សារលិខិតមកពីគណៈប្រធានទីមួយ
ក្មួយៗប្រុសស្រីជាទីស្រឡាញ់
យើងស្រឡាញ់ក្មួយៗ ហើយមានទំនុកចិត្តលើក្មួយៗ ។ ក្មួយៗពិតជាស្ថិតក្នុងចំណោមវិញ្ញាណជម្រើសរបស់ព្រះវរបិតាសួគ៌ ដែលបានបញ្ជូនមកផែនដីនៅពេលនេះ ដើម្បីធ្វើកិច្ចការសំខាន់ៗ ។
ក្មួយៗរឹងមាំ និងមានសមត្ថភាពជាងក្មួយៗបានដឹងទៅទៀត ។ ហើយនៅពេលដែលក្មួយៗពឹងផ្អែកលើព្រះអង្គសង្គ្រោះ នោះកម្លាំងរបស់ក្មួយៗកាន់តែរឹងមាំ ។ ទ្រង់គឺជា « កម្លាំងនៃយុវជន » ។
សេចក្តីណែនាំនេះនឹងជួយក្មួយៗស្ថាបនាគ្រឹះដ៏រឹងមាំដើម្បីធ្វើការជ្រើសរើសបន្តនៅលើផ្លូវដែលដឹកនាំទៅរកជីវិតដ៏នៅអស់កល្បជានិច្ច ។ វានឹងជួយក្មួយៗឲ្យរៀបចំខ្លួនធ្វើសេចក្តីសញ្ញាដ៏ពិសិដ្ឋនៅក្នុងព្រះវិហារបរិសុទ្ធ រៀបចំខ្លួនដើម្បីបម្រើបេសកកម្ម និងស្វែងរកអំណរក្នុងការធ្វើតាមព្រះយេស៊ូវគ្រីស្ទពេញមួយជីវិតរបស់ក្មួយៗ ។ ក្មួយៗមានកន្លែងដ៏សំខាន់នៅក្នុងសាសនាចក្ររបស់ទ្រង់ ។ ព្រះយេស៊ូវគ្រីស្ទនឹងជួយក្មួយៗបំពេញគោលបំណងរបស់ទ្រង់សម្រាប់ក្មួយៗ ។
យើងដឹងថាព្រះនៅមានព្រះជន្មរស់ ។ វាគឺជាការអធិស្ឋានរបស់យើងសូមឲ្យក្មួយៗនឹងស្ថិតនៅលើផ្លូវនៃសេចក្ដីសញ្ញាកាន់តែរឹងមាំ—ជាផ្លូវនៃការធ្វើ និងការរក្សាសេចក្ដីសញ្ញាដ៏ពិសិដ្ឋជាមួយនឹងព្រះ ។ នោះហើយគឺជាផ្លូវដែលដឹកនាំទៅកាន់ព្រះបិតាដែលគង់នៅស្ថានសួគ៌របស់ក្មួយៗវិញ ។ នៅពេលដែលក្មួយៗធ្វើដូច្នោះ នោះក្មួយៗនឹងក្លាយជាឥទ្ធិពលសម្រាប់សេចក្តីល្អ ចែកចាយដំណឹងល្អប្រកបដោយអំណរ ប្រមូលផ្ដុំបុត្រាបុត្រីរបស់ព្រះ និងរៀបចំពិភពលោកសម្រាប់ការយាងមកជាលើកទីពីររបស់ព្រះអង្គសង្គ្រោះ ។ សូមចងចាំ ៖ ព្រះយេស៊ូវគ្រីស្ទគឺជាកម្លាំងរបស់ក្មួយៗ !
គណៈប្រធានទីមួយ