Nooria, Aio Ngai.

E berita te Uea bwa e na mwaiti aia kariki Aberaam ao Taara . Te kakabwaia anne e bon maan taina n roko, ke e bon roko n ana tai te Uea. E ngae n anne, te Uea e kataa ana onimaki Aberaam ngke e tuangnga bwa e na anga natina, Itaaka bwa te karea, te kakabwaia are a tia n tataroakinna ao n tataningaia n te tai ae rangi ni maan. Ti bae n tia ni wareka te rongorongo aei man koroboki aika tabu n te tai ae mwaiti, ma nningai are ko a tia iai n rinanon are e rinanona Aberaam?

E bon kangaanga iangoan ana namakin te karo imwain te mwioko anne. E ngae n anne, ana nanomwaaka Aberaam ni baireia bwa e na ongeaba e aki toki ni mimi nanou iai ngkai e katauraoia n nakon te maunga are Moria ao n anga te karea are e butiaki iai. Bon kaotan te tatauraoi n ira ana kantaninga Tamara are i Karawa, ana kaeka e teimatoa n tiku, “Bon aei ngai.” (Taraa Karikanbwai 22:1–2.)

Ni boon ana ongeaba, e kakabwaiaki ni kawakinan maiun Itaaka, n ai aron naba kakabwaia aika tamaroa ao akea tokiia i bon ibukina, ibukin Taara, ao ibukiia ana kariki (taraa Karikanbwai 22:15–18).

Ana Ongotaeka te Tia Kamaiu

N aki nanokokoraki, te banna ni katooto ae te kabanea n rietaata n te ongeaba ao te tatauraoi nakon Tamara are i Karawa e boboto iaon te Tia Kamaiu, Iesu Kristo. E kaota tatauraoina n ongeaba n roko nako aon te aba, ni bwabetitoaki, ni kaitiakaki ao ni kororaoi, ao n anga Maiuna bwa te karea ao ni katoka iaona te maraki, te rawawata, te mamaara, te bure, ao mateia Ana aomata, bwa E aonga n ata aron kamaiuakira n te iriko (taraa Aramwa 7:11–13).

E rangii ni korakora te bwai are e rinanona bwa, n te tai ae uarereke, e a titiraki ngkana iai te kawai are e na kona iai n nako mai irouna te mwangko ae mao. Imwiina e waekoa n taku, “ma akea au taeka ma e na tauaki am taeka” (Ruka 22:42)—n taekana teuana “Bon aei ngai”—ngaia are e kaota tatauraoina ni karaoa ana kantaninga te Tama.

Tina kanga ni kabwebwerakea te tatauraoi anne n anga “Bon aei ngai” ni kaekai bubuti ake e karaoi Tamara are i Karawa nakoira aika kain ana Ekaretia, ke n tabetai ni bon nakoira?

Bauro e reireiniia I-Rom, “Te tangira boni kakororaoan te Tua.” (I-Rom13:10). Ngkana ko tangiria ni kakaea te kibuntaeka are e na onea mwiin “kakororaoan te Tua,” I taku bwa te taeka ae ongeaba e na waekoa n roko n am iango. Riki, ti kona n taekinna bwa te tangira bon te ongeaba. Ao ngaia are ana taeka te Tia Kamaiu “Ngkana kam tangirai, ao kam na tou mwiin au tua” (Ioane 14:15) e bon rang koaua.

Ti kona ni kaeka ma “Bon aei ngai” ke, n ana taeka Nibwaai, “N na nako ao N na karaoi” (1 Nibwaai 3:7). N ara taetae n taai aikai, ti kona ni kangai, “O eng, I tauraoi ni karaoa te bwai are e tua Tamara are i Karawa, n aki taraia bwa tera.”

Te bwai are I tangira ni katuruturua, raoi, bon te reitaki n tangira te ongeaba, are nanona bwa ti ongeaba iroun te Tama ibukina bwa ti tangiria. I kakoaua bwa ngkana ti rineia bwa ti na ongeaba bon teuana te kawai ae ti kaota raoi iai ara tangira Nakoina. “E mate te onimaki ngkana akea ana mwakuri.” (Iakobo 2:26), ao i bon irou I taku bwa te tangira ibukin Tamara are i Karawa ao Iesu Kristo ao akea te ongeaba e na bon mate naba.

