Үнэн таныг чөлөөлнө

Тэнгэрлэг Эцэг Өөрийн хөвгүүд, охидыг үргэлж суралцдаг байгаасай гэж хүсдэг. Суралцахыг эрэлхийлж, бас суралцах дуртай болоход материаллаг, сүнслэг хэрэгцээний аль аль нь танд бий. Боловсрол бол зөвхөн мөнгө олох тухай асуудал биш юм. Энэ бол Тэнгэрлэг Эцэгтэйгээ илүү адил болох мөнхийн зорилгын тань нэг хэсэг.

Шударгаар амьдрах гэдэг нь Бурханы мэлмийд зөв гэсэн зүйлийг хайрлах гэсэн үг. Энэ нь хувийн тав тух, нэр алдар, таатай байдлыг хайрлахаас илүү зүйл юм. Энэ нь зөв зүйлийг зөв учраас л хийнэ гэсэн үг.

Хуваалцаж болох үнэ цэнтэй зүйл танд бий. Есүс Христийн сайн мэдээнд амьдралын асуултуудын хариулт бий. Энэ бол амар амгалан, аз жаргалд хүрэх зам. Та бүхнийг мэдэхгүй байж болох ч хөршөө хайрлах, тэдэнтэй үнэн зарчмуудыг хуваалцах, тэдгээрийг илүү ихийг судлахад урих зэргийн талаар хангалттай мэддэг.

Үргэлж суралцдаг бай. Оюун ухаанаа тэлж, ур чадвараа сайжруулах боломжийг эрэлхийл. Энэ боломж нь сургууль, мэргэжил сургалтын төвөөс авч болох албан ёсны боловсролоос гадна өөрийн найдвартай гэж үзсэн боловсролын албан бус эх үүсвэрүүд байж болно. Хичээл зүтгэлдээ Их Эзэнийг оролцуул. Тэгвэл Тэр таныг удирдах болно.

Сүнслэг үнэнүүдийг олж мэд. Амьдарч буй эх дэлхийнхээ талаар судлахдаа та дэлхийг бүтээсэн Аврагчийн талаар бас судал. Түүний амьдрал, сургаалаас судал. Институт, семинар, сайн мэдээнээс суралцах хувийн сургалтаа насан туршид суралцах үйл явцынхаа нэг хэсэг болго. Энэ нь таныг номлолд үйлчлэх болон амьдралынхаа туршид сайн мэдээг хуваалцахад бэлдэж чадна.

Үнэнч шударга амьдар. Сургууль дээр, ажил дээр, онлайнаар ч бай бүү хулгай хий, бүү худал хэл, бүү хууран мэхэл эсвэл ямар ч арга замаар бай бусдыг бүү мэхлэн төөрөгдүүл. Олон нийтийн дунд мөн ганцаараа байхдаа ч Есүс Христийн үнэнч дагалдагч бай.

Боловсрол Их Эзэнд, тэр дундаа номлогчоор үйлчлэх чадварыг тань нэмэгдүүлдэг. Энэ нь бусдыг, ялангуяа гэр бүлээ адислах хүч чадлыг өгдөг. Илүү ихийг сурч мэдэх тусам та Бурханы хаант улсыг байгуулах, дэлхийд сайнаар нөлөөлөхөд илүү туслах болно.

Шударга байдал нь амар амгалан, өөрийгөө хүндлэх хүндлэлийг авчирдаг. Үг, үйлдлээ үнэнтэй нийцүүлэх үедээ та итгэл дааж чадна гэдгээ Их Эзэнд болон бусад хүнд харуулдаг.

Таныг Есүс Христийн сургаалын төлөө зогсох үед Тэр тантай хамт зогсох болно. Есүс Христ бол таны хүч чадал! Хүмүүс тантай санал нийлэхгүй байж болох ч зориг, чин сэтгэлийг тань анзаарах болно. Бусад хүн үлгэр жишээг тань дагасан эсэхээс үл хамааран таны гэрчлэл, өөртөө болон Христэд итгэх итгэл өсөн нэмэгдэх болно.