Te Kairi n te O Tetemanti ni Butimwaea te Kinaaki mai Karawa

In the Beginning Was the Word [Imwain Karikan Bwaai bon Iai te Taeka], iroun Eva Timothy, e kona ni katotongaki ibukin tii kabonganakina n te Ekaretia.

N na kewe ngkana I tuangko bwa I tuai man titiraki ibukin tibwangau n ana baire te Atua.

N na kanga ngai—n arou n aki kororaoi—ni kona n rin n Ana baire ae kororaoi? N na kanga n tau ibukin anganakiu riki au tai mairoun Tamara are i Karawa n te tai teuana imwiin teuana? N na kanga n onimakinaki n tibwauan Ana tangira ma aomata ngkai n tabetai I koraki ni kan namakinna i bon irou?

Ngkana koa tia n rinanon kangaanga aika okioki, tiaki ti ngkoe n rinanona.

Teuana ana kamwane te kakaitara ae korakora bon buakanakin ara atatai ni kinaakira mai karawa. E reirei Unimwaane Brian K. Taylor man te Itingaun, “Te buaka ae korakora ibukin kinaakira ae mairoun te Atua e rikirake kauntaekakina, ngkai Tatan e a karikirakei anga ni kamwamwane bwa e na urui ara koaua ao ara atatai iaon irekerekera ma te Atua.”

Ti tekeraoi bwa, Tamara are i Karawa e a tia n reireiniira—ao e reitinako n reiakiniia—Natina ibukin kakaawakiia. Man te moan tai, aomata man koroboki aika a tabu a kona ni korakai ma tabeua titiraki aika titebo ma ake ti karekei ngkoe ao ngai n te bong aei.

Ngkai ko kamatebwai n te O Tetemanti n te ririki aei, ko kona n reiakina kinakim mai karawa man katitaboan aia taneiai aomata n koroboki aika a tabu nakon are bon oin maium. Ao tao ko kona ni karekei kaeka nakon titiraki aika a rangi ni kakaawaki inanon mwanangam:

Antai ngai?

Atam ao Ewa a mwaakena te moan tai ni kainnanon te aomata n ataa kinakiia mai karawa. Tamara are i Karawa e karikiia n oin katotongana, n anganiia bwa a na tararuaa te aba ao maan ni kabane ake iaona, ao e tuangiia bwa a na kamwaitiia natiia ao a na kaona te aonaaba (taraa Mote 2:26–28).

Ngkai ana kariki Atam ao Ewa, ko kona ni kakoroi nanon reirei naba akanne ni kinaakim i bon iroum. Bon ngkoe natin te Atua ao iai tibwangam mai karwaa ni karaoa nanon mwiiokoaki bwa te tia tararua ae wanawana ao ni katea te utu ae akea tokina.

Ngke a kana uaan te kai n ata te raoiroi ma te buakaka Atam ao Ewa, a teweakinako man te Onaroka are i Eten. E ngae ngke a teweakinako mai matan Tamara are i Karawa, n te maiu n rabwata ao n tamnei, E katauraoa te Tia Kamaiu bwa e na buokiia n tokanikai iaon te mate n rabwata ao n tamnei rinanon ana Mwakuri ni Kamaiu Iesu Kristo.

N ai aron Atam ao Ewa, kakaawakim e “korakora i matan te Atua” (Reirei ao Berita aika Tabu 18:10).

Karakinan Aberaam e kaineti reitakina nakon kinakira mai karawa. Te Uea e karaoa te berita ae akea tokina nakon Aberaam:

“Ao N na karaoiko ba te botanaomata ae ababaki, ao N na kakabaiako, ao N na kakanantoa aram; ao kona riki n ae e na kabaia te aba iai:

“Ao N na kakabaiaia akana taetae ni kakabaiako ao N a karekea kain ane karereantiko: ao a na bane utun aonaba ni kabaia iroum” (Karikan Bwai 12:2–3).

