Таны бие махбод бол ариун нандин

Таны бие махбодыг ертөнцийн хамгийн сүр жавхлант, алдар суут Нэгэн болох Бурханы дүр төрхөөр бүтээсэн. Судрууд бидний бие махбодыг Сүнс оршдог ариун сүмтэй харьцуулсан байдаг. Мэдээж, таны бие махбод одоо төгс биш. Гэсэн хэдий ч таны бие махбодоороо туулж буй туршлагууд хэзээ нэг өдөр төгс, амилуулагдсан, алдар суут бие махбодыг хүлээн авахаар бэлтгэхэд тань тусална.

Таны бодгаль бие махбод, сүнс хоёроос бүрддэг. Тиймээс биеийн болон сүнслэг эрүүл мэнд хоорондоо уялдаа холбоотой. Аврагч бие махбоддоо анхаарал тавих зарчмуудыг зааж, бие махбодын болон сүнслэг адислалуудыг амлахын тулд Мэргэн ухааны үгийг илчилсэн.

Бэлгийн дур хүсэл нь Бурханы төлөвлөгөөний чухал хэсэг бөгөөд аз жаргалтай гэрлэлт, мөнхийн гэр бүлийг бий болгодог. Энэ мэдрэмж нь нүгэл биш, харин ариун нандин зүйл юм. Бэлгийн дур хүсэл нь үнэхээр ариун нандин, хүчирхэг зүйл учир энэ мэдрэмжийг Өөрийнх нь зорилгын дагуу ашиглахад тань бэлтгэх үүднээс Бурхан ариун явдлын хуулийг өгсөн. Ариун явдлын хуулинд зөвхөн гэрлэсэн эрэгтэй, эмэгтэй хүний хоорондох бэлгийн харьцааг Бурхан зөвшөөрдөг талаар мэдэгддэг. Дэлхий дээр олон хүн Бурханы хуулийг үл ойшоож, бүр доог тохуу хийдэг ч Бурхан биднийг Өөрийнх нь шавь байх, дэлхийн жишгээс илүү өндөр жишгээр амьдрахад урьдаг.

Өөрийн болон бусдын бие махбодод хүндэтгэлтэй ханд. Та өөрийнхөө хувцаслалт, үс засалт, гадаад төрхийн тал дээр сонголт хийх үедээ өөрөөсөө “Би бие махбодоо Бурханаас ирсэн бэлэг хэмээн хүндэтгэн үзэж байна уу?” гэж асуугаарай. Тэнгэрлэг Эцэг биднийг нэг нэгнээ үнэхээр хэн бэ гэдгээр нь буюу зүгээр нэг бие махбод биш, харин бурханлаг хувь тавилантай, Өөрийнх нь хайртай хүүхдүүд гэж хараасай хэмээн хүсдэг. Мөнхийн ирээдүйтэй Бурханы хүүхэд гэдгийг тань илтгэхийн оронд бие махбоддоо зохисгүй байдлаар анхаарал татах эсвэл үүнийг тодотгон харуулах загвараас зайлсхий. Ёс суртахууны хувьд цэвэр ариун байж мөн Бурханыг хайрлаж сонголтоо хий. Гэр бүлийнхнээсээ зөвлөгөө эрэлхийл.

Бие махбодоо өвтгөх, гэмтээх зүйлсийг бус харин хүчирхэгжүүлэх зүйлсийг хий. Бурханы өгсөн олон сайн сайхан зүйлийг талархан хүлээн ав. Согтууруулах ундаа, тамхи, кофе, цай, бусад хортой хар тамхи, бодис зэрэг нь таны бие махбод, сүнсэнд зориулагдаагүй гэдгийг сана. Жороор олгох эм зэрэг ач тустай бодис хүртэл зөв хэрэглээгүй тохиолдолд хор хөнөөл учруулж болно.

Бэлгийн харьцаа, бэлгийн дур хүслийг ариун нандин байлга. Тэдгээрийг тоглоом шоглоом, зугаа цэнгэлийн сэдэв болгох ёсгүй. Гэрлээгүй эрэгтэй, эмэгтэй хүмүүс өөр хүний нууцлаг, нандин газруудад хувцастай байсан ч хүрэх нь буруу. Хийх, харах, унших, сонсох, бодох, олон нийтийн сүлжээнд нийтлэх зүйлдээ эсвэл зурвас илгээхийг сонгох үедээ өөртөө болон бусдад тачаадсан мэдрэмжийг зориуд төрүүлэх аливаа зүйлээс зайлсхий. Үүнд бүх хэлбэрийн порнограф орно. Хэрэв та тухайн нөхцөл байдал эсвэл үйл ажиллагаа уруу таталтыг илүү даамжруулж байгааг анзаарвал тэдгээрээс зайлсхий. Тэдгээр нөхцөл байдал, үйл ажиллагаа юу байж болохыг та мэднэ. Хэрэв та өөртөө итгэлтэй биш байвал Сүнс, эцэг эх, удирдагчид тань таньж мэдэхэд тусалж чадна. Амьдрал бүтээх ариун нандин хүчийг хүндэтгэн дээдэлж байгаагаа Тэнгэр дэх Эцэгтээ харуул.

Зан авир, гадаад төрх, хувцаслалтаараа бие махбодоо хүндэтгэж байгаагаа харуулах үед өөрийгөө болон бусдыг хүндэтгэх үзэл тань өсөн нэмэгдэх болно.

Мэргэн ухааны үгийг сахидаг хүмүүст Их Эзэн мэдлэгийн агуу сан хөмрөгийг амласан. Донтолтоос ангид эрүүл бие махбод нь хувийн илчлэл хүлээн авах, эрүүл ухаанаар сэтгэн бодох, Их Эзэнд үйлчлэх чадавхыг тань мөн нэмэгдүүлдэг.

Ариун явдлын хуулийн дагуу амьдрах нь Бурханы зөвшөөрөл, хувийн сүнслэг хүчийг авчирдаг. Энэ нь таныг болон ирээдүйн гэр бүлийг тань хамгаалдаг. Гэрлэх үед энэхүү хууль гэрлэлтэд тань илүү их хайр, итгэлцэл, нэгдмэл байдлыг авчрах болно. Энэ хуулийг дагах нь танд мөнхөд өсөж хөгжих, Тэнгэрлэг Эцэгтэйгээ илүү адил болох боломжийг олгоно. Есүс Христийн шавийн амьдралаар амьдрах үед өөртөө итгэх итгэл тань өсөн нэмэгдэнэ.