E Kona te Tia Kamaiu ae Kororaoi n Ota bwa Aekakira Aron te Ikakorakora?

I taku bwa I a roko ni kaungan au mition—I a kataneia te mitinare ae boou, katauraoi ibukin te bwabetito, ao karaoan bwaai ni kabane ake a kakaraoi mitinare. I rang n namakina te kukurei.

Ma I aki ataia ae te korakai ao te nakonnano a tabe n ikoiko inanou.

I wene ni matu n te tairiki teuana ngke I a rinanon te kauatai ni minotaki ma te nakonano ae riki nakoiu inanon maiu—te moan e a tia n riki ruaiwa te ririki mai imwaina. Ruaiwa te ririki!

Bukin tera, imwiin te tai ae uarereke n nakonnano ngke I ataei, ni manga karina n oki n te tai aei?

I imanono ni kataia n reitaanako au mwakuri ni mitinare n aron are mai mwaina, n iangoia bwa I kona n taobaraa au kangaanga.

Ngke I a ikakorakora ma aorakin au iango, temanna e tibwaia nakoiu te rongorongo are e a tia ni warekia n rongorongon te Tia Kamaiu ngke e mena i Ketetemwane.

E taku Iesu, “Moan te rawawata tamneiu, n ai aron ae N nangi mate iai:.” Ao imwiina e tataro te Tia Kamaiu, “O Tamau ngkana tao e konaki, ao e na nako mai Irou te mangko aei: ma akea au taeka, ma bon ane i Roum” (Mataio 26:38–39).

Ko a tia n namakina rawawatan nanokawakim? Koa tia n titirakina te Atua, “Iai riki te anga teuana?”

N te tatauraoi ae kororaoi, te ongeaba ae kororaoi, ao te tangira ae kororaoi, te tia Kabooi Maiura e butimwaea ana kantaninga te Tama. E bon kororaoi ibukina bwa akea ana bure, ma E teimatoa n namakina te maraki, karawawataki, ao te maroa.

E ngae n anne, E a tia n rinanon ae buakaka riki ni bwaai akanne ni kabane, bwa E aonga ni kona n tabekirarake

Beretitenti Jeffrey R. Holland R. Holland, Te Bonomwi ni Beretitenti n te Kooram n Abotoro n te Tengaun ma Uoman e reirei, “Iesu bon te aomata ae nananokawaki’ [Itaia 53:3], e taku koroboki aika a tabu. E rinanon te nanokaawaki, te maraki n rabwata, te un, ao te maroaa ae korakora. Ngkai ao n taai nako, ana tangira Iesu e aki bwaka, ao aron naba Tamana.”

Ataakina bwa e kaaitarai bwaai aika a kangaanga Kristo e kauringai bwa E ota n uruaki n nano, nanokawaki, kua, un, nakonnano, ao te maroa nakoia riki aomata nako.

Bon ngaia are E tang ni maten Rataro (taraa Ioane 11:33–36). Ao bon Ngaia are e titiraki ngke E nang mate iaon te kaibangaki, “Atuau, Atuau, e aera ngkai ko kitanai?” (Mareko 15:34).

Ma Iesu Kristo e ata naba te kimwareirei, tangira, nanoanga, ao te rau nakoia riki aomata nako. Ibukina bwa E kororaoi. Ao, E ataia raoi aron ara namakin.

“Teuana te karaunano ae korakora n tain te Itita aei bwa ibukina ngkai Iesu e nakonako n te kawai ae abwabwaki, n tii ngaia, ngaira ti aki riai naba ni karaoia. Mwanangana n ti ngaia e uota te iraorao ae korakora man ara itera iaon te kawai anne—Te tabeaianga n nanoanga iroun Tamara are i Karawa, raonakira ae aki bwaka iroun natina ae tangiraki, te bwaintangira iroun te Tamnei ae Raoiroi.”

Ngkai I ataia bwa Iesu Kristo e ata raoi te namakin are I ikakorakora ma ngaia , n tokina I a kariaia bwa E na buokai ni uota rawawatau.

Nanokawakiu e aki waekoa n nako. I teimatoa n rinanon bong aika kangaanga. Ma kaniiakiu nakon Kristo e anganai te kona n reitinako ni kimwareirei ibukina I ataia bwa E mena ikekei n raonai, ni kangai, “I ataia. I ata raoi aron ae ko namakinna.”

Inanon te taneiai aei, Kristo e a riki bwa temanna ae I onimakinna raoi.

I taku bwa n tabetai ti iangoia bwa ibukin kororaoin Kristo nanona e raroanako ao e aki kona n reke, bwa Ana mwakuri aika korakora ao kamimiin maiuna e taraa n rang n raroanako ma ngaira, n arora n aomata, aki kororaoi, aomata aika kainikatonga Ma E bon aki kona ni kaniira ngkana ti a kaitara ma ara kangaanga, nanokawakira ae korakora, ao rawawatara ae korakora.

N tain te Itita aei, ti kona n uringnga bwa Iesu Kristo e atai raoi bwa aekakira aron te ikakorakora ibukina bwa Ngaia e kororaoi—ti ngaia te aomata ae kona n namakina marakira ao e uoti rawawatara.

Ngaia are, ngkana iai am kangaanga, rairaki Nakoina. E ota raoi n te bwai ae ko rinanona.