Ena Rawa Vakacava Meu Kudruvaka?

Mai vei Yesmin Oliveros, Zaragoza, Sipeni

Na va na toso ni neitou matavuvale ni isenibula e vakadinadinataka me dua na veivakatovolei vakaitamera. Ia eda taura matua na ititoko kaukamea ka vakadeitaka ni sa tosoi keda tiko na Turaga ki na dua na gauna vinaka cake ni mataka.

Ena vulaimago ni 2019, au yaco yani ki Sipeni kei rau na luvequ, o Aaron yabaki 8 kei Jorge yabaki 17, ka tauvi mate ni mona Na noqu tatadra ga e vakatawa na noqu kato, au kubeta toka ga na Kalou ka nuitaki Koya duadua ga.

A kidavaki keitou ki na nona vale e dua na kai Samaria dauloloma, ka keitou tiko mai kina me rua na macawa. Ia a sega ni rawarawa na nona kau laivi o Jorge mai na ituvaki sa matau vua. Ena vuku ni nona ituvaki, me muria toka ga o koya e dua na ituvatuva tudei. Na imatai ni vica na bogi, e dau tavia na lalaga, kau na dau tucake totolo meu tarova me kakua ni vakayadrati ira eso tale. Au tekiduru e yasana ka masu, kau nanuma na Aisea 41:10: “Kakua ni ko rere; niu sa tiko vata kei iko: kakua ni ko taqaya niu sa nomu Kalou: kau na vakaukauwataki iko; io, kau na vukei iko; io kau na tokoni iko ena ligaqu imatau sa dau dina.”

Ena ikarua ni mua ni macawa mai Sipeni, keitou yaco yani ki lotu ni sa tini tiko na soqoni ni sakaramede. Au a torova yani e dua na goneyalewa ka a tiko vata kei ira na gone ena Lalai ka vakamacalataka niu lewena na Lotu ia au sega ni kila e dua. A vakaveikilaitaki keitou vei ira e vica tale na lewenilotu.

Ena siga ka tarava eratou a ciqomi keitou na matabose ni siti o Zaragoza ni keitou isenivalu ka kauti keitou ki na dua na vale ka sega kina na wai se livaliva. Era a veivuke vei keitou na matabisopi, na iSoqosoqo ni Veivukei, kei na kuoramu ni italatala qase mai na tabanalevu keitou lakova tiko ena itutuvi, kakana ka sega ni dau vakatakata, isulu ni vulaibatabata, kei na veika yaga tale eso.

Eratou sa tekivu vuli na luvequ, kau sa tekivu vulica eso na cakacaka. A dua na bolebole vei Jorge na gauna ni kana, ni sa matau vua me dau kana ena sigalevu. E tukuna vei au o nona qasenivuli ni veitalia se o cei e veivakavulici tiko, ena gauna ga e taqiri kina na kaloko ena sigalevututu, sa na taura mai na kena ka tekivu kana.

“Au sa na Lolo talega”

Na neitou toso vaka va sa dua na veivakatovolei vakaitamera. Au masu meu qaqa tu ga ia ena so na gauna au raica niu tagi duadua toka. Ena va na macawa, au a moce ga me rua se tolu na auwa ena dua na bogi. Ni oti e vica na siga ena noqu vaqara cakacaka, au kalougata niu a kunea e dua na cakacaka meu qarava e dua na goneyalewa tauvi kenisa ni mona. Ni oti na cakacaka, au a tomiki rau na luvequ, vukei rau ena nodrau ka ni vuli, ka cakava noqu cakacaka ni vuli cakacaka e vale.

Au qarava tiko na goneyalewa vinaka oqo me dua na yabaki, me yacova ni sa qai takali yani ni sa yabaki 48, ka biuta tu mai e rua na gone lalai. Na ka e yaco vua a vakauqeti au meu tarogi au, “Meu kudru beka vakacava?” Noqu qaravi koya tiko sa rawa kina na ka me baleti keitou ka vakasinaita na yaloqu ena vakavinavinaka vua na Tamaqu Vakalomalagi.

Ena veisiga yadua keitou dau wilika na ivolanikalou, masu, ka tauyavutaka na ivakarau me taqomaki kina o Jorge. Ena itekivu ni 2024, keitou sa tekivu vakavakarau me keitou gole ki na Valetabu e Madrid Sipeni. Me keitou toro voleka yani vua na Tamada Vakalomalagi, au vakila ni dodonu me keitou lolo vakamatavuvale. A vakadonuya o Aaron, ka qai kaya vei au ena mataka ka tarava o Jorge, “Na, nikua au sa na lolo talega.” Sa dua na gauna ni reki sega ni vakamacalataki rawa.

o koya e volavola kei na nona matavuvale ena mata ni valetabu — “Me keitou toro voleka yani vua na Tamada Vakalomalagi ena neitou vakavakarau me keitou gole ki na Valetabu e Madrid Sipeni, au nanuma ni dodonu me keitou lolo vakamatavuvale,” e kaya o Yesmin. “A kaya vei au o Jorge, ‘Na, nikua au sa na lolo talega.’ Sa dua na gauna ni reki sega ni vakamacalataki rawa.”

Me tekivu mai na gauna keitou gole kina ki valetabu, sa vinaka cake sara vakalevu o Jorge. E dau vakarawarawataka vakalevu na nona ituvatuva. Ena Vakarauwai e dau vakarautaka na nona isulu me rawa kina ni veisoliyaka na sakaramede ena Sigatabu. Sa tosocake talega na nona ka vakavuli.

Nikua keitou sa rawata ga vakataki keitou na veika ni neitou bula, ka tokoni tiko mai vua e dua na Tamada Vakalomalagi dauloloma. Sa vakaturi keitou cake o Jisu Karisito mai na dravusa (raica na Aisea 61:3). Ni keitou sauma na neitou ikatini, keitou sa ciqoma kina na veivakalougatataki lelevu. Keitou taura matua na ititoko kaukamea (raica na 1 Nifai 8:24, 30; 11:25; 15:23) ka vakadeitaka ni da sa toso tiko ki na dua na veisiga vinaka cake ni mataka.