Kinaakira mai Karawa: Koauan te Euangkerio Are E Bita Maiu

Te koaua ae bita te maiu n ana euangkerio Iesu Kristo bwa ngaira natii irouia ara karo ake i karawa.

Unimwaane Patrick Kearon man te Kooram n Abotoro n te Tengaun ma Uoman e marooro iaon “te bwaintangira ae bootii ni kabane koaua aika akea tokina ake a boutokai ara konabwai ni karekei ni kabane ake e tangiria Tamara ni katokai iaora—te bwai n tituaraoi n te ataibwai ae kakawaki are, ngkana e butimwaeaki ao ni karekeaki ni matoa inanora, ni iangoa te kimwareirei ao kangaanga n te maiu ao ara titiraki aika tuai kaekaaki: Bon aei bwa ngaira bon natin raoi te Atua.”

Man te tai anne ni weteakiu n te mition, I a tia n namakina koauan taeka akanne. I aki kona ni mwaninga aron kamatoakin ao te kakorakora are I a tia n namakinna bwa te Atua e kinaai ao e tangirai.

E ngae ngke aio te koaua, te aonaaba ae katobibiai e rangi ni uarereke arona ni kauringai oin raoi kinaakiu mai karawa. I a ataia bwa I riai ni kawakinna inanou uringan kinaakiu mai karawa ao te mwaaka are e roko.

Irou, aio e raoni bwaai n aron iangoan te kakai iaon rabwatau ao bwaai ake N na karaoi ao taneiai ni katoabong.

I namakina naba te reitaki ma te tia Karikai ngkana I mena n te tabo ae rau. Noorakin tamaroan maunga ke bungin taai e kauringai bwa te Atua e aki kainnanoia bwa e na katamaroa te aonaaba. Ma Ngaia ao Iesu Kristo e karaoia ibukira ibukina bwa e tangiriira bwa tina kukurei ni kamimiin te aonaaba aei ao ni kauringaki n Aia tangira (taraa Mote 6:63).

Ao te tataro nakon Tamara are i Karawa ni katoabong—ni kaongoa aron au namakin ao n ataakina bwa E tangiria n ongora ao n taetae nakoiu—e buokai bwa N na karaka riki reitakiu ma Ngaia. Te tataro e kauringaai bwa I aki maroaa ao bwa E tararuaai, riki ngkana bwaai ake I tangiri aki riki ngkai. I onimaki bwa Ngaia, te Tama ae tatangira, e ataia bwa nningai te tai ae riai ibukin kakabwaia nako ake a na roko inanon maiu.

Au mition e aki riki nakon are I kantaningaia, ma I a tia n rinanon te bwai are e buokai n nooria bwa bukin tera Tamau are i Karawa e tangirai bwa N na beku n aonon mweengau. Tibwaakin koauan kinaakira mai karawa ma naake a tuai n ataia e kaonai n te kukurei.

I aki kona n iangoa te maiu n akean kinaakiu bwa antai raoi ngai ni koaua—N na bon namakina te akea ao te bua.

Ngkana I iangoa oin te kantaninga ibukin maiu, e anganai te kantaninga ae bati n ataia bwa te maiu ae mamate bon te mwakoro ae uarereke n ana baire Tamara are i Karawa ibukiu. I karaoi, reiakin, ao I a raka riki nakon are bon ngai ibukina bwa te bwaintangira mai karawa are E a tia n anganai ngkai Natina ngai. I rangi ni kakaitau bwa E anga Natina ae tangiria bwa au Tia Kamaiu ao E anganai bwa N na rineia n rin n te maiu ae mamate bwa N na riki n ai Arona ao n okira mweengau.

Bwaai nako ake ko rinanona n te aonaaba, au kantaninga bwa ko na uringnga n taainako bwa antai raoi ngkoe ni koaua. Te koaua anne e na anganiko te korakora ni kaitarai bwaai nako ake ko kaitarai.

Ngkai te Atua e ongo irou n au tai ni kakorakora ni kan ataia, I ataia bwa n taainako e ongo ao e tangiriko naba.