Feast Upon the Word [ សូម ទទួលទាននូវព្រះបន្ទូលទាំងឡាយនៃព្រះគ្រីស្ទ ] ដោយ លីស លេម៉ុន ស្វិនដល ទទួលសិទ្ធិអនុញ្ញាតពី Havenlight
១១.
សេចក្តីពិតនឹងធ្វើឲ្យអ្នកមានសេរីភាព
យ៉ូហាន ៨:៣២
ព្រះវរបិតាសួគ៌របស់អ្នកគឺជាព្រះនៃសេចក្តីពិត ។ ទ្រង់ជ្រាបគ្រប់អ្វីៗទាំងអស់ ។ សេចក្តីពិតទាំងអស់មកពីទ្រង់ និងដឹកនាំទៅរកទ្រង់ ។ អ្នកបង្ហាញថា អ្នកឲ្យតម្លៃលើសេចក្តីពិត នៅពេលអ្នកខិតខំរៀនសូត្រ រស់នៅដោយភាពទៀងត្រង់ ហើយឈរការពារដោយក្លាហានចំពោះអ្វីដែលអ្នកដឹងថាត្រឹមត្រូវ—បើទោះបីជាអ្នកត្រូវឈរតែម្នាក់ឯងក៏ដោយ ។
សេចក្តីពិតដ៏អស់កល្បជានិច្ច
ព្រះវរបិតាសួគ៌មានព្រះទ័យចង់ឲ្យបុត្រា និងបុត្រីរបស់ទ្រង់រៀនសូត្រជានិច្ច ។ អ្នកមានហេតុផលទាំងខាងសាច់ឈាម និងខាងវិញ្ញាណក្នុងការស្វែងរក និងស្រឡាញ់ការរៀនសូត្រ ។ ការអប់រំមិនមែនគ្រាន់តែអំពីការរកប្រាក់ប៉ុណ្ណោះនោះទេ ។ ការអប់រំគឺជាផ្នែកមួយនៃគោលដៅដ៏អស់កល្បជានិច្ចរបស់អ្នកដើម្បីប្រែក្លាយកាន់តែដូចជាព្រះវរបិតាសួគ៌ ។
ការរស់នៅដោយទៀងត្រង់មានន័យថា អ្នកស្រឡាញ់អ្វីដែលត្រឹមត្រូវនៅក្នុងព្រះនេត្ររបស់ព្រះ—ច្រើនជាងអ្នកស្រឡាញ់ ការកម្សាន្តចិត្ត ផ្ទាល់ខ្លួន ប្រជាប្រិយភាព ឬ ភាពងាយស្រួល ។ វាមានន័យថា ការធ្វើអ្វីដែលត្រឹមត្រូវ ដោយសារវាជារឿងដែលត្រឹមត្រូវ ។
អ្នកមានអ្វីមួយដែលមានតម្លៃដើម្បីចែកចាយ ។ ដំណឹងល្អនៃព្រះយេស៊ូវគ្រីស្ទមានចម្លើយចំពោះសំណួរនៃជីវិត ។ វាគឺជាផ្លូវទៅរកសេចក្តីសុខសាន្ត និងសុភមង្គល ។ អ្នកប្រហែលជាមិនដឹងអ្វីៗគ្រប់យ៉ាងនោះទេ ប៉ុន្តែអ្នកដឹងគ្រប់គ្រាន់ល្មមដើម្បីស្រឡាញ់អ្នកជិតខាងរបស់អ្នក ចែកចាយគោលការណ៍ពិតជាមួយពួកគេ ហើយអញ្ជើញពួកគេឲ្យស្វែងយល់បន្ថែម ។
ការអញ្ជើញ
សូមធ្វើជាមនុស្សដែលរៀនសូត្រជានិច្ច ។ សូមស្វែងរកឱកាសដើម្បីពង្រីកគំនិត និងជំនាញរបស់អ្នក ។ ឱកាសទាំងនេះអាចរួមបញ្ចូលការអប់រំជាផ្លូវការនៅសាលា ឬការបណ្តុះបណ្តាលវិជ្ជាជីវៈ ក៏ដូចជាការរៀនក្រៅផ្លូវការមកពីប្រភពដែលអ្នកទុកចិត្តបានផងដែរ ។ សូមយាងព្រះអម្ចាស់ឲ្យមានចំណែកនៅក្នុងការខិតខំរបស់អ្នក ហើយទ្រង់នឹងដឹកនាំអ្នក ។