Imwiin ririki aika a bati n tataninga ma te onimaki, Aberaam ao Taara a kakabwaiaaki ni bungiakin natiia te mwaane, ae Itaaka. Te Atua e tua nakon Aberaam bwa e na anga Itaaka bwa te karea are “ti te arona ma te Atua ngke e anga Natina are Te Rikitemanna” (Iakobo 4:5). Ngke e kaota tauraoina Aberaam ni karaoa te anga karea anne, e katokaki iroun ana anera te Uea

Ti warekia:

“I taetae n tuea i bon i Rou, bon ana taeka Iehova, ngkai ko a tia ni karaoa te baei n aki taua natim ae am rikitemanna:

“N na boni kabatia kabaiam, ao N na bon kabatiaia am kariki n ai aron itoini karawa, ao n ai aron tanon aon te bike; ao e na bain aia mataroa ana kairiribai am kariki;

“Ao a na bane botanaomatan aonaba ni kabaia iroun am kariki; ba kioina ngkai ko kan ongo bwanaau” (Karikan Bwai 22:16–18).

Te karaki ae korakora aei e reirei bwa ni kabane ake a karaoi ao a kawakin aia berita aika a tabu ma Tamara are i Karawa a kona ni karekei kakabwaia ake a taekinaki n te berita nakoia ana kariki Aberaam. Ngkai te nati n te berita ae tabu, ko kona ni karekei kakabwaia ake a taekinaki n te berita nakon Aberaam ngkai ko taui berita ake ko karaoi ma te Uea rinano te bwabetito ke berita n te tembora.

Nei Aka—ana toro Taara ao tinan Itimaera—e reirei arora ae tamaroa ni kona n teimatoa ni waaki nako. Imwiin bungiakin Itaaka, are natin Aberaam ao Taara, Aka ao Itimaera a kanakoaki nakon te rereua (taraa Karikan Bwai 21:9–14).

Noorakin rawawatana ao ana bubuti ibukin maiun Itimaera, te Uea e kanakoa ana anera bwa e na karaua nanona: “Tai maku, ba E ongo bwanan te teei te Atua n te tabo ane e mena iai anne. Tei rake, tabeka te tei, ao taua I baim; ba N na karaoia ba te botanaomata ae ababaki” (Karikan Bwai 21:17–18).

E ngae ngke Aka e namakinna bwa ai ti ngaia n te rereua, Tamara are i Karawa e aki kitanna. E katanaki ao e anganaki te kaniwanga ibukin ana onimaki ao ana beku mwaaka.

N ai aron Aka, ko kona n namakinna bwa kanga ko a ririaki n te rereua n ti ngkoe. Ma ko bon rang ni kakaawaki iroun Tamara are i Karawa. Ko kona ni bua inanon te rereua n te tai teuana, ma E aki mwaninga taekam. E a katauraoiko bwa kona karaoi bwaai aika a korakora ibukin katean Abanueana.

Mote e weteaki iroun Tamara are i Karawa bwa e na kainaomataia kain Iteraera man te tautoronaki i Aikubita. E karaoi rinanin kakai aika korakora are e kairi nakon birinakoia (taraa Te Otinako 7; 14).

E ngae ngke e tokanikai ni weteana, n tainako e aki rangi n onimakina konabwaina Mote ni karaoi baike e tuangnga Tamara are i Karawa. Ngkana e kaota ana namakin Mote n aki tau, e kaeka te Uea, “N na boni memena i roum; ao aio te kanikina nako im, ngkai I kanakoko: ngkana ko a tia ni kaotinakoia aomata akekei mai Aikubita, ao kam na toro iroun te Atua iaon te maunga aei.” (Te Otinako 3:12).

Mote e butimwaea kinakina ae natin te Atua ao e karekei mwaakan Tamara are i Karawa ni karaoi iai Ana kakai. N aron Mote, ko kona ni kareke mwaakan te Atua ni karaoi ana mwakuri te Atua ngkai ko butimwaea reitakim ae akea tokina ma Tamara are i Karawa.

Ngaia are, antai ngkoe?

Ngkai am tai ni kakaea te kaeka i bon ibukim.

Ukeuke ni koroboki aika tabu ibukin kaekaan am titiraki, kona kunei. Tamara are i Karawa e tangiriko bwa kona ota raoi bwa antai ngkoe bwa ko aonga n tangiriko i bon iroum n arona ngkai E tangiriko.

Ataakin rikim mai karwa ae akea tokina e rangi ni kaan—ngaia are tera ae ko taningaia?