Taan Mwiokoaki aika Raoiroi—Ana reirei Iesu Kristo

Mataio 25 iai inanona teniua karaki ni kaikonaki. Te moan, te kaikonaki iaoia kiibono ake tengaun (tarai kibu 1–13). Niiman a wanawana ao niiman a nanobaba. Ni kabane ake tengaun a eti aia tabo are a mena iai, n tataninga te tia mare te mwaane, ao iai aia taura n tatabemaniia.

Ngke te tia iein temwaane—are tei ibukin te Tia Kamaiu—e roko n aoan te nukanikanibong n aki ataaki, kiibono ake niiman e aki tau aia bae n aia taura. Tao a taku n aia iango bwa e aki kainnanoaki bwa e na tatara aia oera. Ke tao bon tiaki taan tararua aika wanawana n aia bwaa ake iai irouia. Tao a tabeaianga, a kabwaka n rinanoa aia katauraoi bwa e na teimatoa n ura aia taura.

Ngaia are, ni kaekakiia n aia bubuti bwa a rin n te baka, e kaekaia te tia mare, “I aki kinaingkami” (Joseph Smith Translation, Mataio 25:11 [in Mataio 25:12, footnote a]). Ni kaitaraana, aio e kaotia bwa rinanon aia katauraoi ao wanawanaia n tararua, kiibono ake niiman aika a wanawana a bon Kinaa raoi.

E kona n taraaki te bwaa ae kakawaki bwa bon rairakiia irouia. A kona kiibono ake a wanawana ni kaura aia taura ao n rin n te baka ma te tia mare te mwaane. Te bwaa e aki kona n tibwauaki ma raraoia ibukina bwa anne bon te rairaki ibon iroum—bon ti ngkoe. Ti kona ao ti riai n taua otan ara taura n tabeki ao ni kakorakorai ao ni kaotaiia aomata nakon Iesu Kristo, ma ngaira n tatabemaniira bon taan mwiokoaki n oin rairakira.

N aron are e taekinna te Tia Kamaiu, “Bwaina te kakaonimaki, tataro n taai nako, ni katauraoi ami bwae ni kaura mwakai, ao iai ami bwaa iroumi, bwa kam aonga n tauraoi n rokon te Tia Iein” (Reirei ao Berita aika Tabu 33:17; e kairaki ma katuruturuana).

Te kauoua ni kaikonaki are e taekinaki n Mataio 25 bon taekan te tarena (taraa kibu 14–30). N te karaki anne, te mwatita, ngkai e na nako n te tabo ae raroa, e anganiia teniman ana toro taian tarena. Te “tarena” e tei ibukin te mwane. Ti kona naba n iangoia bwa bon bwaintangira, konabwai, ao kakabwaia mairoun Tamara are i Karawa. Te toka e angan are temanna nimaua ana tarena, nakon are temanna uoua ana tarena, ao te kateniman e anga teuana te tarena. Ao imwiina e a mwananganako te toka.

Ngke e oki, e kunea bwa te toro are e anganna nimaua te tarena ao are uoua ana tarena a tia n rangi ni kakaonimaki ao n riki bwa taan tararua aika rabakau ao a tia ni kabaongana raoi aia tarena, ni kataboroi. Ao ngkai a kakaonimaki iaon ae uarereke, te toka e anganiia riki ae mwaiti, n taekinna, “E raoiroi, te toro ae ko raoiroi ae ko kakaonimaki: ko kakaonimaki nakoni baika karako, ko na rin i nanoni kimwareirein am uea” (kibu 21).

Ni kaitaraana, te toro are teuana ana tarena e taunna—tao ibukina ae rangi n tabetabe ao e taotaona karaoan tibwangana. Ke tao e un bwa e na kanga ni karaoia ke e maaku bwa mwiina e na kabwaka. Ke tao e kabotaua arona nakoia toro ake tabeman, ao ana nanokokoraki e totokoia man kataakina. E aki tauraoi imwain okin ana toka, e aki karekea te kimwareirei man kakaonimakina n tararua, ao e a kabua ana tarena.

Te kaikonaki iaoia kiibono ake tengaun ao te kaikonaki iaon te tarena bon ti tearona. A uaia ni katuruturua bwa bon iai tibwangara n oin rairakira ao ti riai ni katauraoira bwa tina karekea ana bwaintangira te Uea n te karietataaki—ao bwa iai mwiokoara ao te bukintaeka ibukin te tarena ao te bwaintangira are ti a tia n anganaki.

Ni kabaneana, e karakinaki ni Mataio 25 rongorongoia naake a “mwengaraoi imatan te Atua,” a kabwarabwaraki bwa ana tiibu te Tia Kawakin Tiibu ae Raoiroi, a kuneaki ni mena i Angataina, ni kukurei n te baka n amwarake ma Ngaia, ao a kakabwaiaki bwa a na riki bwa taan tautaeka iaon bwaai aika a mwaiti (tarai kibu 31–40). E na kangai te Uea nakoia:

“Bwa I baki, ao kam kaamarakeai: I kanimoi, ao kam kamoai: te iruwa Ngai, ao kam akoai:

“Akea kunnikaiu, ao kam kunnikaiai: I aoraki, ao kam kawarai: I mena i nanon te auti ni kaikain, ao kam nako Iu iai” (Mataio 25:35–36).

Ngkai Ana reirei Iesu, ti katauraoira ibukin Kauaokina ao ti kakaonimaki ao ti karakai ni kamwakuri aron ara tararua iaon bwaai ake ti a tia ni kakabwaiaki iai. Nanoanga, tangira ae kororaoi, te tamaroa, ao te kakaonimaki n tararua e aki ti karikiira bwa ti na tau ni maeka ma Ngaia rimwi ma e anganiira naba te onimakinaki imatan te Atua n te tai aei. N aron are e reireia Moomon, ibukiia naake a kaonaki n te tangira ae kororaoi—ana tangira Kristo ae itiaki—e “na nakoraoi ma [ngaiia]” n te kabanea ni bong. A na riki n ai aron te Tia Kamaiu, n nooria n Ai arona ao ni kaonaki n te kantaninga ao ni kaitiakaki riki ngkai E itiaki. (Taraa Moronaai 7:47–48). E a tia n taekinna Beretitenti Nelson, “Te tangira ae kororaoi ao te tamaroa e kauka te kawai ni karekea te onimakinaki imatan te Atua!”

Shepherd—Variation IV, iroun Jorge Cocco

Ni kabane kaikonaki ake teniua a reirei aron oin ara tararua iaon rairakira; ibukin bwaintangira, tarena, ao bwaai ake ti a tia ni kakabwaiaki iai, ao ibukiia kain rarikira ake a baki, akea mweengaia, ao a kua.

A reirei aroia ana reirei Iesu bwa a na tauraoi n taai ni kangaanga ake a na kaoti imwain Kauaokin te Tia Kamaiu. Aikai bon taai ake ti maeka iai! Ti na kawakin tauran rairakira bwa e na uramwaaka, ni kauramwaakai, ni kabonganai ao ni karakai ara tarena, ao n tararuaia naake a kainnano. Aio bon kaonakira n te tangira ae kororaoi, ana tangira Kristo ae itiaki.