រៀនពីសេចក្តីពិតខាងវិញ្ញាណ នៅពេលអ្នករៀនអំពីពិភពលោកនៅជុំវិញអ្នក សូមរៀនផងដែរអំពីព្រះអង្គសង្គ្រោះដែលបានបង្កើតពិភពលោកនេះ ។ សូមសិក្សាអំពីព្រះជន្ម និងការបង្រៀនរបស់ទ្រង់ ។ សូមធ្វើឲ្យថ្នាក់សិក្ខាសាលា ថ្នាក់វិទ្យាស្ថាន និងការសិក្សាដំណឹងល្អផ្ទាល់ខ្លួនក្លាយជាផ្នែកមួយនៃការសិក្សាពេញមួយជីវិតរបស់អ្នក ។ វាអាចរៀបចំអ្នកដើម្បីបម្រើបេសកកម្ម និងចែកចាយដំណឹងល្អពេញមួយជីវិតរបស់អ្នក ។
រស់នៅដោយទៀងត្រង់ ។ កុំលួច កុំកុហក កុំបោកប្រាស់ ឬបោកបញ្ឆោតតាមមធ្យោបាយណាមួយឡើយ—ទាំងនៅសាលារៀន កន្លែងធ្វើការ តាមអនឡាញ នៅគ្រប់ទីកន្លែង ។ សូមធ្វើជាអ្នកដើរតាមព្រះយេស៊ូវគ្រីស្ទដ៏ស្មោះត្រង់ដូចគ្នាទាំងនៅទីសាធារណៈ និងទីឯកជន ។
ពរជ័យទាំងឡាយដែលបានសន្យា
ការអប់រំបង្កើនសមត្ថភាពរបស់អ្នកដើម្បីបម្រើព្រះអម្ចាស់ រួមទាំងជាអ្នកផ្សព្វផ្សាយសាសនាផងដែរ ។ វាផ្តល់អំណាចឲ្យអ្នកក្នុងការផ្ដល់ពរដល់អ្នកដទៃ ជាពិសេសគ្រួសាររបស់អ្នក ។ ដរាបណាអ្នករៀនកាន់តែច្រើន នោះអ្នកក៏កាន់តែអាចជួយស្ថាបនានគររបស់ព្រះ និងមានឥទ្ធិពលលើពិភពលោកសម្រាប់ការល្អផងដែរ ។
ភាពស្មោះត្រង់នាំមកនូវសេចក្តីសុខសាន្ត និងការគោរពចំពោះខ្លួនឯង ។ នៅពេលពាក្យសម្ដី និងសកម្មភាពរបស់អ្នកស្របនឹងសេចក្ដីពិត នោះអ្នកបង្ហាញថាអ្នកជាមនុស្សអាចទុកចិត្តបានពីមនុស្សដទៃ និងដោយព្រះអម្ចាស់ ។
នៅពេលអ្នកក្រោកឈរឡើងការពារការបង្រៀនរបស់ព្រះយេស៊ូវគ្រីស្ទ នោះទ្រង់ឈរជាមួយអ្នក ។ ព្រះយេស៊ូវគ្រីស្ទគឺជាកម្លាំងរបស់អ្នក ! អ្នកផ្សេងទៀតប្រហែលជាមិនយល់ស្របជាមួយជំនឿរបស់អ្នក ប៉ុន្តែភាពក្លាហាន និងភាពស្មោះត្រង់របស់អ្នកនឹងត្រូវបានមើលឃើញ ។ មិនថាអ្នកផ្សេងទៀតធ្វើតាមគំរូរបស់អ្នកឬអត់នោះទេ ទីបន្ទាល់ ទំនុកចិត្ត និងជំនឿលើព្រះគ្រីស្ទរបស់អ្នកនឹងរីកចម្រើនឡើង ។
សំណួរ និងចម្លើយ
