Kakabwaiakiia ni Kabane Utu iaon te Aba

Unimwaane Bruce C. Hafen, te membwa n te Itingaun ae motirawa ma te karineaki, e karekea te tareboon n te taina mairoun te eteta n te maekatiin ae boou n te aba. Te eteta e tangiria ni marorokina te boki ae tibwa otinako are e taekina rongorongon te Ekaretia ao ana koaua n taekan karawa ao aekakin nako taian aro.

“Te tia koro karaki e kunea bwa aomata a namakina bwaruan karawa—ao utu i karawa,” e koreia Unimwaane Hafen. Ma ngkai angiina aomata a teimatoa ni kakoaua te maiu imwiin te mate, te tangira ae akea tokina, ao ikotakiia utu i karawa, “angiina ekaretia ni Kiritian e karako aia kaeka nakon bwaruan aei”—ma bon tii: Ana Ekaretia Iesu Kristo ibukiia Aika Itiaki ni Boong aika Kaitira.

N ana Ekaretia te Tia Kamaiu ae kaokaki, ti karekei iai tembora aika a tabu. Ti karekea te mare ae akea tokina, ma kariaiakaki ni kabaebae ake a kakabwaia ake iaon riki te mate n rabwata. Ti karekei berita n arora ae akea tokina ma naake ti tangiriia i matan te Tama ao te Nati. N anganakira aikai ni kabane, te tia korokaraki e kainna bwa iangoan karawa irouia aika Itiaki ni Boong aika Kaitira e bon bwanin raoi—ao, I reitia, te kabanea ni kakukurei.

“Ai Tamaroara Ataakina!” E nooria Unimwaane Hafen. “Angiina aomata n taai aikai a rangi n tangira te utu ae akea tokina, ao [ana euangkerio Iesu Kristo are e kaokaki] e kakoroi bukin kantaninga akanne n tamaroana nakon riki kantaninga riki ake tabeua [ke n taekan te onimaki]. Ai tera ngke te aonaaba ae bwanin a kona n ongo irouia nati [ra] n anenea te rongorongo ae kakukurei: ‘Families can be together forever.’”

Utu bon tiaki te babaronga ae kangaraoaki n te aroaro n ikoikotaki. Bon te baeten mai karawa ae akea tokina. Bon “boton ana baire te Tia Karikibwai ibukin tokin kawaia Natina ae akea tokina.” N aron are e a tia n reireiniira Beretitenti Russell M. Nelson: “[Te Uea] e karika te aonaaba [bwa] ti aonga ni karekei rabwatara ao ni katei ara utu. E katea Ana Ekaretia bwa e na karietataia utu. E katauraoi tembora bwa aonga utu n ikotaki n akea tokina.”

Ma tangiran te utu ae korakora tiaki ti tokin kawaina ae akea tokina. Iai kakaawakin te utu ibukin kukureira n te maiu ae mamate naba. Tamara are i Karawa, are e atai raoi kukureira n te tai aei ao n ae akea tokina, e kanakoia Natina nakoia utu—n aroia aika aki kororaoi—ao e kaoira bwa tina katei utu aika a korakora ao n tararuai. Te koaua, “aki toamau, mate, ke aro riki tabeua a kona ni karika temanna bwa e na kona ni kaitarai kabwaka ake e kaitaraaki ma ngaia.” Ma akea ae e kona n onea mwiin kakaawakin tibwanga ake a katabeaki iai mai karawa n tibwangan te buumwaane ao te buuaine, te karo ao te tina.

Kakae iaon “riki, kabeaki, utuia karo aika uoman” e reitinako ni kaotia bwa te utu e rang kakaawaki ni kawakinan “te reitaki n te tangira ao itangitangiri aika nano.” Bon ngaia “te moan tabo are a kona iai ni kateiwae, n iakoakoi, ao n atatai aroaro imarenaia.”

Te koaua, ti aki rang kubanako bwa te bwai ae rang kakaawaki n ana baire te Atua e kaitaraaki irouia aomata. Tatan e aki iraorao nakon te utu, ao ana mwakuri a rang katawe “ibukina ngkae e ataia bwa a kani bane ana bong.” (Kaotioti 12:12). Ngkai Beretitenti M. Russell Ballard (1928–2023), Bonomwi ni Beretitenti n te Kooram n te Tengaun ma Uoman, e taku, “Tatan e ata raoi te kawai ae koaua ae nakoraoi n uruana ana mwakuri te Uea, bon kakerikakan aron nakoraoin te utu ao kakaawakin te mweenga.”

Ataakin bwaai ake ti atai ibukin utuun te Atua ae akea tokina, Ana baire ibukiia natina, ao kakaawakin te reitaki n te utu ae akea tokina, ti riai ni mena ibuakoia taan katana te utu aika nanomatoa.

Ti na kanga ni karaoa aei?

Beretitenti Dallin H. Oaks, te Moan Kauntira n te Moan Beretitentii, e anga te reirei aei: “Te katanoata nakon te utu … bon ana kauring te Uea iaon koauan te euangkerio are tikainnanoia bwa tina teimatoa iai inanon kangaanga aika a riki n taai aikai nakon teutu.”

