“Yusufu wa Arimathaya: Matamanio ya Haki na Miujiza ya Mungu,” Liahona, Machi 2026.
Walimjua Mwokozi
Yusufu wa Arimathaya: Matamanio ya Haki na Miujiza ya Mungu
Yusufu wa Arimathaya alikuwa nani, na tunaweza kujifunza nini kutokana na jukumu lake katika hadithi ya Pasaka?
Kielelezo na Laura Serra, isinakiliwe
Yusufu wa Arimathaya alikuwa sehemu muhimu katika simulizi ya Pasaka, akimsaidia Bwana wakati alipopata ushindi mkubwa katika historia ya mwanadamu. Wakati Yesu Kristo aliposulubiwa, Yusufu “akafanya ujasiri na akaingia mbele ya Pilato, na akauomba mwili wa Yesu” (Marko 15:43). Baada ya wengine wengi kumtelekeza Bwana katika saa Yake ya kukata tamaa, nini kilimfanya Yusufu kukaa na kushiriki katika hatua muhimu ya dhabihu ya Mwokozi?
Uaminifu wake unaweza kuonekana unapingana na hadhi yake kama mshauri tajiri katika Sanhedrini, kusanyiko la Kiyahudi linaloundwa na Mafarisayo na Masadukayo ambalo lilimhukumu Kristo kifo (ona Mathayo 27:1, 57). Zaidi ya hayo, Yusufu alitunza uanafunzi wake kwa Kristo kwa siri “kwa kuwaogopa Wayahudi” (Yohana 19:38).
Bado, mwishowe, upendo wake uliangaza. “Hakuwa amekubali ushauri na matendo yao” ambao walitafuta maisha ya Mwokozi (ona Luka 23:50–51). Na baada ya Mwokozi kufa, Yusufu aliufunga mwili wa Bwana katika kitani na kuuweka katika kaburi lake jipya (ona Mathayo 27:59–60; Luka 23:52–53). Hii ilikuwa ni utimilifu wa unabii kwamba kaburi la Kristo lingekuwa pamoja na matajiri ( ona Isaya 53:9).
Amefufuka
Katika kutoa kaburi lake kwa ajili ya mazishi ya Mwokozi, Yusufu wa Arimathaya alisaidia kutimiza unabii na kutayarisha njia kwa ajili ya ushahidi wa kimiujiza wa Ufufuko wa Yesu Kristo. Siku ya tatu baada ya Kusulubiwa, wafuasi wa Kristo walikuta kaburi likiwa tupu, na sauti ya malaika ikatangaza, “Hayupo hapa; maana amefufuka” (Mathayo 28:6).
“Ufufuko wa Yesu Kristo unatoa ushuhuda wa utakatifu Wake na kwamba Yeye ameshinda mambo yote,” alifundisha Mzee D. Todd Christofferson wa Akidi ya Mitume Kumi na Wawili. “Ufufuko Wake unatoa ushuhuda kwamba, tukiunganishwa Kwake kwa maagano, sisi pia tunaweza kushinda mambo yote na kuwa wamoja. Ufufuko Wake unatoa ushahidi kwamba kupitia Yeye, kutokufa na uzima wa milele ni uhalisia.”
Yusufu huenda hakujua kile alichotoa Pasaka hiyo ya kwanza zaidi ya hamu yake ya kumstahi Yesu Kristo. Lakini Bwana alitumia matamanio ya haki ya Yusufu kama sehemu ya muujiza Wake wa mwisho kuwa “malimbuko ya wale waliolala” (1 Wakorintho 15:20), wa kwanza kufufuka kutoka kwa wafu.
Kama vile Yusufu alivyokuwa na jukumu muhimu la kufanya, kila mmoja wetu anaweza kuwa chombo katika mikono ya Baba wa Mbinguni. Mpango Wake ni kwa ajili ya kila mtu, na Yeye atavuta ujuzi wetu, uzoefu, na hali zetu ili kuendeleza kazi Yake kuu. Pasaka hii, tunaweza kukumbuka ujumbe huu na kumtafuta Yesu Kristo, kutoa dhabihu ya kile tunachoweza kusaidia kujenga ufalme Wake na kuruhusu miujiza Yake ije kutimizwa katika maisha yetu.