៧.
ពិធីបរិសុទ្ធ និងសេចក្តីសញ្ញាទំាងឡាយផ្ដល់ឲ្យអ្នកនូវសិទ្ធិទទួលបានពរជ័យរបស់ព្រះ
គោលលទ្ធិ និងសេចក្ដីសញ្ញា ៨៤:២០
ព្រះវរបិតាសួគ៌របស់អ្នកអន្ទះសារចង់បង្រៀន និងប្រទានពរដល់អ្នក ។ របៀបមួយដែលទ្រង់ធ្វើកិច្ចការនេះ គឺតាមរយៈពិធីបរិសុទ្ធដូចជា ពិធីបុណ្យជ្រមុជទឹក ពិធីបញ្ជាក់ និងពិធីសាក្រាម៉ង់ ។ តាមរយៈពិធីបរិសុទ្ធដូចនេះ យើងធ្វើសេចក្ដីសញ្ញា ឬការសន្យាមួយជាមួយនឹងព្រះ ។ ការរក្សាសេចក្ដីសញ្ញាបង្កើនព្រះចេស្ដារបស់ព្រះក្នុងជីវិតរបស់អ្នក និងជួយអ្នករៀបចំខ្លួនសម្រាប់ជីវិតដ៏នៅអស់កល្បជានិច្ច ។ នេះហើយជាមូលហេតុដែលពិធីបរិសុទ្ធ និងសេចក្ដីសញ្ញាមានតម្លៃចំពោះយើង—ពីព្រោះវាពង្រឹងទំនាក់ទំនងរបស់យើងជាមួយនឹងព្រះវរបិតាសួគ៌ និងព្រះអង្គសង្គ្រោះរបស់យើង ហើយជួយយើងឲ្យប្រែកាន់តែដូចទ្រង់ទាំងទ្វេ ។
សេចក្តីពិតដ៏អស់កល្បជានិច្ច
ពិធីបរិសុទ្ធចង្អុលបង្ហាញអ្នកទៅកាន់ព្រះយេស៊ូវគ្រីស្ទ ។ ពិធីបរិសុទ្ធមួយគឺជាពិធីដ៏ពិសិដ្ឋមួយដែលមានអត្ថន័យជានិមិត្តរូបដែលបង្រៀនអំពីព្រះយេស៊ូវគ្រីស្ទ ។ ឧទាហរណ៍ ពិធីសាក្រាម៉ង់មិនមែនគ្រាន់តែជានំប៉័ង និងទឹកប៉ុណ្ណោះទេ ។ វារំឭកយើងអំពីព្រះអង្គសង្គ្រោះ ។
សេចក្តីសញ្ញាគឺជាទីសម្គាល់នៃសេចក្តីស្រឡាញ់ ការទុកចិត្ត និងការរំពឹងទុករបស់ព្រះ ។ វាធ្វើឲ្យទំនាក់ទំនងរបស់អ្នកជាមួយព្រះកាន់តែស៊ីជម្រៅថែមទៀត ។ ការធ្វើសេចក្ដីសញ្ញាបង្ហាញថាអ្នកស្រឡាញ់ព្រះ ហើយស្មោះស្ម័គ្រចំពោះទ្រង់ ។ អ្នកអាចទុកចិត្តទ្រង់ ហើយទ្រង់អាចទុកចិត្តអ្នក ។ ជាមួយនឹងការតាំងចិត្តដ៏ស៊ីជម្រៅបែបនោះនាំមកនូវការទទួលបានព្រះចេស្ដា និងជំនួយរបស់ទ្រង់កាន់តែមហិមា នៅពេលអ្នករក្សាសេចក្ដីសញ្ញារបស់អ្នក ។