តើវាខុសទេដែលមានសំណួរអំពីសាសនាចក្រ ? តើខ្ញុំអាចរកឃើញចម្លើយដោយរបៀបណា ? ការមានសំណួរគឺមិនមែនជាសញ្ញានៃភាពទន់ខ្សោយ ឬខ្វះសេចក្តីជំនឿនោះទេ ។ តាមពិតទៅ ការសួរសំណួរអាចជួយស្ថាបនាសេចក្តីជំនឿបាន ។ ការស្តារឡើងវិញនៃដំណឹងល្អបានចាប់ផ្តើមនៅពេល យ៉ូសែប ស្ម៊ីធ ដែលមានវ័យ ១៤ ឆ្នាំ បានសួរសំណួរដោយសេចក្តីជំនឿ ។ សូមស្វែងរកចម្លើយនៅក្នុងព្រះគម្ពីរ នៅក្នុងប្រសាសន៍របស់ព្យាការីរបស់ព្រះ មកពីថ្នាក់ដឹកនាំ និងឪពុកម្តាយដ៏ស្មោះត្រង់របស់អ្នក និងពីព្រះអង្គទ្រង់ផ្ទាល់ ។ ប្រសិនបើចម្លើយមិនមកភ្លាមៗទេ សូមទុកចិត្តថាអ្នកនឹងរៀនមួយបន្ទាត់ម្តងៗ ។ សូមបន្តរស់នៅតាមអ្វីដែលអ្នកដឹងរួចហើយ ហើយបន្តស្វែងរកសេចក្តីពិត ។
តើខ្ញុំអាចក្រោកឈរឡើងការពារអ្វីដែលត្រឹមត្រូវដោយមិនធ្វើឲ្យអ្នកដែលមានជំនឿផ្សេងអាក់អន់ចិត្តដោយរបៀបណា ? សូមចាប់ផ្តើមដោយធ្វើឲ្យប្រាកដថាពាក្យសម្ដី និងសកម្មភាពរបស់អ្នកត្រូវបានបំផុសគំនិតដោយសេចក្ដីស្រឡាញ់ចំពោះព្រះ និងបុត្រាបុត្រីរបស់ទ្រង់ ។ ការចែកចាយដំណឹងល្អមិនគួរធ្វើឡើងក្នុងវិញ្ញាណនៃការទាស់ទែងនោះទេ ប៉ុន្តែដោយភាពច្បាស់លាស់ ស្លូតបូត និងសប្បុរសវិញ ។ អ្នកអាចមានក្តីស្រឡាញ់ចំពោះអ្នកដទៃ ទោះបីអ្នកមិនយល់ស្របនឹងទស្សនៈរបស់ពួកគេក៏ដោយ ។ ចូរធ្វើជាគំរូដ៏ល្អនៃអ្នកដើរតាមព្រះយេស៊ូវគ្រីស្ទ តាមរបៀបដែលអ្នករស់នៅ ។
សូមើល ម៉ាថាយ ៥:១៤–១៦ ( សូមឲ្យពន្លឺអ្នកបានភ្លឺឡើង ) យ៉ូហាន ១៤:៦ ( ព្រះយេស៊ូវគឹជាសេចក្តីពិត ) ពេត្រុស ទី១ ៣:១៥ ( សូមត្រៀមខ្លួនដើម្បីចែកចាយសេចក្តីសង្ឃឹមរបស់អ្នកនៅក្នុងព្រះគ្រីស្ទ ) គោលលទ្ធិ និងសេចក្តីសញ្ញា ៨៨:៧៧–៨០ ( អ្វីៗដែលព្រះអម្ចាស់ចង់ឲ្យយើងរៀន ) ៨៨:១១៨ ( ស្វែងរកប្រាជ្ញាចេញពីសៀវភៅដែលល្អៗបំផុត ) ៩៣:៣៦ ( សិរីល្អរបស់ព្រះគឺជាបញ្ញា ) ១២៤:១៥ ( សេចក្តីទៀងត្រង់មានន័យថាស្រឡាញ់អ្វីដែលត្រឹមត្រូវ ) ១៣០:១៨ ( បញ្ញារបស់យើងនឹងរះឡើងជាមួយយើង នៅពេលយើងរស់ឡើងវិញ ) ។
សំណួរទទួលប័ណ្ណចូលព្រះវិហារបរិសុទ្ធ
-
តើអ្នកព្យាយាមមានភាពស្មោះត្រង់នៅគ្រប់កិច្ចការដែលអ្នកធ្វើដែរឬទេ ?
-
តើអ្នកគាំទ្រ ឬលើកកម្ពស់ដល់ការបង្រៀន ការអនុវត្ត ឬគោលលទ្ធិណាមួយដែលផ្ទុយទៅនឹងការបង្រៀន ការអនុវត្ត ឬគោលលទ្ធិរបស់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយដែរឬទេ ?