៣.
អ្នកអាចជួយនៅក្នុងកិច្ចការរបស់ព្រះ
ព្រះវរបិតាសួគ៌ ស្រឡាញ់បុត្រាបុត្រីទាំងអស់របស់ទ្រង់ ។ ទ្រង់ចង់ជួយពួកគេរកឃើញសុភមង្គល និងអំណរ ត្រឡប់ទៅរកទ្រង់វិញ និងទទួលបានជីវិតដ៏នៅអស់កល្បជានិច្ច ។ កិច្ចការនេះត្រូវបានហៅថាកិច្ចការនៃការសង្គ្រោះ និងភាពតម្កើងឡើងរបស់ទ្រង់ ហើយទ្រង់អញ្ជើញអ្នកឲ្យជួយ !
សេចក្តីពិតដ៏អស់កល្បជានិច្ច
កិច្ចការ និងសិរីល្អរបស់ព្រះ គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ច ។ អមតភាពគឺជាការរស់នៅជារៀងរហូតជាមួយនឹងរូបកាយដែលបានរស់ឡើងវិញ ។ ជីវិតដ៏នៅអស់កល្បជានិច្ច ឬភាពតម្កើងឡើងគឺជាការប្រែក្លាយកាន់តែដូចជាព្រះ ហើយរស់នៅជាមួយទ្រង់ជាក្រុមគ្រួសារដ៏អស់កល្បជានិច្ច ។ អ្វីៗទាំងអស់នេះអាចកើតឡើងបានដោយសារតែព្រះយេស៊ូវគ្រីស្ទ និងពលិកម្មរបស់ទ្រង់ ។ យើងអាចទុកចិត្តលើទ្រង់ ។
អ្នកអាចជួយនៅក្នុងកិច្ចការរបស់ព្រះ ដោយការមករកព្រះគ្រីស្ទ ហើយការជួយអ្នកដទៃឲ្យធ្វើដូចគ្នា ។ រាល់ពេលដែលអ្នកធ្វើអ្វីមួយដើម្បីជួយនរណាម្នាក់ធ្វើតាមព្រះយេស៊ូវគ្រីស្ទ នោះអ្នកកំពុងជួយនៅក្នុងកិច្ចការរបស់ព្រះហើយ ។
ការអញ្ជើញ
រស់នៅតាមដំណឹងល្អ ។ ស្ថាបនាសេចក្ដីជំនឿរបស់អ្នកលើព្រះយេស៊ូវគ្រីស្ទ ។ ប្រែចិត្តជារៀងរាល់ថ្ងៃ ។ ទទួលពិធីបរិសុទ្ធនៃបព្វជិតភាពរបស់ព្រះ និងរក្សាសេចក្តីសញ្ញារបស់អ្នក ។ ធ្វើឲ្យការណ៍នោះក្លាយជាគំរូនៅពេញមួយជីវិតរបស់អ្នក ។
ការមើលថែដល់អ្នកខ្វះខាត ។ ស្វែងរករបៀបដើម្បីបម្រើ និងផ្ដល់ការងារបម្រើដល់អ្នកដទៃ រួមទាំងគ្រួសាររបស់អ្នក មិត្តភក្តិរបស់អ្នក និងសហគមន៍របស់អ្នកផងដែរ ។ របៀបដ៏ល្អមួយដើម្បីជួយមនុស្សដែលខ្វះខាតគឺការគោរពច្បាប់ការតមអាហារ និងការថ្វាយដង្វាយតមអាហារ ។
ការអញ្ជើញមនុស្សទាំងអស់ឲ្យទទួលយកដំណឹងល្អ ។ សូមឲ្យពាក្យសំដី និងសកម្មភាពរបស់អ្នកបង្ហាញពីសេចក្តីជំនឿរបស់អ្នកទៅលើព្រះយេស៊ូវគ្រីស្ទ ។ ចូរត្រៀមខ្លួនប្រាប់នរណាម្នាក់ដែលសួរអ្នកអំពីសេចក្តីសង្ឃឹម និងសុភមង្គលដែលអ្នកដឹងក្នុងនាមជាសិស្សរបស់ទ្រង់ ។ សម្រាប់ក្រុមយុវជន ការបម្រើបេសកកម្មពេញម៉ោងគឺជាការទទួលខុសត្រូវផ្នែកបព្វជិតភាព ។ សម្រាប់ក្រុមយុវនារី វាគឺជាឱកាសដ៏មានឥទ្ធិពលមួយ សូមអធិស្ឋានដើម្បីដឹងថាតើព្រះអម្ចាស់នឹងឲ្យអ្នកបម្រើឬទេ ។ រៀបចំខ្លួនចែកចាយដំណឹងល្អពេញមួយជីវិតរបស់អ្នក ។
បង្រួបបង្រួមក្រុមគ្រួសារសម្រាប់ភាពអស់កល្បជានិច្ច ដោយការធ្វើកិច្ចការពង្សប្រវត្តិ និងព្រះវិហារបរិសុទ្ធ ។ រៀនអំពីជីដូនជីតារបស់អ្នក ។ ស្វែងរកថាតើនរណាត្រូវការពិធីបរិសុទ្ធនៃព្រះវិហារបរិសុទ្ធ ។ ទៅព្រះវិហារបរិសុទ្ធឲ្យបានញឹកញាប់តាមដែលអ្នកអាចធ្វើបាន ដើម្បីទទួលបុណ្យជ្រមុជទឹក និងទទួលពិធីបញ្ជាក់សម្រាប់ពួកគាត់ ។ ប្រសិនបើអ្នកត្រូវការជំនួយ សូមចូលទៅកាន់ FamilySearch.org.
