Ibada na maagano ya hekaluni hukupa ufikiaji mkubwa zaidi kwenye baraka za Mungu

Endaumenti ni zawadi ya maarifa na nguvu. Katika ibada za endaumenti ya hekaluni, unajichukulia jina la Mwokozi juu yako mwenyewe kwa ukamilifu zaidi. Unaahidi kumtii Mungu, kujitolea dhabihu ya kufanya mapenzi Yake, kuishi injili ya Yesu Kristo, kutii sheria ya usafi wa kimwili, na kuweka wakfu—au kujitolea kwa dhati—maisha yako na vyote ambavyo Mungu amekupa kwa Kanisa Lake. Hizi ni ahadi zako. Mungu anaahidi kukubariki kwa ufahamu mkubwa, ulinzi, na ufikiaji wa nguvu Zake. Yeye pia anaahidi kukupa uzima wa milele pamoja Naye. Kama sehemu ya endaumenti, unapokea fursa takatifu ya kuvaa gamenti ya ukuhani mtakatifu. Gamenti ni ishara ya Yesu Kristo na ukumbusho wa maagano yako ya hekaluni.

Kuunganishwa hekaluni kunawaunganisha wanandoa na familia milele. Katika ibada ya kuunganishwa hekaluni, wewe na mwenza wako mtafanya agano na Mungu na ninyi kwa ninyi. Mtaahidi kuwa watiifu kikamilifu kwa Mungu na ninyi kwa ninyi, kupendana na kutumikiana, na kufanya kazi pamoja ili kutii sheria za Mungu. Hii ni ahadi yenu. Mungu anaahidi kwamba uhusiano wako na mwenza wako na watoto wako unaweza kudumu milele. Yeye pia anaahidi kwamba unaweza kupokea utukufu wa juu zaidi pamoja Naye katika ufalme wa selestia unaposhika maagano yako. Baraka hii inaitwa kuinuliwa.

Daima kuwa na kibali cha hekaluni. Kutana na mshiriki wa uaskofu wako ili kupokea kibali. Atakuuliza maswali kuhusu jinsi unavyoishi viwango vya Bwana kwa ajili ya kuingia katika nyumba Yake takatifu. Rejelea maswali haya mara kwa mara. (Unaweza kuyapata katika kiambatisho cha mwongozo huu.) Hata kama unaishi mbali na hekalu, acha kibali chako kiwe ishara ya upendo wako kwa Bwana na ahadi yako ya kuishi viwango Vyake.

Rejea hekaluni mara nyingi kadiri uwezavyo. Ukiwa na kibali chako cha hekaluni, unaweza kuingia katika nyumba ya Bwana na kubatizwa na kuthibitishwa kwa niaba ya mababu zako, ili nao waweze kupokea baraka ulizopewa. Chukua nafasi ya kila fursa ya kuwa hekaluni. Mtafute Bwana katika nyumba Yake. Mtafute Yeye katika ibada, ishara, na Roho unayemhisi. Utampata.

Jiandae kufanya maagano katika nyumba ya Bwana. Mojawapo ya njia bora ya kufanya hivyo ni kushika agano lako la ubatizo. Lifanye kuwa mojawapo ya malengo yako ya kuongoza kupokea ibada za hekaluni na kuwa mshika maagano wa maisha yote. Anza sasa kuishi sheria utakazoahidi kutii hekaluni: utiifu kwa amri za Mungu, dhabihu, injili ya Yesu Kristo, usafi wa kimwili, na kuweka wakfu. Familia yako, askofu, na viongozi wengine wa Kanisa wanaweza kukusaidia.

Unaweza kuwa zaidi kama Yesu Kristo. Atakusaidia kuwa mfuasi mkubwa wa haki. Ibada na maagano ya hekaluni vitakufundisha jinsi ya kuingia katika uwepo wa Mungu na kupokea uzima wa milele pamoja Naye.

Utakuwa umejikinga kwa nguvu za Mungu. Maagano ya hekaluni huja na ahadi kwamba nguvu na utukufu wa Mungu vitakuwa juu yako. Malaika zake watakulinda.

Muda hekaluni utakuunganisha kwa karibu zaidi na Yesu Kristo na Roho Mtakatifu. Utahisi amani na pumziko la Mungu. Utaisikia sauti Yake kwa uwazi zaidi. Mbingu zitakufungukia, na utaelewa vyema njia Zake. Utakuwa na nguvu kubwa ya kukabiliana na changamoto zako kwa sababu moyo wako umeunganishwa na Wake.