អ្នកធ្វើសេចក្តីសញ្ញាជាមួយព្រះ នៅពេលអ្នកបានទទួលពិធីបុណ្យជ្រមុជទឹក ហើយនៅពេលអ្នកទទួលទានសាក្រាម៉ង់ ។ នៅពេលអ្នកទទួលពិធីបុណ្យជ្រមុជទឹក នោះអ្នកសន្យាថានឹងលើកដាក់ព្រះនាមនៃព្រះយេស៊ូវគ្រីស្ទមកលើខ្លួនឯង បម្រើទ្រង់ ហើយរក្សាបទបញ្ញត្តិរបស់ទ្រង់ពេញមួយជីវិតរបស់អ្នក ។ នៅក្នុងអំឡុងពេលសាក្រាម៉ង់ អ្នកក៏សន្យាថានឹងចងចាំទ្រង់ជានិច្ចដែរ ។ ទាំងនេះគឺជាសន្យារបស់អ្នក ។ នៅពេលអ្នកស្ម័គ្រចិត្តរក្សាវា នោះព្រះសន្យាថានឹងប្រទានព្រះវិញ្ញាណបរិសុទ្ធដល់អ្នកជាគូកនជានិច្ច ។
ការអញ្ជើញ
សូមចាត់ទុកសាក្រាម៉ង់ដូចជាអំណោយទានដ៏ពិសិដ្ឋ ។ សូមបង្ហាញការផ្ដល់ភាពស្មោះស្ម័គ្ររបស់អ្នកចំពោះព្រះយេស៊ូវគ្រីស្ទ ដោយរៀបចំខ្លួនសម្រាប់បទពិសោធន៍ដ៏ពិសិដ្ឋក្នុងអំឡុងពេលពិធីសាក្រាម៉ង់ ។ សូមជញ្ជឹងគិតអំពីអ្វីដែលអ្នកអាចធ្វើបាន ដើម្បីធ្វើឲ្យពិធីបរិសុទ្ធនេះក្លាយជាចំណុចសំខាន់ខាងវិញ្ញាណក្នុងអំឡុងពេលសប្តាហ៍របស់អ្នក ។
សូមរកមើលព្រះអង្គសង្គ្រោះនៅក្នុងពិធីបរិសុទ្ធទាំងឡាយ ។ នៅពេលអ្នកមើល ឬចូលរួមនៅក្នុងពិធីបរិសុទ្ធ សូមសួរខ្លួនឯងថា « តើខ្ញុំរៀនអ្វីខ្លះអំពីព្រះយេស៊ូវគ្រីស្ទមកពីពិធីបរិសុទ្ធនេះ ? ឬ « តើវានាំឲ្យខ្ញុំកាន់តែខិតទៅជិតទ្រង់ដោយរបៀបណា ? » សូមយកចិត្តទុកដាក់ចំពោះអ្វីដែលព្រះវិញ្ញាណបង្រៀនដល់អ្នក ។
សូមឲ្យសេចក្តីសញ្ញារបស់អ្នកដឹកនាំការប្រព្រឹត្តរបស់អ្នក ។ នៅពេលអ្នកធ្វើការជ្រើសរើស សូមចងចាំពីទំនាក់ទំនងនៃសេចក្តីសញ្ញារបស់អ្នកជាមួយព្រះ ។ សូមស្មោះត្រង់ចំពោះទ្រង់ ។ សូមសួរខ្លួនអ្នក ៖ តើការណ៍នេះស្របតាមសេចក្ដីសញ្ញារបស់ខ្ញុំដែរឬទេ ? ឧទាហរណ៍ តើខ្ញុំស្រឡាញ់ និងផ្ដល់ការងារបម្រើដល់អ្នកដទៃ កម្សាន្តទុក្ខដល់អស់អ្នកណាដែលត្រូវការការកម្សាន្តទុក្ខ ហើយឈរជាសាក្សីដល់ព្រះគ្រីស្ទ—នៅគ្រប់ទីកន្លែង និងជានិច្ចដែរឬទេ ?