ពរជ័យទាំងឡាយដែលបានសន្យា
អ្នកនឹងមានជំនួយរបស់ព្រះ ។ ព្រះវរបិតាសួគ៌មិនរំពឹងថាអ្នកធ្វើកិច្ចការនេះតែម្នាក់ឯងនោះទេ ។ ទ្រង់គង់ជាមួយនឹងអ្នក ។ នៅពេលអ្នកថ្វាយពេលវេលា និងដួងចិត្តរបស់អ្នកដោយរាបទាប នោះទ្រង់នឹងធ្វើកិច្ចការដ៏អស្ចារ្យទាំងឡាយតាមរយៈអ្នក ។ ព្រះយេស៊ូវគ្រីស្ទគឺជាកម្លាំងរបស់អ្នក !
អ្នកនឹងបានពោរពេញទៅដោយអំណរ ។ កិច្ចការរបស់ព្រះគឺជាកិច្ចការពេញដោយអំណរ ! នៅពេលអ្នកធ្វើផ្នែកនៅក្នុងកិច្ចការនេះ នោះអ្នកអាចទទួលអារម្មណ៍នៃអំណរដែលទ្រង់ទទួល ។ សូមស្រមៃពីអំណរដែលអ្នកនឹងមានជាមួយព្រះវរបិតាសួគ៌ និងបុត្រាបុត្រីរបស់ទ្រង់ ជាមនុស្សដែលអ្នកនាំ ទៅកាន់ទ្រង់ !
សំណួរ និងចម្លើយ
តើព្រះពិតជាប្រើប្រាស់ខ្ញុំនៅក្នុងកិច្ចការរបស់ទ្រង់ឬ ? ប្រាកដណាស់ ! មានរបៀបជាច្រើនដែលដើម្បីជួយនៅក្នុងកិច្ចការនេះ ។ វាហាក់ដូចជាមនុស្សផ្សេងទៀតមានទេពកោសល្យ ឬមានជំនាញជាងអ្នក ប៉ុន្តែព្រះវរបិតាសួគ៌របស់អ្នកទតឃើញសក្ដានុពលបស់អ្នក ។ ទ្រង់បានប្រទានអំណោយទានជាច្រើនដល់អ្នក ដែលអ្នកអាចប្រើដើម្បីបម្រើ និងប្រមូលផ្ដុំបុត្រាបុត្រីរបស់ទ្រង់ ។ វាមិនថ្វីទេ ប្រសិនបើអំណោយទានទាំងនេះខុសពីអ្វីដែលមនុស្សផ្សេងមាន ។ តាមពិតនោះហើយជាមូលហេតុដែលអំណោយទានរបស់អ្នកគឺមានតម្លៃខ្លាំងណាស់ ។ អ្នកសំខាន់ !
សូមមើល ម៉ាថាយ ១០:៣៩ ( ប្រសិនបើអ្នកបាត់ជីវិតនៅក្នុងការបម្រើរបស់ព្រះអង្គសង្រ្គោះ នោះអ្នកនឹងបានមកវិញ ); កូរិនថូស ទី១ ១២:១៤–២៧ ( សមាជិកទាំងអស់គ្នាគឺសំខាន់នៅក្នុងរូបកាយនៃព្រះគ្រីស្ទ ); ភីលីព ១:៦ ( ចូរមានទំនុកចិត្តថាព្រះកំពុងធ្វើការជាមួយអ្នក ); យ៉ាកុប ៥:៧២ ( ព្រះអម្ចាស់នៃចម្ការទំពាំងបាយជូរធ្វើការជាមួយអ្នក ); គោលលទ្ធិ និងសេចក្តីសញ្ញា ១៨:១៥–១៦ ( អំណររបស់អ្នកនឹងមហិមាណាស់ជាមួយអស់អ្នកដែលអ្នកនាំមកកាន់ព្រះគ្រីស្ទ ); ៦៤:៣៣–៣៤ ( កិច្ចការដ៏ធំចេញពីការណ៍ដ៏តូចតាច និងងាយ ); ម៉ូសេ ១:៦ ( « យើងមានកិច្ចការសម្រាប់អ្នក » ); ៦:៣១–៣៤ ( ព្រះធ្វើឲ្យអ្នកដែលទ្រង់ហៅមានភាពស័ក្តិសម ទោះបីជាពួកគេមានអារម្មណ៍ថាមិនមានលក្ខណសម្បត្តិគ្រប់គ្រាន់ក៏ដោយ ) ។
សំណួរសម្ភាសន៍ទទួលប័ណ្ណចូលព្រះវិហារបរិសុទ្ធ
-
តើអ្នកមានទីបន្ទាល់អំពីការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទដែរឬទេ ?