Ang plano sang Dios para gid sa imo

Ang Amay nga Langitnon amo ang tagsulat sang plano. Sia ang Amay sang imo espiritu, kag palangga ka Niya. Gusto ka Niya hatagan sang pinakadako Niya nga bugay—kabuhi nga wala katapusan upod sa Iya. Buot silingon, gusto Niya nga mangin mas pareho ka sa Iya kag magpangabuhi sang malipayon, mahimayaon nga kabuhi pareho sa Iya. Ara sa Iya ang tanan nga gahum kag nakahibalo sang tanan. Makasalig ka sa Iya, bisan nga mabudlay ang kabuhi.

Ginhimo ni Jesucristo nga posible ang plano. Antes gintuga ang kalibutan, ginpili sang Amay nga Langitnon si Jesucristo nga mangin imo Manluluwas. Si Jesucristo lang gid ang makadala sa imo pabalik sa imo Amay sa Langit. Amo ina kon ngaa ginapili naton nga sundon Sia. Nagadepende ang tanan sa sina nga pagpili!

Ang pag-asawahay kag pamilya importante sa plano sang Dios. Parte ka sang pamilya sang Dios, kag ang tanan nga espiritu nga anak Niya nagakadto sa duta paagi sa isa ka iloy kag isa ka amay. Gusto sang Amay nga Langitnon nga ang Iya mga anak nga babayi kag lalaki pirme nagaprogreso padulong sa wala katapusan nga pagkaperpekto. Ang tagsa ka lalaki kag babayi palareho nga nagabuligay sa mapinalanggaon, nagahiusa nga pag-asawahay. Ang kabuhi sa pamilya diri sa duta—upod ang tanan nga kakulangan sini—mahimo nga magdala sang dako nga kalipay. Gintuyo ini para buligan ka sa paghanda para sa kabuhi nga wala katapusan upod sa Dios.

Maghupot sang wala katubtuban nga perspektibo. Tagsa nga mangatubang ka sang mga tentasyon, mga pagtilaw, mga kapaslawan, ukon mabudlay nga mga pagpili, padumduma ang imo kaugalingon sang plano sang Dios. Tan-awa kon paano ang wala katapusan nga mga kamatuoran nga imo nahibal-an parte sa Iya plano makabulig nga magliwat sang imo panulok sa imo mga kabudlayan.

Pangitaa ang impluwensya sang Dios sa imo kabuhi. Talupangda ang mga paagi nga ginabugayan ka sang Dios. Mahimo nga maayong binuhatan ini halin sa iban, panahon sang kalinong, ukon sabat sa pangamuyo.

Pilia nga sundon ang plano sang Dios. Tun-i kon ano ang gusto sang imo Amay nga Langitnon nga imo himuon. Pangayoa ang Iya giya samtang nagatuon ka sang balaan nga kasulatan, sang mga pulong sang buhi nga mga propeta, sang proklamasyon sang pamilya, kag sang imo patriarchal blessing. Mabuligan ka sini nga maghanda sa pagserbisyo sa Ginuo, bilang misyonero kag sa bilog mo nga kabuhi. Himoa ang pagserbisyo sa Ginuo, walay katapusan nga pag-asawahay, kag pagpadako sang kabataan nga mataas nga prayoridad. Himoa ang imo bahin para makaangkon sang malipayon nga pamilya karon paagi sa pagsunod sang mga pinanudlo ni Jesucristo.

Sarang mo atubangon ang mga pagtilaw sang kabuhi nga may kaisog kag paglaum kay Cristo. Tungod nahibal-an mo ang wala katapusan nga plano sang Dios, may malahalon ka nga instrumento nga makabulig sa imo sa tiyempo sang kabudlayan. Nahibal-an mo nga masobra pa ang kabuhi sangsa mga nagakatabo sa tunga sang pagkabun-ag kag kamatayon. Nakahibalo ka kon sin-o ka gid, kon ano ang imo katuyuan, kag ang imo madangtan sa bulig sang Manluluwas. Si Jesucristo amo ang imo kusog!

Sarang ka magbaton sang kabuhi nga wala katapusan kon sundon mo si Jesucristo. Hatagan ka Niya sang gahum para mangin mas pareho sa Iya, makabalik sa imo langitnon nga ginikanan, kag magpangabuhi sa kalipay sa wala katapusan upod sa imo mga mahal sa kabuhi . Magsalig kay Jesucristo.