ពរជ័យទាំងឡាយដែលបានសន្យា
អ្នកមានអំណាចដើម្បីយកឈ្នះលើ ការល្បួង អំពើបាប និងការសាកល្បងនៃជីវិត ។ ការធ្វើ និងការរក្សាសេចក្ដីសញ្ញាផ្ដល់សិទ្ធិឲ្យអ្នកទទួលបានព្រះចេស្ដារបស់ព្រះ ។ ជាមួយនឹងអំណាចនោះ អ្នកអាចប្រឈមមុខនឹងអ្វីទាំងអស់ដោយទំនុកចិត្ត ។ ព្រះយេស៊ូវគ្រីស្ទគឺជាកម្លាំងរបស់អ្នក !
អ្នកអាចបានស្អាតស្អំ និងអត់ទោសឲ្យ ។ ផ្នែកមួយនៃការសន្យារបស់ព្រះចំពោះអ្នកសម្រាប់ការរក្សាសេចក្ដីសញ្ញានៃពិធីបុណ្យជ្រមុជទឹករបស់អ្នកគឺជាការផ្ដាច់បាបរបស់អ្នក ។ នោះមានន័យថា នៅពេលអ្នកប្រែចិត្ត ហើយរក្សាការសន្យារបស់អ្នកជាមួយព្រះ ទ្រង់នឹងអត់ទោសឲ្យអ្នក ហើយជួយអ្នកឲ្យប្រសើរឡើង ។
អ្នក អាចមានព្រះវិញ្ញាណបរិសុទ្ធគង់នៅជាមួយអ្នកជានិច្ច ។ ការសន្យាមួយទៀតដែលភ្ជាប់ទៅនឹងពិធីបុណ្យជ្រមុជទឹក និងសាក្រាម៉ង់ គឺភាពជាដៃគូដ៏ខ្ជាប់ខ្ជួននៃព្រះវិញ្ញាណរបស់ទ្រង់ និងការបម្រើដល់ទេវតា ។ អ្នកមិនចាំបាច់ត្រូវប្រឈមមុខនឹងការប្រឈមទាំងឡាយតែម្នាក់ឯងនោះទេ ។ ព្រះមិនដែលបោះបង់ចោលបុត្រាបុត្រីនៃសេចក្ដីសញ្ញារបស់ទ្រង់ទេ—អ្នកអាចទុកចិត្តបាន ។
អ្នកអាចមានការគាំទ្រពីរាស្ដ្រនៃសេចក្ដីសញ្ញារបស់ព្រះ ។ អ្នកជាសមាជិកនៃសហគមន៍រាស្រ្តនៃសេចក្តីសញ្ញានៅក្នុងសាសនាចក្ររបស់ព្រះអង្គសង្គ្រោះ ។ អ្នកលើកស្ទួយ និងលើកទឹកចិត្តគ្នាទៅវិញទៅមក ។ អ្នកទួញយំជាមួយគ្នា ហើយត្រេកអរជាមួយគ្នា ។ អ្នករែកបន្ទុកគ្នាទៅវិញទៅមក ។ គ្រួសារ ប៊ីស្សព ថ្នាក់ដឹកនាំរបស់អ្នក និងសមាជិកសាសនាចក្រផ្សេងទៀតនៅចាំជួយអ្នក ហើយអ្នកអាចជួយពួកគេ ។
សំណួរ និងចម្លើយ
តើខ្ញុំអាចធ្វើជាអ្នកដើរតាមព្រះយេស៊ូវគ្រីស្ទដ៏ល្អម្នាក់ដោយគ្មានពិធីបរិសុទ្ធ និងសេចក្ដីសញ្ញាបានទេ ? មានមនុស្សល្អជាច្រើនដែលដើរតាមព្រះយេស៊ូវគ្រីស្ទដោយស្មោះសរ ទោះបីជាពួកគេមិនដែលបានទទួលពិធីបុណ្យជ្រមុជទឹក ឬមិនបានទៅព្រះវិហារបរិសុទ្ធក៏ដោយ ។ ទោះជាយ៉ាងណាក៏ដោយ ព្រះវរបិតាសួគ៌ចង់ឲ្យបុត្រាបុត្រីគ្រប់រូបរបស់ទ្រង់ទទួលពិធីបរិសុទ្ធរបស់ទ្រង់ ហើយធ្វើសេចក្តីសញ្ញាជាមួយទ្រង់ ដើម្បីពួកគេអាចមានសិទ្ធិទទួលបានជំនួយ សេចក្ដីមេត្តាករុណា និងកម្លាំងរបស់ទ្រង់កាន់តែច្រើន ។ នោះហើយជាមូលហេតុចម្បងមួយដែលព្រះយេស៊ូវគ្រីស្ទបានស្ដារសាសនាចក្ររបស់ទ្រង់ឡើងវិញ ! បុត្ររបស់ព្រះគ្រប់រូបនឹងមានឱកាស—នៅក្នុងជីវិតនេះ ឬជីវិតបន្ទាប់—ដើម្បីទទួលយកពិធីបរិសុទ្ធ និងសេចក្ដីសញ្ញាដែលតម្រូវឲ្យមានសម្រាប់ជីវិតដ៏នៅអស់កល្បជានិច្ច ។
ខ្ញុំមិនបានស្មោះត្រង់ចំពោះសេចក្តីសញ្ញារបស់ខ្ញុំជានិច្ចនោះទេ ។ តើខ្ញុំមានសង្ឃឹមដែរឬទេ ? មាន ! ដំណឹងល្អនៃព្រះយេស៊ូវគ្រីស្ទ គឺជាដំណឹងល្អនៃសេចក្តីសង្ឃឹម និងការចាប់ផ្ដើមថ្មី! នេះហើយជាមូលហេតុដែលយើងទទួលទានសាក្រាម៉ង់ជារៀងរាល់សប្ដាហ៍ ។ ព្រះវរបិតាសួគ៌បានជ្រាបថា យើងនឹងធ្វើខុស ហើយត្រូវការការចាប់ផ្តើមថ្មីមួយ ។ ព្រះអង្គសង្គ្រោះបានប្រទានព្រះជន្មរបស់ទ្រង់ ដើម្បីបើកផ្លូវឲ្យអ្នកត្រឡប់ទៅស្ថានសួគ៌វិញ ។ នៅពេលអ្នកអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្ត នោះអ្នកអាចមានសិទ្ធិទទួលបានព្រះចេស្ដារបស់ព្រះឡើងវិញ ។
សូមមើល កូរិនថូស ទី១ ១១:២៣–២៦ ( ការទទួលទានសាក្រាម៉ង់បង្ហាញថា យើងជឿលើព្រះយេស៊ូវគ្រីស្ទ និងដង្វាយធួនរបស់ទ្រង់ ); ម៉ូសាយ ១៨:១០, ១៣ ( សេចក្តីសញ្ញានៃពិធីបុណ្យជ្រមុជទឹក ); គោលលទ្ធិ និងសេចក្តីសញ្ញា ១៣ ( បព្វជិតភាពអើរ៉ុនរួមបញ្ចូលទាំងកូនសោនៃការប្រែចិត្ត ពិធីបុណ្យជ្រមុជទឹក និងការងារបម្រើរបស់ពួកទេវតា ); ២០:៣៧ ( តម្រូវការសម្រាប់ពិធីបុណ្យជ្រមុជទឹក ); ២០:៧៧, ៧៩ ( ការអធិស្ឋានសាក្រាម៉ង់ ) ។
សំណួរសម្ភាសន៍ទទួលប័ណ្ណចូលព្រះវិហារបរិសុទ្ធ
-
តើអ្នកព្យាយាមដើម្បីរក្សាថ្ងៃឈប់សម្រាកឲ្យបរិសុទ្ធ ទាំងនៅក្នុងគេហដ្ឋាន និងនៅសាសនាចក្រ ចូលរួមការប្រជុំរបស់អ្នក រៀបចំខ្លួន និងមានភាពស័ក្ដិសមទទួលទានសាក្រាម៉ង់ ហើយរស់នៅក្នុងជីវិតរបស់អ្នកស្របទៅតាមក្រឹត្យវិន័យ និងបទបញ្ញត្តិទាំងឡាយនៃដំណឹងល្អដែរឬទេ ?