Inanon maiura, ti kona ni karaoi “bwaai aika uarereke man beebete” (Aramwa 37:6) ake a kakorakora te reitaki n te utu. Aio e kairaki n irakin reirei n te utu ae nakoraoi ao te mare ake a kaotaki n te katanoata nakon te utu: “onimaki, tataro, rairannano, kabwarabure, karinerine, tangira, nanoananga, mwakuri ao waaki ni kakukurei aika tamaroa.” N aki tarai aroaro inanon te utu aika riki, ti kona ni kaotia man ara mwakuri bwa te reitaki n te utu a bon kakaawaki iroura n akea tokina.

Ngkai “kain te aba aika ti katabeaki” inanon ara komiuniti, ti kona ni karikirakei kantaninga aika kateaki akanne ni kateimatoai ao ni kakorakorai utu.”

Ngaira bon ana aomata inanon te berita ae tabu te Uea ni boong aika kaitira. Ngaira bon taan bwaibwai n te berita are e karaoaki nakon Aberaam, Itaaka ao Iakoba—berita ake a kainnanoaki ibukiia utu. Berita akanne a roko ma wewete aika a tabu ni kakabwaiaia “utu ni kabane iaon te aba.” Ao teuana te kawai ae kakaawaki are ti karaoia bon maiuakinan, katanan, ao tibwauan te koaua ae akea tokina bwa “te utu e katabuaki iroun te Atua” ao bwa “taian otenanti ao berita aika a tabu a tauraoi inanon tembora aika tabu are a kona aomata nako n oki ni maeka ma te Atua ao ibukiia utu bwa ana katiteuanaaki n akea tokina.”

Ngke ti matakuakiniia ara utu ngai ma Titita Uchtdorf ni karaoi berita aika a tabu ma Tamara are i Karawa ae tatangira, a kaonaki nanora n te kimwareirei ao te kakaitau. Ti kimwareirei tiaki ti irouia natira ma natiia ma irouia naba ara karo ao aia karo. Ti iango ma te tangira ae korakora n aron te berita ae tabu n te euangkerio ni kona ni katiteuanaira ma rooro nako. Bon te namakin ae tiaki ae aron noorakin “te kai n ararake ae kateaki, … iaon te aba, ao [e roota] karawa tabona; ao noria, a na anera te Atua aika ararake ma n ruo I aona” (Karikani Bwai 28:12).

Kakabwaia ake e berita iai te Uea nakon Iakoba inanon miina e karababaaki nakoira ni kabane Natina n te berita—n raonaki ma ngkoe ao ngai. N aron are e karaoia te Uea ibukin Iakoba, E na kaekaira “inanon bongin [ara] bwarannano” (Karikani Bwai 35:3) ngkana ti rineia.

“Nooria,” e taku te Uea, “, I memena iroum, ao N na kawakiniko n taabo nako akana ko na nako iai, … N na aki kitaniko ” (Karikani Bwai 28:15).

N aron Iakoba, iai ni kabane iroura kangaanga aika tina rinanona. N tabetai kakabwaia ake a taekinaki nakoira n te berita a taraa n raroanako. Ngkana a roko kangaanga ke kakaewenako, ti kona n nanokokoraki n ana tangira te Uea. Ti bon kona naba n namakinna bwa e mwaninga taekara te Atua. E ngae ngke e rang tamaroa ara kekeiaki n riki bwa ana reirei, ti kona n namakinna bwa ti aki karekei kakabwaia ake ti kantaningai.

Tariu ao mwaneu, raora aika kam tangiraki, kawain te berita ni kamaiu e rang kakukurei, e ngae ngke n tabetai e kona ni kananokawaki. Ngkana ko namakinna bwa e aki koro bukin te baire ni kamaiu inanon maium ngkai, taiaoka onimaki bwa te Uea e tabeaianga iroum ao e na kakabwaiako n Ana tai, ni kaineti ma Wanawanana.

Onimakinan Iesu Kristo ao Ana berita e kaungaira bwa tina taraa are imwaira, tiaki rikaaki. Ibukina bwa iai Ngaia, arora n taai aika a na roko e riai n aki tauaki taekana man bwaai aika a riki n taai aika a nako ke ni katoki ara taratara iaon ae ngkai. Eng, ti bon bane n tii te arona, ke tina bon, ikoaki n te aro teuana ke teuana. Ma ti kakoaua te Tia Katoki Aoraki ae Korakora. Ti onimakina—te Atua n ae korakora n te aro are “ti kakoauai ana berita,” e ngae ngke a bon tataninga “mai kiraraoa” (Ebera 11:13).

“Kam na uringnga bwa, n ana kawai te Uea ao ana tai, akea te kakabwaia ae tauaki mairouia ana aomata aika itiaki aika a kakaonimaki,” e taku Beretitenti Nelson. “Te Uea e na bairei taekaia ao e na kaniwanganiia n tatabemaniia nako ni kaineti ma nanoia ae korakora n raonaki ma aia mwakuri.”

I berita bwa ngkai ti irii ao n tibwauai ana baire Tamara are i Karawa ibukiia utu, E na memena irarikira, kamatoaira, ao n raoniira inanon mwanangara. E na bon aki katikuira n tii ngaira, riki ngkana a roko kangaanga iaora ke irouia naake ti tangiriia. E na uouotiira, tabekiira rake, ao n uotiira nakon te aba ni berita ae onrake n te kimwareirei ma Ngaia, ma Natina, Iesu Kristo, ao ara utu—n akea tokina.