Kaiabate te Ibonga ae Rietaata

N aki tabe ma tabena ae rianako, tiaki rang kinaa Kaiaba. E mwaneweaki ti ruaiwa taina n te Nu Tetemanti. E riki bwa te tia karika te rau imarenaia tenaan Iutaia ao Irom. Bon te Tarukaio, bon mwakoroia Iutaia n ana tai Kristo ae aki kakoaua ae iai te mangauti (taraa Mwakuri 23:8).

E taetae Kaiaba n tain te kauntira imwiin Kristo ngke e kamaiua Rataro man te mate, te kakai are e na kona ni karika te kangaanga nakoina ao tebeman riki Tarukaio ibukin aia koaua.

E baireia te kauntira bwa ngkana akea te bwai ae a karaoia ni kaeka nakon te kakai ae kinaaki aei, aomata a na kakoaua bwa Iesu bon te Metia, ae Ueaia Iutaia, “ao ane a na nako mai I-Rom n taua ara kawa ma ara botanaomata” (Ioane 11:48).

“Kai kam bangabwai,” E kaeka Kaiaba, “kam aki iango ba e riai i roura ba e na mate te aomata temanna i bukiia aomata, ao e na aki bora ni mate te botanaomata aei” (Ioane 11:49–50).

Te Abotoro Ioane e nora nanon te bwai are taekinna Kaiaba “tiaki ibukina: ma ngkai mataniwiia ibonga ae rietaata n te ririki arei, ao e taetae ni burabeti ba e nangi mate Iesu i bukin te botanaomata arei;

“Ao tiaki ti i bukin te botanoamata arei, ma E na botiia natin te Atua, ake a mae nako” (Ioane 11:51–52).

E a manga kaoti riki aran Kaiaba n te Nu Tetemanti ngke E titirakinaki Kristo imwain Taurakina.

“Ao e taku mataniwiia ibonga nako Ina, I titirakiniko I matan te Atua are maiu, ba Ko na tuangira ngkana te Kristo are Natin te Atua Ngkoe” (Mataio 26:63).

E kamatoa Iesu ae Ngaia bon natin te Atua: “Ngaia ane ko taku: Ao I tuangkami ba ane ka na nora Natin te Aomata i mwin aei ba E nako mai n nangini karawa” (Mataio 26:64). N ana kaeka nakon aei, Kaiaba e a manga aki kakoaua naba te Tia Kamaiu. “Ao mataniwiia ibonga ae rietaata e raea kunnikaina, ao e kangai, E bakanatua” (Mataio 26:65).

E ngae ngke n rokon te Tia Kamaiua te aonaaba, temanna are e a tia ni katabuaki bwa e na karaoa te kamaiu ibukin aia bure aomata ni kabane ao ni karawawataaki n aekan maraki, nanokawaki, ao karawawata n aekaia nako, Kaiaba e aki ataia ae Iesu bon ngaia te Kristo, ao e Kabuakaka.

E a manga taekinaki riki Kaiaba inanon te Baibara Mwakuri 4. E taekinaki n te rekooti aron te Abotoro Betero ni kamaiua te mwaane ae e toara ngke e bungiaki (taraa Mwakuri 3:1–8). Ngkanne, ngke ngaia ao Ioane a tataekina taekan Mangautin Kristo, a katikaki ni kabureaki iaan ana kaetieti te Tienite. A kabureaki n te tairiki anne ao ni uotaki nako matan te kauntira are e kaainaki iroun Kaiaba ao taman buuna, Annas, te ibonga ae rietaata mai imwaina. (Taraa Mwakuri 4:1–6; taraa naba Ioane 18:13.)

Ngke a titirakinaki bwa man antai ana kariaia ae a kamaiua iai te mwaane, e kaeka Betero: “Ao kam na bane n ataia, ma aomata aika Iteraera ni kabanea, ba e tei ni maiu teiaei n aran Iesu Kristo are te I-Natareta, are kam kamatea n te kaibangaki, are E a manga kautia te Atua mai buakoia maate, eng, e tei ni maiu teuaei i matami” (Mwakuri 4:10).

Aio ana kabanea n tai Kaiaba are e na butimwaea Kristo. Irarikin anne, te kauntira e kairoroa Betero ao Ioane. Ma aia kairoro anne e aki bita te koaua ae e maiu Kristo. (Taraa Mwakuri 4:13–22.)

Rinanon mwaakan ao ana kariaia Iesu Kristo, e kamaiua te aomata ae mwauku Betero. N aron naba aei, a kona n riki kakai n te bong aei rinanon ana nakoanibonga ae kaokaki Kristo ao rinanon te onimaki n Arana. Te reirei ae ti kona n reiakinna mairoun Kaiaba e bebete. E aki kakoaua Iesu bwa te Kristo, Natin te Atua, ma ti kona. Ngkana ti koaua Irouna, kanikina, bwaai aika kamiimi, ao kakai a na manga rimwi (taraa Mareko 16:17–18).