១.
ផែនការរបស់ព្រះគឺសម្រាប់អ្នក
មុនពេលអ្នកមកផែនដី អ្នកបានរស់នៅជាមួយនឹងបិតាមាតាសួគ៌ារបស់អ្នក ។ អ្នកគឺជាបុត្រជាទីស្រឡាញ់របស់ទ្រង់ទាំងទ្វេ ។ នៅស្ថានសួគ៌ អ្នកបានរៀនអំពីផែនការរបស់ព្រះសម្រាប់គ្រួសាររបស់ទ្រង់ ។ អ្នកបានទទួលផែនការនេះដោយក្តីអំណរ ព្រោះវានឹងជួយអ្នកឲ្យលូតលាស់ និងរីកចម្រើនដើម្បីប្រែក្លាយដូចជាព្រះ តាមរយៈការទទួលបានរូបកាយ ដែលជាផ្នែកមួយនៃគ្រួសារនៅលើផែនដី និងបទពិសោធន៍ជីវិតនៅលើផែនដី ។ បទពិសោធន៍ទាំងនេះមួយចំនួនអាចពិបាក ។ ព្រះបិតារបស់យើងបានជ្រាបដឹងអំពីការណ៍នេះ ដូច្នេះហើយដោយជាផ្នែកនៃផែនការរបស់ទ្រង់ ទ្រង់បានបញ្ជូនព្រះអង្គសង្គ្រោះមួយអង្គ គឺព្រះយេស៊ូវគ្រីស្ទមកជួយអ្នក។ យើងហៅផែនការនេះថា ផែនការនៃសេចក្ដីសង្គ្រោះ ឬផែនការនៃសុភមង្គល ។
សេចក្តីពិតដ៏អស់កល្បជានិច្ច
ព្រះវរបិតាសួគ៌គឺជាមេផ្ដើមនៃផែនការនេះ ។ ទ្រង់ជាព្រះវរបិតានៃវិញ្ញាណរបស់អ្នក ហើយទ្រង់ស្រឡាញ់អ្នក ។ ទ្រង់ចង់ប្រទានពរជ័យដ៏អស្ចារ្យបំផុតរបស់ទ្រង់ដល់អ្នក—ជីវិតដ៏នៅអស់កល្បជានិច្ចជាមួយទ្រង់ ។ និយាយម្យ៉ាងទៀត ទ្រង់ចង់ឲ្យអ្នកប្រែក្លាយដូចជាទ្រង់កាន់តែខ្លាំងឡើង ហើយរស់នៅក្នុងជីវិតប្រកបដោយអំណរ និងរុងរឿងដែលទ្រង់មាន ។ ទ្រង់មានគ្រប់ទាំងព្រះចេស្តា និងជ្រាបគ្រប់ការណ៍ទាំងអស់ ។ អ្នកអាចទុកចិត្តលើទ្រង់ ទោះជាពេលជីវិតមានការលំបាកក៏ដោយ ។
ព្រះយេស៊ូវគ្រីស្ទធ្វើឲ្យផែនការនេះអាចធ្វើទៅបាន ។ ពីមុនផែនដីបានបង្កើតឡើង ព្រះវរបិតាសួគ៌បានជ្រើសរើសទ្រង់ដើម្បីធ្វើជាព្រះអង្គសង្គ្រោះរបស់យើង ។ ព្រះយេស៊ូវគ្រីស្ទគឺជាអង្គតែមួយអង្គគត់ដែលអាចនាំអ្នកត្រឡប់ទៅព្រះវរបិតាដែលគង់នៅស្ថានសួគ៌របស់អ្នកវិញ ។ នេះហើយជាមូលហេតុដែលយើងជ្រើសរើសដើរតាមទ្រង់ ។ អ្វីៗទាំងអស់អាស្រ័យទៅលើជម្រើសនោះ !
អាពាហ៍ពិពាហ៍ និងគ្រួសារគឺសំខាន់ចំពោះផែនការរបស់ព្រះ ។ អ្នកគឺជាផ្នែកមួយនៃគ្រួសាររបស់ព្រះ ហើយបុត្រាបុត្រីខាងវិញ្ញាណរបស់ទ្រង់ទាំងអស់មកផែនដីតាមរយៈម្តាយ និងឪពុក ។ ព្រះសព្វព្រះទ័យចង់ឲ្យបុត្រី និងបុត្រារបស់ទ្រង់រីកចម្រើនជាមួយគ្នាឆ្ពោះទៅរកភាពល្អឥតខ្ចោះដ៏អស់កល្បជានិច្ច ។ បុរសនិងស្ត្រីម្នាក់ៗចូលរួមចំណែកស្មើគ្នាក្នុងអាពាហ៍ពិពាហ៍ដែលពេញដោយក្តីស្រឡាញ់ និងរួបរួម ។ ជីវិតគ្រួសារនៅលើផែនដី—ទោះជាជីវិតគ្រួសារមិនមានភាពឥតខ្ចោះទាំងអស់ក៏ដោយ—ក៏ជីវិតគ្រួសារអាចនាំមកនូវអំណរយ៉ាងខ្លាំងដែរ ។ វាមានន័យដើម្បីជួយរៀបចំអ្នកសម្រាប់ជីវិតដ៏នៅអស់កល្បជានិច្ចជាមួយព្រះ ។
ការអញ្ជើញ
រក្សាទស្សនវិស័យដ៏អស់កល្បមួយ ។ នៅពេលណាដែលអ្នកប្រឈមមុខនឹងការល្បួង ការសាកល្បង ការខកចិត្ត ឬជម្រើសពិបាកៗ សូមរំឭកខ្លួនអ្នកអំពីផែនការរបស់ព្រះ ។ សូមមើលពីរបៀបដែលសេចក្តីពិតដ៏អស់កល្បជានិច្ចដែលអ្នកដឹងអំពីផែនការរបស់ទ្រង់អាចជួយអ្នកឲ្យមើលឃើញបញ្ហាប្រឈមរបស់អ្នកខុសគ្នា ។
រកមើលព្រះហស្ដរបស់ព្រះក្នុងជីវិតរបស់អ្នក ។ កត់សម្គាល់របៀបដែលព្រះកំពុងប្រទានពរដល់អ្នក ។ វាអាចជាទង្វើដ៏សប្បុរសមួយមកពីនរណាម្នាក់ គ្រានៃសេចក្តីសុខសាន្ត ឬចម្លើយចំពោះការអធិស្ឋាន ។
ជ្រើសរើសធ្វើតាមផែនការរបស់ព្រះ ។ ស្វែងយល់អំពីអ្វីដែលព្រះវរបិតាសួគ៌របស់អ្នកចង់ឲ្យអ្នកធ្វើ ។ ស្វែងរកការណែនាំរបស់ទ្រង់ខណៈដែលអ្នកសិក្សាព្រះគម្ពីរ ប្រសាសន៍របស់ព្យាការីដែលនៅរស់ ការប្រកាសអំពីក្រុមគ្រួសារ និងពរជ័យអយ្យកោ ។ ការណ៍នេះនឹងជួយអ្នករៀបចំខ្លួនដើម្បីបម្រើព្រះអម្ចាស់ ក្នុងនាមជាអ្នកផ្សព្វផ្សាយសាសនា និងពេញមួយជីវិតរបស់អ្នក ។ ធ្វើការបម្រើដល់ព្រះអម្ចាស់ អាពាហ៍ពិពាហ៍ដ៏អស់កល្បជានិច្ច និងដាក់អាទិភាពខ្ពស់ក្នុងការចិញ្ចឹមកូនៗ ។ ធ្វើផ្នែករបស់អ្នកដើម្បីមានគ្រួសារដ៏រីករាយឥឡូវនេះ ដោយធ្វើតាមការបង្រៀនរបស់ព្រះយេស៊ូវគ្រីស្ទ ។
ពរជ័យទាំងឡាយដែលបានសន្យា
អ្នកអាចប្រឈមមុខនឹងការសាកល្បងក្នុងជីវិតដោយភាពក្លាហាន និងក្តីសង្ឃឹមលើព្រះគ្រីស្ទ ។ ដោយសារអ្នកដឹងពីផែនការដ៏អស់កល្បជានិច្ចរបស់ព្រះ នោះអ្នកមានឧបករណ៍ដ៏មានតម្លៃដែលអាចជួយអ្នកក្នុងគ្រាលំបាកបាន ។ អ្នកដឹងថាជីវិតមានអ្វីៗជាច្រើនលើសពីអ្វីដែលកើតឡើងរវាងការកើត និងការស្លាប់ ។ អ្នកដឹងថាអ្នកជានរណា គោលបំណងរបស់អ្នកគឺជាអ្វី ហើយអ្នកអាចប្រែក្លាយជានរណា ដោយមានជំនួយពីព្រះអង្គសង្គ្រោះ ។ ព្រះយេស៊ូវគ្រីស្ទគឺជាកម្លាំងរបស់អ្នក !
អ្នកអាចទទួលជីវិតដ៏នៅអស់កល្បជានិច្ច នៅពេលអ្នកធ្វើតាមព្រះយេស៊ូវគ្រីស្ទ ។ ទ្រង់នឹងប្រទានឲ្យអ្នកនូវអំណាចដើម្បីប្រែក្លាយកាន់តែដូចជាទ្រង់ ត្រឡប់ទៅរកមាតាបិតាសួគ៌របស់អ្នកវិញ ហើយរស់នៅដោយអំណរជាមួយមនុស្សជាទីស្រឡាញ់របស់អ្នកដ៏អស់កល្បជានិច្ច ។ ទុកចិត្តលើព្រះយេស៊ូវគ្រីស្ទ ។
សំណួរ និងចម្លើយ
ហេតុអ្វីបានជាពេលខ្លះជីវិតមានការលំបាកខ្លាំងម៉្លេះ ? តើខ្ញុំអាចទទួលបានកម្លាំងដោយរបៀបណា ? បទពិសោធន៍របស់អ្នកក្នុងជីវិតនេះ—សូម្បីតែរឿងលំបាកបំផុត—ក៏អាចសម្រាប់សេចក្តីល្អរបស់អ្នកដែរ ។ វាអាចជួយអ្នកឲ្យលូតលាស់ និងរីកចម្រើននៅពេលអ្នកងាកទៅរកព្រះអង្គសង្គ្រោះ ។ ដោយសារការពលិកម្មដ៏ធួនរបស់ទ្រង់ គ្មានអ្វីដែលអ្នកកំពុងឆ្លងកាត់ ដែលព្រះយេស៊ូវគ្រីស្ទមិនយល់បាននោះទេ ។ ទ្រង់ជ្រាបដឹង យ៉ាងច្បាស់ពីរបៀបដើម្បីជួយអ្នក ។ សូមផ្តោតជីវិតរបស់អ្នកលើទ្រង់ ហើយទ្រង់នឹងលើកអ្នកឲ្យខ្ពស់លើសការសង្ស័យ និងការភ័យខ្លាចទាំងអស់ ។
ពេលខ្លះ គំនិតនៃសុភមង្គលក្នុងគ្រួសារ និងអាពាហ៍ពិពាហ៍ហាក់ដូចជានៅឆ្ងាយ ។ តើខ្ញុំអាចស្វែងរកទំនុកចិត្តដោយរបៀបណា ? មិនថាស្ថានភាពរបស់អ្នកបែបណានោះទេ សូមកុំបោះបង់ផែនការរបស់ព្រះវរបិតាសួគ៌ឡើយ ។ ទ្រង់នឹងពុំបោះបង់អ្នកចោលឡើយ ។ ប្រសិនបើអ្នកស្មោះត្រង់ចំពោះព្រះអង្គសង្គ្រោះ និងសេចក្តីសញ្ញារបស់អ្នក នោះអ្នកនឹងរកឃើញចម្លើយនៅក្នុងការបង្រៀនរបស់ព្រះយេស៊ូវគ្រីស្ទ ។ ទ្រង់ជ្រាបយល់គ្រប់យ៉ាងដែលអ្នកជួបប្រទះ ។ តាមរយៈទ្រង់ នោះអ្នកនឹងទទួលបានកម្លាំងដើម្បីគោរពតាមបទបញ្ញត្តិរបស់ព្រះ ហើយទទួលបានពរជ័យដែលទ្រង់សន្យា ។ សូមទុកចិត្តលើទ្រង់ និងដំណឹងល្អរបស់ទ្រង់ ។
សូមមើល នីហ្វៃទី២ ៩:១៣ ( ឱ ផែនការរបស់ព្រះអស្ចារ្យណាស់ហ្ន៍ ! ); ម៉ូសាយ ២:៤១ ( អស់អ្នកដែលគោរពតាមបទបញ្ញត្តិទាំងឡាយ អាចរស់ជាមួយព្រះដោយមានសុភមង្គលដ៏មិនចេះចប់មិនចេះហើយឡើយ ); អាលម៉ា ១២:២៨–៣៤ ( ព្រះបានធ្វើឲ្យផែនការនៃការប្រោសលោះដឹងដល់បុត្រាបុត្រីរបស់ទ្រង់ ); អ័ប្រាហាំ ៣:២២–២៦ ( ផែនការរបស់ព្រះរួមទាំងការបញ្ជូនយើងមកកាន់ផែនដី ដែលជាកន្លែងដែលយើងអាចជ្រើសរើសខ្លួនយើងដើម្បីធ្វើតាមបទបញ្ញត្តិរបស់ទ្រង់ ) ។
សំណួរសម្ភាសន៍ទទួលប័ណ្ណចូលព្រះវិហារបរិសុទ្ធ
-
តើអ្នកមានសេចក្តីជំនឿ និងទីបន្ទាល់ទៅលើព្រះជាព្រះវរបិតាដ៏អស់កល្ប ជាព្រះរាជបុត្រារបស់ទ្រង់ ព្រះយេស៊ូវគ្រីស្ទ និងព្រះវិញ្ញាណបរិសុទ្ធដែរឬទេ ?