ធ្វើការជ្រើសរើសដែលបំផុសគំនិត

នៅក្នុង ដើម្បីកម្លាំងនៃយុវជន អ្នកនឹងរកឃើញការបង្រៀនជាច្រើនរបស់ព្រះយេស៊ូវគ្រីស្ទ និងពួកព្យាការីរបស់ទ្រង់ ។ ដោយមានសេចក្តីពិតទាំងនេះទុកជាការណែនាំរបស់អ្នក នោះអ្នកអាចធ្វើការជ្រើសរើសដែលបំផុសគំនិតដែលនឹងផ្តល់ពរដល់អ្នកនាពេលឥឡូវនេះ និងរហូតដល់ភាពអស់កល្បជានិច្ច ។

អ្នកគឺជាបុត្រខាងវិញ្ញាណជាទីស្រឡាញ់របស់ព្រះ ។ ផែនការនៃសុភមង្គលដ៏មហិមារបស់ទ្រង់ធ្វើឲ្យអ្នកអាចរីកចម្រើនខាងវិញ្ញាណ និងអភិវឌ្ឍសក្ដានុពលដ៏ទេវភាពរបស់អ្នក ។ ទ្រង់បានបញ្ជូនព្រះយេស៊ូវគ្រីស្ទដើម្បីធ្វើជាព្រះអង្គសង្រ្គោះរបស់អ្នក ។

ព្រះវរបិតាដែលគង់នៅស្ថានសួគ៌របស់អ្នកទុកចិត្តលើអ្នក ។ ទ្រង់បានប្រទានពរជ័យដ៏អស្ចារ្យដល់អ្នក រួមទាំងភាពពេញលេញនៃដំណឹងល្អ និងពិធីបរិសុទ្ធ និងសេចក្ដីសញ្ញាដ៏ពិសិដ្ឋ ដែលចងភ្ជាប់អ្នកទៅនឹងទ្រង់ ហើយនាំព្រះចេស្តារបស់ទ្រង់មកក្នុងជីវិតរបស់អ្នក ។ ជាមួយនឹងសេចក្ដីសញ្ញាទាំងនេះក៏នាំមកនូវអំណរ និងការទទួលខុសត្រូវបន្ថែមផងដែរ ។ ទ្រង់ជ្រាបដឹងថាអ្នកអាចធ្វើឲ្យមានភាពខុសប្លែកនៅក្នុងពិភពលោក ហើយនៅករណីជាច្រើនក៏តម្រូវឲ្យអ្នកធ្វើអ្វីដែលខុសពីពិភពលោកនេះផងដែរ ។ សូមស្វែងរកការណែនាំពីព្រះវរបិតាសួគ៌របស់អ្នក នៅពេលអ្នកធ្វើការជ្រើសរើស ។ ទ្រង់នឹងប្រទានពរឲ្យអ្នកនូវការបំផុសគំនិត តាមរយៈព្រះវិញ្ញាណបរិសុទ្ធ ។

ព្រះយេស៊ូវគ្រីស្ទគឺជាផ្លូវទៅកាន់អំណរដ៏អស់កល្បជានិច្ច ។ នៅពេលអ្នកប្រើសេរីភាពរបស់អ្នកដើម្បីធ្វើតាមព្រះយេស៊ូវគ្រីស្ទ នោះអ្នកនៅលើផ្លូវដែលដឹកនាំទៅរកសុភមង្គលដ៏អស់កល្បជានិច្ច ។ សូមធ្វើឲ្យព្រះយេស៊ូវគ្រីស្ទគឺជាបទដ្ឋានរបស់អ្នក គឺជាគ្រឹះដ៏រឹងមាំរបស់អ្នក ។ សូមស្ថាបនាជីវិតរបស់អ្នកនៅលើការបង្រៀនទាំងឡាយរបស់ទ្រង់ ហើយថ្លឹងថ្លែងការជ្រើសរើសរបស់អ្នកតាមរយៈការបង្រៀនទាំងនេះ ។ សេចក្ដីសញ្ញាដែលអ្នកធ្វើនៅឯពិធីបុណ្យជ្រមុជទឹក អំឡុងពេលសាក្រាម៉ង់ និងនៅក្នុងព្រះវិហារបរិសុទ្ធ គឺជាស្នូលដ៏រឹងមាំរបស់អ្នកនៅក្នុងព្រះគ្រីស្ទ ។ អ្នកនឹងនៅតែប្រឈមមុខនឹងការពុះពារ និងការល្បួងទាំងឡាយ ប៉ុន្តែព្រះវរបិតាសួគ៌ និងព្រះអង្គសង្គ្រោះនឹងជួយអ្នកឲ្យឆ្លងផុតអ្វីៗទាំងនោះ ។

គោលបំណងនៃ ដើម្បីកម្លាំងនៃយុវជន មិនមែនដើម្បីផ្តល់ឲ្យអ្នកនូវ « បាទ/ចាស » ឬ « អត់ទេ » អំពីការជ្រើសរើសដែលអាចកើតមានដែលអ្នកត្រូវប្រឈមមុខនោះទេ ។ ផ្ទុយទៅវិញ ព្រះអម្ចាស់កំពុងអញ្ជើញអ្នកឲ្យរស់នៅក្នុងរបៀបដែលកាន់តែខ្ពង់ខ្ពស់ និងកាន់តែបរិសុទ្ធ—ដែលជាជីវិតដែលផ្ដោតលើសេចក្ដីពិតដ៏អស់កល្បជានិច្ច និងពរជ័យដែលព្រះអម្ចាស់បានសន្យា ។ នេះគឺជារបៀបរបស់ទ្រង់ ។ សេចក្តីណែនាំនេះនឹងបង្រៀនអ្នកអំពីមាគ៌ារបស់ទ្រង់ ។ វាពន្យល់ពីសេចក្តីពិតដែលទ្រង់បានបើកសម្តែង ។ សូមធ្វើឲ្យសេចក្តីពិតទាំងនេះក្លាយជាការណែនាំរបស់អ្នកដើម្បីធ្វើការជ្រើសរើស—ការជ្រើសរើសធំៗ ដូចជា ការធ្វើសេចក្តីសញ្ញានៅក្នុងព្រះវិហារបរិសុទ្ធ និងការបម្រើបេសកកម្ម ក៏ដូចជាការជ្រើសរើសប្រចាំថ្ងៃ ដូចជារបៀបប្រព្រឹត្តចំពោះមនុស្ស ឬរបៀបចំណាយពេលវេលារបស់អ្នកផងដែរ ។

ខណៈដែលអ្នកផ្សេងទៀតអាចជួយអ្នកបាន នោះការរីកចម្រើនខាងវិញ្ញាណរបស់អ្នកគឺជារឿងផ្ទាល់ខ្លួន ។ វាគឺជាជម្រើសរបស់អ្នក ។ សូមធ្វើឲ្យអស់ពីសមត្ថភាពរបស់អ្នកដើម្បីកែលម្អជារៀងរាល់ថ្ងៃ កាន់តាមបទបញ្ញត្តិរបស់ព្រះ និងគោរពសេចក្តីសញ្ញារបស់អ្នក ហើយជួយអ្នកដទៃឲ្យខិតទៅជិតព្រះអង្គសង្គ្រោះ ។

សូមមើល ម៉ូសាយ ៤:២៩–៣០ ( ផ្លូវនៃអំពើបាបមានច្រើនរាប់មិនអស់ ដូច្នេះយើងត្រូវប្រុងប្រយ័ត្ន ) ហេលេមិន ៥:១២ ( សង់គ្រឹះរបស់អ្នកនៅលើព្រះគ្រីស្ទ ) គោលលទ្ធិ និងសេចក្តីសញ្ញា ៤៥:៥៧ ( យកព្រះវិញ្ញាណបរិសុទ្ធធ្វើជាអ្នកណែនាំរបស់អ្នក ) ២៥:១៣ ( នៅជាប់នឹងសេចក្តីសញ្ញារបស់អ្នក ) ។

របៀបដែលសេចក្តីណែនាំនេះបានរៀបចំឡើង

ប្រធានបទនីមួយៗមានបីផ្នែក ៖

សេចក្តីពិតដ៏អស់កល្បជានិច្ច ឬគោលលទ្ធិនៃដំណឹងល្អរបស់ព្រះយេស៊ូវគ្រីស្ទដែលបានស្តារឡើងវិញ
ការអញ្ជើញ ដើម្បីឲ្យធ្វើសកម្មភាពតាមសេចក្តីពិតទាំងនោះ
ពរជ័យដែលបានសន្យា ដែលព្រះអម្ចាស់ប្រទានដល់អ្នកទាំងឡាយណាដែលរស់នៅតាមការបង្រៀនរបស់ទ្រង់