Tomaso: Kutembea Safari ya Imani

Na Michelle Dennis Christensen

Majarida ya Kanisa

Hadithi ya Tomaso inatuonyesha kwamba maswali, subira, na kupata ushahidi ni sehemu ya kukuza imani yetu na kusadiki kwetu.

Nini kinakuja akilini unaposikia jina la Tomaso mwanafunzi wa Mwokozi? Mara nyingi tunaunganisha jina lake na “mwenye shaka” au “ona shaka.”

Lakini kuna mengi zaidi kwa Tomaso. Katika Injili ya Yohana, tunaona safari ya imani ya Tomaso ambayo inaweza kuakisi yetu wenyewe: Imani inaweza kuimarishwa baada ya muda tunapoamini na kutenda ili kuongeza imani yetu.

“Ni SAWA Kuwa na Maswali

Yesu Kristo alimwita Tomaso kuwa mmoja wa Mitume Wake Kumi na Wawili, na Tomaso alimfuata Mwokozi katika huduma Yake ya miaka mitatu. Alikuwa na upendo wa dhati kwa Mwokozi. Wakati Tomaso alipohofia maisha ya Bwana, aliwasihi Mitume wengine, “Twendeni na sisi, ili tufe pamoja naye.”(Yohana 11:16).

Katika kujitolea kwake, bado aliuliza maswali. Kabla ya Gethsemane, Yesu aliwafundisha wanafunzi Wake kwamba Yeye angeondoka kwenda mbali. Tomaso aliuliza, “Bwana, sisi hatujui uendako; nasi twaijuaje njia?”

Yesu alijibu, “Mimi ndimi njia, na kweli, na uzima: mtu haji kwa Baba, ila kwa njia ya mimi” (Yohana 14:5–6).

Kama Tomaso, tunaweza tusielewe mafundisho yote ya Mungu au kila kipengele cha mpango wa wokovu. Lakini kuuliza maswali ya haki kunaweza kufunua ukweli kutoka kwa Bwana. Ni muhimu kukuza imani yetu.

Rais Russell M. Nelson alifundisha:

“Kama una maswali—na natumaini unayo—tafuta majibu kwa hamu ya dhati ya kuamini. …

“… Maswali yako ya dhati, yanayoulizwa kwa imani, daima yataelekeza kwenye imani kubwa na maarifa zaidi.”

Imani Dhidi ya Hofu

Wakati Mitume waliposikia kwamba Yesu alikuwa amefufuka kutoka kwa wafu, “ikaonekana kuwa kama upuzi kwao, wala hawakuwasadiki” (Luka 24:11). Kipindi cha shaka cha Tomaso kinaweza kuwa kilidumu kwa muda mrefu kuliko wengine kwa sababu hakuwepo wakati Bwana aliyefufuka alipowatokea mara ya kwanza (ona Yohana 20:24).

Baada ya kumwambia Tomaso kuwa wamemwona Mwokozi, alijibu, “Mimi nisipoziona mikononi mwake kovu za misumari, na kutia kidole changu katika mahali pa misumari, na kutia mkono wangu katika ubavu wake, mimi sisadiki hata kidogo” (Yohana 20:25).

Baada ya siku nane, Bwana alitokea tena na kumuomba Tomaso kuhisi majeraha Yake. Katika kujibu, Tomaso alitangaza, “Bwana wangu na Mungu wangu” (Yohana 20:28). Katika kujibu, Mwokozi alimwambia Tomaso, “Wa heri wale wasioona, wakasadiki” (Yohana 20:29).

Majibu huja. Mzee David A. Bednar wa Akidi ya Mitume Kumi na Wawili alifundisha, “Kila sala ya dhati inasikika na kujibiwa na Baba yetu wa Mbinguni, lakini majibu tunayopokea yanaweza yasiwe yale tunayotarajia au kuja kwetu wakati tunapotaka au katika njia tunayotarajia.”

Usadikisho Ambao Unadumu

Tunapopokea majibu kupitia uvumilivu, sala, na ufunuo, tunaweza pia kupata uthibitisho—ushuhuda. Kama tutaendelea kurutubisha imani yetu, ushuhuda huo unaweza kukaa nasi maishani mwetu mwote. Kama Rais Nelson alivyofundisha: “Unapoheshimu kwa subira ratiba ya Bwana, utapewa maarifa na uelewa unaoutafuta. Kila baraka Bwana alizonazo kwa ajili yenu—hata miujiza—itafuata. Hicho ndio kile ufunuo binafsi utafanya kwa ajili yenu.”

Uzoefu wa Tomaso unatuonyesha kwamba imani si hatima bali ni mchakato. Mungu anaheshimu mchakato huo na anatubariki tunapobakia wazi kwa mwongozo Wake na kutafuta ushahidi ambao unazungumza amani mioyoni mwetu (ona Mafundisho na Maagano 88:63).