Mungu anataka kuwasiliana nawe

Roho anakuongoza kwa Baba wa Mbinguni na Yesu Kristo. Huo ni wajibu muhimu wa Roho Mtakatifu. Yeye pia atakupa mwongozo wa kiungu wa kutubu na kumfuata Yesu Kristo ili uweze kupokea baraka za Upatanisho Wake. Unapotubu, Roho anakutakasa na kukusaidia kubadilika.

Roho Mtakatifu huzungumza kwenye akili na moyo wako. Jumbe kutoka kwa Roho zinaweza kuja akilini mwako kwa njia nyingi—kupitia mawazo yenye maongozi, maonyo, uelewa wa wazi, na kumbukumbu za kiroho. Roho Mtakatifu anaweza kuzungumza na moyo wako kupitia hisia za kuinua kama faraja, kujiamini, amani, upendo, shangwe, unyenyekevu, shukrani, na subira.

“Pokea Roho Mtakatifu.” Maneno haya yalizungumzwa wakati ulipothibitishwa kuwa muumini wa Kanisa la Kristo. Ni kwa jinsi gani unampokea Roho Mtakatifu? Kwa kutii mafundisho ya Yesu Kristo. Yeye ni nguvu yako. Kumfuata Yeye kunamwalika Roho Mtakatifu katika maisha yako.

Mtafute Baba yako wa Mbinguni katika sala. Mimina moyo wako Kwake. Mshukuru Yeye kwa baraka nyingi nzuri alizokupa. Shiriki Naye shangwe, wasiwasi, na maswali yako. Tulia na usikilize majibu Yake, ambayo yanaweza kuja kama hisia za amani, mawazo akilini mwako, au misukumo ya kufanya kitu.

Sikiliza sauti ya Mungu katika maandiko. Maandiko ni maneno ya Mungu kwako! Jifunze kutoka kwenye maandiko kila siku ili kuigundua sauti Yake na kuhisi upendo Wake. Unaposoma, tafakari kile ambacho Yeye anaweza kuwa anakufundisha, na andika misukumo inayokuja. Ifanye iwe tabia ya kila siku ya kujifunza maandiko—hasa Kitabu cha Mormoni—maisha yako yote.

Ifanyie kazi misukumo unayopokea. Kama una wazo au msukumo wa kufanya kitu cha ukarimu ambacho kitambariki mtu fulani, fanya hivyo! Mambo yote mazuri hutoka kwa Mungu. Mwonyeshe Baba yako wa Mbinguni kwamba Anaweza kukutumaini wewe kufuata misukumo kutoka Kwake.

Roho Mtakatifu atakufariji na kukuongoza. Yeye anajulikana kama Mfariji. Atakusaidia katika nyakati za majaribu. Atakusaidia kujua nini cha kusema au kufanya. Kwa ushawishi Wake, unaweza kueleza tofauti kati ya kile kilicho kweli na kile ambacho ni uongo. Anaweza kukusaidia kupata mazuri kwa wengine na ndani yako mwenyewe. Roho anaweza pia kukuonya juu ya hatari. Atakuongoza kuelekea kwa Yesu Kristo na mbali na dhambi.

Unaweza kupokea karama za roho. Kuna karama nyingi ambazo Mungu huwapa watoto Wake kupitia Roho Wake. Baadhi zilizotajwa katika maandiko zinajumuisha ufunuo, kuamini katika Yesu Kristo, kufundisha, utambuzi, na hekima. Omba ili umwulize Baba wa Mbinguni kuhusu karama za roho alizokupa, jinsi unavyoweza kuzikuza, na jinsi Anavyotaka uzitumie ili kuwabariki wengine.