit sa imo ikasarang nga mabatyagan ang Espiritu. Ginapaluya sini ang imo kontrol-sa-kaugalingon kag ginaguba ang imo panan-aw sa imo kaugalingon kag sa iban. Si Jesucristo may gahum para buligan ka nga mapakigbatuan ang pornograpiya kag maghinulsol. Magliso padulong sa Iya kag magtalikod sa kadulom. Ang imo bishop makabulig sa imo nga makabaton sang kusog kag kapatawaran paagi sa Manluluwas. Si Jesucristo amo ang imo kusog!

Tan-awa sa Salmo 119:105 (ang pulong sang Dios daw pareho sang kasanag sa aton alagyan); Amos 5:14 (magpangita sang kaayo); Mga Taga-Galacia 5:22–23 (ang mga bunga sang Espiritu); Moroni 7:18–19 (ang kasanag ni Cristo); Doctrina kag mga Kasugtanan 6:23 (ang Ginuo nagahambal sang paghidaet); 20:77, 79 (mga pangamuyo sa sakramento).

Pamangkot para sa Temple Recommend

  • Ang Ginuo nagsiling nga ang tanan nga butang dapat “himuon sa katinlo” sa Iya atubang (Doktrina kag mga Kasugtanan 42:41). Ginatinguhaan mo bala ang moral nga katinlo sa imo kaisipan kag pamatasan?