Бурхан тантай харилцахыг хүсдэг

Сүнс таныг Тэнгэрлэг Эцэг болон Есүс Христ рүү хөтөлдөг. Энэ нь Ариун Сүнсний чухал үүрэг юм. Тэр мөн таныг наманчлах, Есүс Христийг дагах урам зориг өгнө. Ингэснээр та Түүний Цагаатгалын адислалыг хүлээн авч чадна. Таныг наманчлах үед Сүнс таныг цэвэршүүлж, өөрчлөгдөхөд тань тусална.

Ариун Сүнс бидний оюунд болон зүрх сэтгэлд ярьдаг. Сүнснээс ирэх захиас таны оюун санаанд урам зориг өгөх бодол, сэрэмжлүүлэг, тодорхой ойлголт, сүнслэг дурсамж зэрэг олон арга замаар ирж болно. Ариун Сүнс тайвшрал, итгэл, амар амгалан, хайр, баяр баясгалан, даруу байдал, талархал, тэвчээр зэрэг сэтгэл сэргээх мэдрэмжээр таны зүрхэнд ярьж чадна.

“Ариун Сүнсийг хүлээн авна уу.” Энэ үгсийг таныг Христийн Сүмийн гишүүнээр батлах үед хэлсэн. Та Ариун Сүнсийг хэрхэн хүлээн авдаг вэ? Есүс Христийн сургаалыг дуулгавартай дагаснаар. Тэр бол таны хүч чадал. Түүнийг дагах нь таны амьдралд Ариун Сүнсийг урин авчирдаг.

Залбиралдаа Тэнгэрлэг Эцэгийг эрэлхийл. Түүнд зүрх сэтгэлээ уудал. Түүний танд өгсөн олон сайн сайхан адислалын төлөө Түүнд таларх. Баяр баясгалан, санаа зовнил, асуултаа Түүнтэй хуваалц. Тайван байж, амар амгалангийн мэдрэмж, оюун бодолд төрөх бодол, ямар нэгэн зүйл хийх сэтгэгдэл зэргээр ирж болох Түүний хариултыг сонс.

Бурханы дуу хоолойг судруудаас сонс. Судрууд бол Бурханы танд өгсөн үг! Түүний дуу хоолойг таньж мэдэн, Түүний хайрыг мэдрэхийн тулд тэдгээрээс өдөр бүр суралц. Уншиж байхдаа та Түүний танд зааж буй зүйлийг тунгаан бод. Мөн төрж буй сэтгэгдлээ бичиж ав. Судруудыг, ялангуяа Мормоны Номыг өдөр болгон судалж хэвш.

Хүлээн авсан сэтгэгдлийнхээ дагуу үйлд. Хэрвээ хэн нэгнийг адислах сайхан зүйл хийх бодол, сэтгэгдэл төрж байвал үүнийхээ дагуу үйлд! Сайн сайхан бүхэн Бурханаас ирдэг. Өгсөн мэдрэмжийг нь дагана гэдэгт Тэнгэрлэг Эцэг өөрт тань итгэж болно гэдгийг Түүнд харуул.

Ариун Сүнс таныг тайтгаруулж, удирдана. Түүнийг Тайтгаруулагч гэж нэрлэдэг. Тэр таныг сорилт бэрхшээл тулгарсан үед тань дэмжих болно. Тэрээр таныг юу хэлэх, хийхээ мэдэхэд тусална. Түүний нөлөөгөөр та үнэн, худлын хоорондох ялгааг таньж чадна. Тэр таныг бусдаас болон өөрөөсөө сайн сайхныг олоход тусална. Сүнс аюул тулгарсан үед тань анхааруулж чадна. Тэр таныг Есүс Христ рүү чиглүүлж, нүглээс холдуулна.

Та сүнслэг бэлэг хүлээн авах боломжтой. Бурханы Сүнсээрээ дамжуулан хүүхдүүддээ өгдөг олон бэлэг бий. Библид дурдсан зарим бэлэгт илчлэл, Есүс Христэд итгэх итгэл, сургаал, ялган таних чадвар, мэргэн ухаан орно. Тэнгэрлэг Эцэгээс танд өгсөн сүнслэг бэлгүүдийн талаар, тэдгээрийг хэрхэн хөгжүүлэх болон Тэр таныг тэдгээр бэлгийг бусдыг адислахын тулд хэрхэн ашиглаасай гэж хүсдэгийг Түүнээс залбирч асуу.