“Au a Rere ni Veivosaki Kei Noqu Bisopi—Ena Vakacava Beka na Nona Raica?,” Liaona, Janu. 2026.
Mai na YA Weekly
Au a Rere ni Veivosaki Kei Noqu bisopi—Ena Vakacava Beka na Nona Raica?
Au a digidigi cala tiko. Ia niu veitalanoa kei noqu bisopi, au vakila ga na vakacegu.
Na gauna au a tiko duadua tiko kina ena imatai ni gauna, au a vakila e dua na yalo galala.
Au sa toki ki Filipaini meu tekivu vuli, ka sau levu na vuka ki vale, au mani sikova ga vakadua ena dua na yabaki meu vakavouya na noqu visa. Ni sa sega na veivakayarayarataki yalodina ni noqu matavuvale, au sa mani kuitaki tani yani vakamalua mai na kosipeli.
Au sa tekivu vakatavako, gunu, ka cakava na veika tale eso au a vakavulici kina ni veisaqasaqa kei na ivakaro ni Kalou.
Nanuma Tiko se o Cei o Au
Taumada, au a sega ni kauwaitaka. Au raica na lawa ni Lotu niu yalani kina mai na ka eso Au se lako tikoga ki lotu, ia au vakila niu sega ni kilikili ka cegu mai na vakayagataki ni sakaramede ena vica vata na vula.
Qai yaco na COVID-19, ka mai mudu tu kina na noqu sasaga taucoko. Ena gauna vata oqori, au vulica kina e dua na ka veivakurabuitaki: O au na gonesusu. Rau a se bera vakadua ni bau tukuna vei au na noqu itubutubu, kau lako curuma e dua na gauna ni leqa.
Au vakila niu sa yawa mai na veika kece au a vakabauta ena dua na gauna. Au kila niu gadreva meu kila se o cei dina o au. Niu sa lesu i vale, au a talaucaka vei rau na noqu itubutubu na veika kece—oka kina na digidigi au a vakayacora. Erau sega ni cudruvi au, rau a sauma ena loloma. Erau vakananuma vei au o cei dina o au: na luvedrau tagane ka luvena tagane lomani na Kalou.
Veivuke ena Veisau
Au a vinakata na veisau. Rau a vakayaloqaqataki au na noqu itubutubu meu vosa vei noqu bisopi, tekivuna na veivutuni, ka vakararavi ki na kaukauwa veivueti ni iVakabula.
Ia au a rere! Au lomaleqataka na noqu totogitaki se lewai ena vuku ni noqu digidigi. Au dau sega ni kauwaitaka na veika era dau nanuma vei au na tamata, ia na noqu bisopi e tamata vakasakiti, kau sega ni vinakata meu vakararawataki koya ena noqu tukuna vua na veika au sa cakava.
Ia me vaka a vakavulica o Elder Scott D. Whiting ena Vitusagavulu: “Kakua ni vunitaki iko mai vei ira era na lomani iko ka tokoni iko; ia, cici vei ira. O ira na bisopi vinaka, peresitedi ni tabana, kei ira na iliuliu era rawa ni vukei iko mo ciqoma na veivakabulai ni Veisorovaki i Jisu Karisito.”.
O ira na bisopi era “taura tu na idola ni matabete me matataka na Turaga ena nodra vukei na lewe ni Lotu me ra veivutuni.” Au a sega ni sotava na lewa kaukauwa ena gauna keirau veivosaki kina, na veika kece au vakila ena nona valenivolavola na noqu bisopi e veivakacegui. Au kila ni Turaga e nuitaki koya me vukei au, kau vakila ni rawa niu nuitaki koya talega.
A vakayaloqaqataki au na noqu bisopi meu vulica na veika me baleta na iVakabula kei na Nona Veisorovaki ena kena tarai cake na itovo vakayalo. Au dau sota vakawasoma kei noqu bisopi, ka dau qiriti au e veimacawa. Au vakila niu lomani ena veigauna kece au veitalanoa kina kei koya.
Na iSolisoli ni Veivutuni
Kena itinitini, ena veivuke nei noqu bisopi, au a lako tani mai na veika ca ena noqu bula. Ia, au a lomaleqataka tu ga na kena tauri tale na sakaramede. Au a bula kilikili dina beka—ni sa oti sara mada ga na cakacaka kece au sa cakava?
Ia a veivakadeitaki vei au na noqu bisopi. E vakananuma vei au o koya ni sega ni dodonu meu vinaka sara—meu lomasoli ga. Au sa solia tiko na noqu vinaka taucoko, ka sa kila tu na iVakabula ka na vosoti au tikoga niu sa vakararavi ena Nona isolisoli ni veivutuni.
E vakavulica ena dua na gauna wale tikoga oqo o Sisita Tamara W. Runia, na iMatai ni Daunivakasala ena Mataveiliutaki Raraba ni Goneyalewa, “Ni o lako mai vei Karisito, o kaya tiko, ‘E rawa beka ni o vukei au?’ ena inuinui, na veivakadeitaki vakatakilai ni sa dodo tu mai vei iko na ligana.”
Ni oti na veika au sotava oqo, au sa tekivu vakavouya na noqu veiyalayalati ena sakaramede ena yalodei. Au sa vaka e dua na tamata vou, kau vakila e dua na vakasama vou ni o cei o au kei na veika au rawa ni cakava ena veivuke ni Turaga. Au a kaulotu saraga baleta niu sa vakadinadinataka na levu ni kena sa veisautaka na noqu bula na isolisoli ni veivueti ni iVakabula, au vinakata meu vukei ira na tani me ra kunea na inuinui e solia vei au o Koya e veisiga.
E sega ni veivakuwai na ivakaro—era tu baleta ni vinakata na Kalou meda rawata, me da tubu, ka drotani mai na dai ni ivalavala ca. Na itakele ni kosipeli i Jisu Karisito sai koya na loloma e tu vei Koya kei na Tamada Vakalomalagi me baleti keda. Baleta niu sa sotava na loloma uasivi sara oya, au sa saga tiko meu vakataki Rau vakalevu cake.
Na nodrau isolisoli ni veivutuni e vakasinaita na noqu bula ena reki.