Nanokawakiu E Bitaki nakon te Kimwareirei

Kamataata n te tamnei iroun Briana Kranz

Ngke 18 au ririki, tibu te unimwaane n ana itera tinau e motirawa. N te tai anne inanon maiu, akea ae e a tia ni bua ae rang kaan nakoiu I ataia bwa e na riki n te bong teuana, ma I aki raoi kantaningaia ngke e riki n te tai ae karina.

Tibuu e bon rangi ni marurung, ma n akea ataakina, e rootaki n te boo. Tibuu te unnaine e waekoa n uotia nakon te onaoraki, ma e motirawa aua te bong imwiina.

Buan temanna n te tai ae karina n te moan tai e bon kammaraki. E bon kamimi ae tibu te unimwaane e kona n irii waaki aika a kakaawaki inanon maiu ao imwiina e a ti bua naba.

Imwiin te taunimate, I kunea te kawai ni karinea uringan tibu te unimwaane ao ara tai n ikotaki. E tatangiria ni mwakuri iaon ana turaki ao ni karaoi karikirake tabeua. Ni koauana, ngke e rootaki n te boo, e mena n ana karaati n taua ana bwai ni mwakuri ni baina teuana, ni mwakurina are taneiai iai.

I baireia bwa N na mwakuri naba iaon taian kaa. Karaoan anne e buokai n namakina te kaniiaki riki nakoina. I rairaki naba nakon te tataro ao koroboki aika a tabu, are I karekea te rau ni waaki nako ma te onimaki ao te kantaninga ni buana.

“Iai te mangauti,” e kauringai te burabeti Abinataai, “Ma iai te mangauti, mangaia ae akea ana tokanikai te ruanimate, ao e anaaki kammarakin te mate iroun Kristo.” (Motiaea 16:8).

Maten tibuu e buokai ni karekea te nonoori are e karika ana Mwakuri ni Kamaiu Iesu Kristo bwa te bwai ae kakaawaki inanon maiu. N aron are I karinea tibuu ni mwakuri iaon taian kaa, I a ataia bwa ti karinea Iesu Kristo—ao ni kona n namakina te kaniiaki riki Nakoina—ngkai ti kataia ni maiuakina are E maiuakinna, ni kamatebwaia Ana taeka, n tibwaua Ana euangkerio, ao ni karaoi “ana mwakuri Tama [Na]” (Ioane 10:37). Karaoana e anga nanon ana Mwakuri ni Kamaiu te Tia Kamaiu ae nano riki ao e karikirakea onimakinana inanora.

“Ngkana ti tang n nanokawaki ke ni kukurei, Iesu Kristo e ataia raoi,” Unimwaane Gerrit W. Gong man te Kooram n Abotoro ake Tengaun ma Uoman e reirei aei. “E kona ni kaoti n taai ake ti rangi ni kainnanoa iai bwaintituaraoi aika a korakora mai karawa: Ana Mwakuri ni Kamaiu Iesu Kristo, Te Mangauti, kaokan bwaai.”

E a tia Iesu Kristo ni bita nanokawakiu nakon te kimwareirei. Ibukina bwa iai Ngaia ao Ana Mwakuri ni Kamaiu, I ataia N na manga noora tibuu te unimwaane.