Tina kanga ni karikirakea ara tangira ibukina ao ara ongeaba Nakoina? E taku te Tia Kamaiu, “Ao aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia” (Ioane 17:3 Ataakin Iesu Kristo—ao, mai irouna, te Tama—e karekea nakoira bwa tina ata te tangira are a katauraoia ibukira ao bwaai ake akea kabotauakiia ake a tia ni karaoi ao ni manga karaoi ibukira, n raonaki ma taai ni kangaanga ake ti rinanona inanon maiura ae mamate. Ataakiia e biti nanora, ni karikia inanora bwa tina iriira ana banna ni katooto n ara mwakuri ao n tatauraoi n taekinna, n te taeka ao n te mwakuri “Bon aei Ngai.” Te tatauraoi aei e kaotaki n te nano ni kan wareki koroboki aika a tabu ke n taetaera nakon Tamara are i Karawa inanon ara tataro.

“Bon aei Ngai.” e kona n riki bwa ara kaeka nakon te wewete nakon te mition ke ni kona n rang n tabu n ongeaba nakon tuua n aron kawakinan mimitongin te Tabati, karineakiia ara karo, ke ukoukoran te maeka n te maiu ae itiaki n te rabwata. “Bon aei Ngai.” bon kaotana bwa ko teimatoa n taainako n raoniia ana reirei Kristo, e ngae ngke e kangaanga te anganano e ngae ngke e roko n te bwai ae ti rang n tangiria ke ni mwakuri korakora ibukina.

Te tatauraoi aei n ongeaba e bon rang kakaawaki, riki ni karinean te berita are ti karaoia ngke ti bwabetitoaki ke n rin n te tembora. Ko kona n iangoia bwa aekakira maiura ngkana ti teimatoa n iango “Bon aei Ngai.” Ngkai katokaan aran Kristo iaora ke n te aroa are tina Uringnga n taainako ao ni kawakin Ana tua nako? Kanakin te toa e kaoira bwa tina kaboua te motinnano anne, are e riai ni kaota ara mwakuri inanon te wiiki. Aron naba anne ngkana ti nakon te tembora ngkai ti karaoi ke n uringi ara berita aika a tabu ake ti karaoi ikekei.

I kauringa te marooro are I karaoia ma te taanga ae a tibwa mareaki ririki aika nako ngke I riki bwa te bitiobi. Te tairiki teuana, a maroroakina taekan kabwakaan te kabwianibwai ao e a reitinako ao ni moanna ni kabuebue.maroroakinana. Te buumwane e a rinanon te wiiki ae kangaanga, ao e tangiria ni kawakina te mwane are e karekea ibukin tabeua aia kabanemwane bon ibukiia. E ngae n anne, I uringi ana taeka te buuaine ae kairake ngke, imatan kainnabana, e taku, “Bitiobi, I tauraoi n aki karaoi kabanemwane akanne ao riki n aki amwarake, ngkana e riai, ma I tangiria ni kabwaka te kabwianibwai ao n ongeaba nakon te Uea.”

Ana kaeka te buuaine are e kairake ae riinga te nano “Bon aei Ngai.,” e kaotaki ma te kakoaua ae korakora n te aro are kainnabana ao ngai ti namakina korakoran te tamnei n te tai anne. N tokina, I aki ataia ngkana bon ngaia are e tangiria ke ibukina bwa e kairaki iroun buuna, ma te buumwane n tokin te tai e kabwaka ana kabwianibwai n te wiikente anne.

Te Tabati are imwiina, imwain te bootaki, te buumwane are e kairake e bubuti ngkana e kona n ti marooro teutana ma ngai. Ma moamoana are e kaokoro ma are n te wiiki are mai imwaina, e tuangai, “Bitiobi, ko ataia n te wiiki ae nako I kabwaka au kabwianibwai, ao I maaku bwa e na aki tau ara mwane ibukin te amwarake, ma I bon ti kan tuangko bwa n te wiiki aei ao ai uoua te tai mwaitin te raka ni mwane ibukin te amwarake are ti taneiai ni karekea. Bitiobi, bon te kakai, ao I tangiria n taainako n noori kakai akanne inanon maiu.” Irou, kanga ai aron are te mwaane ae kairake e tuangai, “Bitiobi, I tauraoi ni kaeka ma ‘Bon aei Ngai.’ nakon te bwai are e tuangai te Atua bwa N na karaoia.”

E taekinna, te Uea, e bae ngkana ti karaoa ae E taku (taraa Reirei ao Berita aika Tabu 82:10). Ko kakoauai matoan berita akanne?

Tao te kakabwaia e aki roko n ara tai ke n te aro are ti tangiria iai, ma I kakoaua nakoimi bwa te berita bon iai ao e koaua. E kainnanoa te tangira ibukina, ongeaba, te nano ni kan karaoa Ana kantaninga, ao ni maiuakinan ae ana reirei Iesu. E na buokiira ao e na kakabwaiaira bwa tina ota ao ni kawakin ara berita. N te aro anne, ngkana E tuangiira bwa tina karaoa Ana kantaninga, tina kona ni kaeka ma te bwanaa, “Nooria, aio Ngai te Uea!”