“Iotebwa te I-Arimataia: Naano aika Raraoi ao Ana Kakai te Atua,” Liahona, Maati. 2026.
A Kinaa te Tia Kamaiu
Iotebwa are te I Arimataia: Naano aika Raraoi ao Ana Kakai te Atua
Antai Iotebwa te I-Arimataia, ao tera ae ti kona n reiakinna man tabena ni karakinan te Itita?
Kamataata n te tamnei iroun Laura Serra, e tabu katotongana
Iotebwa te I-Arimataia e karaoa te mwakoro ae kakawaki ni karakinan te Itita, buoka te Uea ngkai E karekea te kabanea n nakoraoi n rongorongon te aomata. Ngke e tauraki Iesu Kristo n te kaibangaki, Iotebwa “e nako ni Birato n aki maku, ao e butia rabatan Iesu” (Mareko 15:43). Imwiin ae a mwaiti aika a kitana te Uea n ana tai ni bwarannano, tera ae karika tikun Iotebwa ao n iri n ana anga karea te Tia Kamaiu ae kakawaki?
E na taraa n ae e na kaitara ana kakaonimaki nakon arona ae te kauntira n te Tienite ae kaubwai, aia bootaki Iutaia a kainaki irouia tenaan Baritaio ao Tarukaio are a bane n iangoa Kristo bwa a na kamatea (taraa Mataio 27:1, 57). Irarikin anne, Iotebwa e karabaia ana reirei Kristo “ba e makuia Iutaia” (Ioane 19:38).
Ma, n tokina, a bane ni kakoauaaki aron ana kakaonimaki. E “aki ira nanon aia taeka ma aia makuri” are e ukoukora maiun te Tia Kamaiu (taraa Ruka 23:50–51). Ao imwiin maten te Tia Kamaiu, e ana te rabwata Ioteba ao e niria n te kunnikai ae itiaki ae te rinen ao e kawena i nanon ana ne ni mate ae boou (taraa Mataio 27:59–60; Ruka 23:52–53). Aio kakoroan nanon taeka ni burabeti are e na mena ruan Kristo ibuakoia aika kaubwai (taraa Itaia 53:9).
E a Tia n Uti
N anganakoan ruana ibukin taurakin te Tia Kamaiu, e ibuobuoki Iotebwa te I-Arimataia ni kakoroa nanon te taetae ni burabeti ao e katauraoa te kawai ibukin te kakoaua ae kamimi n Taurakin Iesu Kristo. N te kateniua ni bong imwiin Taurakina, taan iriira Kristo a kunea te rua bwa akea kanoana, ao bwanaan te anera e taekinna, “Akea ikai: bwa e a uti” (Mataio 28:6).
“Mangautin Iesu Kristo e kaoti kakoaua n rikina mai karawa ao bwa E a tia n tokanikai iaon bwaai ni kabane,” e reirei Unimwaane D. Todd Christofferson n te Kooram n Abotoro n te Tengaun ma Uoaman. “Mangautina e kaoti kakoaua bwa, ngkana ti kabaeaki ma Ngaia n te berita, ngaira naba ti kona n tokanikai iaon bwaai ni kabane ao n riki n ti teuana. Mangautina e kaoti kakoaua bwa Irouna, te aki mamate ao te maiu ae akea tokina a bon koaua.”
E bae n aki ataia Iotebwa bwai te bwai ae anga n te moan Itita e riaon nanona ni karinea Iesu Kristo. Ma te Uea e kabaongana nanon Iotebwa ae kororaoi bwa mwakoron ana kakai bwa e na riki bwa “te moa n uaa i buakoia aika matu” (1 I-Korinto 15:20), te moan aomata ae uti man te mate.
N aron Ioteba ae iai tabena ae kakawaki ae na karaoia, ngaira n tatabemaniira nako ti kona n riki bwa te bwai ni mwakuri ni bain Tamara are i Karawa. Ana babaire bon ibukira ni kabane, ao E na kainnanoi ara konabwai, ara atatai, ao arora ni kanakoraoa riki Ana mwakuri. Ti kona n uringa te rongorongo aei nte Itita aei, ao n ukora Iesu Kristo, n anga ara ibuobuoki ni karaoa ae ti kona ni karaoia ni katea Aban Ueana ao ni kariai ana kaaki bwa a na riki ni maiura.