Ёслол, гэрээнүүд танд Бурханы адислалаас хүртэх боломжийг олгодог

Ёслолууд таныг Есүс Христ рүү чиглүүлдэг. Ёслол нь Есүс Христийн тухай заадаг бэлгэдэл бүхий ариун нандин зан үйл. Жишээ нь: Ариун ёслол бол зөвхөн талх, уснаас хүртэх төдий зүйл бус. Энэ нь бидэнд Аврагчийг сануулдаг.

Гэрээ бол Бурханы хайр, итгэл, хүлээлтийн тэмдэг. Тэдгээр нь таны Бурхантай харилцах харилцааг илүү гүнзгийрүүлдэг. Гэрээ байгуулах нь таныг Бурханд хайртай, Түүнд үнэнч байгааг харуулдаг. Та Түүнд итгэнэ мөн Тэр танд итгэх болно. Таныг гэрээнүүдээ сахихад Түүний хүч, тусламжийг хүртэх илүү боломж тэрхүү илүү гүн гүнзгий амлалттай хамт ирдэг.

Та баптисм хүртэх, гишүүнээр батлуулах мөн ариун ёслолоос хүртэх үедээ Бурхантай гэрээ байгуулдаг. Та баптисм хүртэх үедээ Есүс Христийн нэрийг өөртөө авах, Түүнд үйлчлэх, амьдралынхаа туршид Түүний зарлигуудыг дагахаа амладаг. Ариун ёслолын үеэр та мөн үргэлж Түүнийг санаж байх амлалтыг өгдөг. Эдгээр нь таны амлалт. Таныг амлалтаа сахихыг хичээх үед Бурхан Ариун Сүнсийг таны байнгын хамтрагч болгон өгөхөө амладаг.

Ариун ёслолыг эрхэм нандин бэлэг мэт ханд. Ариун ёслолын үеэрх ариун нандин туршлагад бэлтгэснээр Есүс Христэд үнэнч байдгаа харуул. Энэ ёслолыг долоо хоногийнхоо онцлох сүнслэг үйл явдал болгохын тулд юу хийхээ эргэцүүлэн бод.

Аврагчийг ёслолоос хай. Та ёслолыг харж байхдаа эсвэл түүнд оролцож байхдаа өөрөөсөө “Би үүнээс Есүс Христийн талаар юу сурах вэ?” эсвэл “Энэ нь намайг хэрхэн Түүнд илүү ойртуулах вэ?” гэж асуу. Сүнс танд юу зааж байгаад анхаарлаа хандуул.

Таны гэрээнүүд үйлдлийг тань чиглүүлэг. Сонголт хийх шаардлагатай үед Бурхантай байгуулсан гэрээт харилцаагаа санаарай. Түүнд үнэнч бай. Энэ нь миний гэрээнд нийцэж байна уу? гэж өөрөөсөө асуу. Жишээ нь: Би бусдыг хайрлаж, тэдэнд тохинуулж, тайвшрал хэрэгтэй хүмүүсийг тайтгаруулж, хаана ч үргэлж Христийн гэрч болон зогсдог уу? гэх мэт.

Та уруу таталт, гэм нүгэл, амьдралын сорилт бэрхшээлийг даван туулах хүчтэй байх боломжтой. Гэрээ байгуулах, сахих нь танд Бурханы хүчийг хүлээн авах боломж олгоно. Тэрхүү хүчээр та бүх зүйлтэй итгэлтэй нүүр тулж чадна. Есүс Христ бол таны хүч чадал!

Та цэвэр болж, өршөөл мэдрэх боломжтой. Баптисмын гэрээгээ сахихад тань зориулан Бурханы танд өгсөн амлалтын нэг хэсэг бол таныг нүглээс ангижруулах юм. Энэ нь таныг наманчилж, Бурханд өгсөн амлалтаа биелүүлэхэд Тэр таныг өршөөнө, сайжрахад тань тусална гэсэн үг.

Та Ариун Сүнсийг өөртэйгөө үргэлж хамт байлгаж чадна. Баптисм, ариун ёслолтой холбоотой өгсөн өөр нэг амлалт бол Түүний Сүнстэй байнгын хамтрагч байх явдал болон тэнгэр элч нарын тохинуулал юм. Та амьдралын сорилт бэрхшээлийг ганцаараа туулах шаардлагагүй. Бурхан гэрээт хүүхдүүдээ хэзээ ч орхидоггүй. Та үүнд найдаж болно.

Та Бурханы гэрээт хүмүүсийн дэмжлэгийг авах боломжтой. Та Аврагчийн Сүмийн гэрээт хүмүүсийн хамт олонд харьяалагддаг. Та нар нэг нэгнээ өргөж, урам өгдөг. Та нар хамтдаа гашуудаж, хамтдаа баясдаг. Та нар нэг нэгнийхээ ачааг үүрэлцдэг. Таны гэр бүл, бишоп, удирдагч, Сүмийн бусад гишүүн бүгд танд туслах гэж энд байгаа бөгөөд та ч тэдэнд тусалж чадна.