“Toma: E Nakonako n te Kawai n Onimaki,” Riaona, Maati. 2026.
A Kinaa te Tia Kamaiu
Toma: E Nakonako n te Kawai n Onimaki
E kaotia nakoira ana karaki Toma bwa titiraki, taotaonaki n nano, ao karekean te kakoaua bon mwakoron karikirakean ara onimaki ao matoan nanora.
Kamataata n te tamnei iroun Laura Serra, e tabu katotongana
Tera ae roko n am iango ngke ko ongo aran ana tia reirei te Tia Kamaiu Toma? N tainako ti katoma arana ma “taan nanokokoraki” ke “taan nanououa.”
Ma iai ae mwaiti riki nakon Toma. N ana Euangkerio Ioane, ti noora mwanangan Toma n te onimaki ae na titebo ma are ara bwai: e kona te Onimaki ni kakorakoraaki n angaraoina ngkai ti onimakina ao ni mwakuri ni kakorakora ara onimaki.
“E OK bwa Ana Iai Titiraki
Iesu Kristo e wetea Toma bwa e na riki bwa temanna Ana Abotoro ake Tengaun ma Uoman, ao Toma e ira te Tia Kamaiu inanon Ana teniua-n ririki ni mwakuri. Iai Ana tangira ae korakora ibukin te Tia Kamaiu. Ngke e maaku Toma ibukin maiun te Uea, e kawaekoaia Abotoro ake tabeman, “Ti na iria naba ngaira, bwa ti na mate ma Ngaia” (Ioane 11:16).
N ana taromauri, e teimatoa n taekin titiraki. Imwain Ketetemwane, Iesu e reireiniia Ana reirei ae E nang nako. E titiraki Toma “Te Uea, tiaki ata te tabo are ko na nako iai; ao tina kanga n ata kawaira?”
E kaeka Iesu, “Boni Ngai te kawai, te koaua, ao te maiu: akea temanna ae na roko nakon te Tama, bwa ti mai Irou” (Ioane 14:5–6).
N aron Toma, ti na aki atai ana reirei ni kabane te Atua ke iteran ni kabane te babaire ni kamaiu. Ma karaoan titiraki aika raraoi e kona ni kaota te koaua mairoun te Uea. E bon riai bwa ti na karikirakea ara onimaki.
Beretitenti Russell M. Nelson e anga reirei:
“Ngkana iai am titiraki—ao au kantaninga bwa ko karaoia—ukori rekeia ma te nano ae ingainga n onimaki. …
“… Am titiraki, ae e taekinaki n te onimaki, e na kaineti n tainako nakon te onimaki ae korakora riki ao te atatai ae raka.”
Te onimaki ni Kaitaraa te Maaku
Ngke a ongo Abotoro ae e a tia n uti Iesu man te mate, n “aia katautau uakekei kaanga ai aron te barantiko ae akea manena, ao aki kakoauai” (Ruka 24:11). Ana tai Toma n raraoma e kona n ae raka riki nakoia ake tabeman bukina bwa akea ngaia ngke e moan kaoti te Uea are mangauti nakoia (taraa Ioane 20:24).
Imwiin are a tuanga Toma ae a tia n noora te Tia Kamaiu, e kaeka, “Ngkana I aki nori mwini biti i baina, ao ngkana I aki karina tabonibaiu i nanoni mwini biiti, ao ngkana I aki karina baiu i nanon rarikina, ao I bon aki kakoaua” (Ioane 20:25).
Imwiin wanibong, ao e a manga kaoti riki te Uea ao e kaoa Toma bwa e na riing Ikoakina. E kaeka Toma, ao e taku nako Ina, “Au Uea ao Atuau” (Ioane 20:28). Te Tia Kamaiu ngkanne e reirei te koaua ae kakawaki: “A kabaia akana onimaki ngkana a tuai n norai, ma a bon kakoaua” (Ioane 20:29).
A bon roko kaekaaia. Unimwaane David A. Bednar man te Kooram n Unimwaane n te Tengaun ma Uoman e reirei, “A bane n ongoraeaki ao a kaekaaki tataro ni kabane iroun Tamara are i Karawa, ma a kona kaeka aika ti karekei n ae tiaki ae ti kantaningaia ke n roko nakoira ngkana ti tangiria ke n te kawai ae ti kantaningaia.”
Matoan Nanom ae Teimatoa
Ngkana ti karekei kaeka rinanon te teimatoa, te tataro, ao te kaotioti, ti kona naba ni karekea matoan nanom—te koaua. Ngkana ti teimatoa ni karikirakea ara onimaki, e kona te koaua anne n tiku ma ngaira inanon maiura. N aron are e reirei Beretitenti Nelson: “Ngkana ko karinea ana tai te Uea ma te tataonaki n nano, ko na anganaki te atatao ao te oota aika ko ukokori. Kakabwaia ni kabane aika e katauraoi te Uea ibukim—riki kakai—a na roko. Anne te bwai ae na karaoia am kaotioti ibukim”
Ana taneiai Toma e kaotia nakoira ae tiaki tokin kawaira te onimaki ma bon te kawai. E karinea te kawai anne te Atua ao e na kakabwaiaira ngkana ti teimatoa n irii Ana kairi ao n ukora te koaua are e taekina te rau nako nanora (taraa Reirei ao Berita aika Tabu 88:63).