Karaoan Ana Mwakuri

Kamataata n te tamnei iroun Briana Kranz

Ngkana a na taneiai temanna ae e rangi ni kauruaki nano e na bon rinanona, ni buan temanna ae tangiraki, I taku bwa te kauoua n taneiai ae na riki ngkana are e moan nora te kabuanibwai e na tara matan te tina ke te karo ao n tuangiia bwa e a mate natiia.

N te ingabong teuana I kanakoaki bwa N na kaongoia te utu bwa natiia te aine ae te kairake e a tia ni mate ngke e buti n ana kaa n okira mweengana man ana reirei n te kaoreti. E matunako iaon ana bwee ao e waekoa ni mate ngke e rairaki ana kaa mai iaon te kawai ni kurati. Bon moaningabongin te Itita.

I namakina te maraki are N nang karikia nakon te utu aei. E ngae ngke tiaki au bure, I aki kona ni kanakoa te namakin are N na bukintaeka irouia te utu aei ngkana I kaongoia te rongorongo aei.

I katanga beeron te mataroa, ao e roko te mwaane. A kaitibo matara rinanon wintoon te mataroa. E kubanako, e oti te rawawata iaon moana. E ataia bwa rokou e na kabwarabwara buan natina te aine. N te tai ae tawe, I karekea te wirikiriki mairoun te tamnei.

“Jason, mwaninga taekam. Ko a karaoa au mwakuri ao ko kona ni kabongana mwaakau. Kabongana. Onimakinna. E na kairiko te Tamnei ae Raoiroi ni uota te atatai ao te kaotaaki nakoia ake a ikakorakora ke a nanokokoraki.”

E kauka te mataroa te mwaane ma baina aika a ruru. Te tamnei e anganai te mweengaraoi ngke I kaotai nakoia ao I a tuangaki bwa N na rin. Rinanon te kakorakoraki iroun te Tamnei, e korakora rootakin nanou iroun teuaei. I tangiria n tibwa rawawatana, n tang ma ngaia, ao n nanokawaki ma ngaia (taraa Motiaea 18:8–9), n namakinna bwa karaoan aei e na kona ni kakerikaaka korakaina.

Ti nakonako n te kawai ae uarereke nakon ana ruu are a ikotaki iai buuna ma natina. Ni kakorakoraki iroun te Tamnei, I namakina te rau ao te matata n au iango. I kaekai aia titiraki ao imwiina I kaota au koaua bwa ibukina bwa iai Iesu Kristo, Ana anga karea ao Mangautina, a kona riki ni manga noora natiia te aine.

Rinanon te taneiai aei, au onimaki iroun te Uea e a bitaki n riki bwa te onimaki ae korakora Au kantaninga bwa e bitaki naba aia onimaki.

Unimwaane Paul B. Pieper man te Itingaun e reirei, “N tabetai te kawai ae tamaroa n reiakina onimakinan te Atua bon man ti te onimaki Irouna.”

Onimakinan te Uea e a tia ni buokai ni karekea te korakora ni buokiia aomata. E a tia naba ni kakorakora au koaua ao ni karekean kawai aika aki kona ni warekaki ni beku ibukiia aomata Ibukina.