“Na Valavala Ca e Vakavuleqa, E Kauta Mai na Vakacegu o Karisito,” Liaona, Janu. 2026.
Mai na YA Weekly
Na Valavaka Ca e Vakavuleqa, E Kauta Mai na Vakacegu o Karisito
Ena loma sara mada ga ni bula leqa, sa rawa ni vu ni rarama, ivakarau, kei na vakacegu ni yalomu o Karisito.
Droini mai vei Kate Birch
Dau vakilai tu li vakalialai na bula … leqa?
Na vakilai ni leqa eso sa ka eda sotava taucoko ena veigauna. Na veika drakidrakita ni vuravura ena vakarawarawataka na kena guilecavi nida sa tamata vakayalo ena bula oqo—dua na ka eda se bera ni vakayacora taumada
Rua na isolisoli veivakurabuitaki a solia vei keda na Kalou oya na yago kei na galala ni digidigi. Na isolisoli oqori sa vakatara meda vakila, gadreva, ka cakacaka tu vakaikeda. Vakakina, sa rawa ni veicalati se tawamatata eso na ka baleta na digidigi e dau rawai me vakayacora na tamata vakayago.
Eda caka cala taucoko. Ia na gauna eda veiqalisominiwai kina kei na ivalavala ca se na itovo eda sega ni rawa tu ni ulabaleta, se cava sara na levu ni noda saga na veisau, sa rawarawa me vakilai na tatawasewase. Ni dreti keda tiko vaka ki lomalagi na yasada vakayalo ka dreti keda sobu vaka ki vuravura na yasada vakayago, e rawa ni vaka tu e dua na veidre dali matau e lomada.
Se da veiqalisominiwai kei na veika vaka na kakase, cudru, vakatulewa tawadodonu, vakaitavi sivia ena vakauitukutuku, veika vakasisila, se dua tale na ka, sa totolo sara na vunica me iriva na yameyame ni madua, lomaleqa, ka kena icavacava, na leqa vakayalo.
Eda kalougata, ni sa kila tu na Tamada Vakalomalagi kei Jisu Karisito na sala me sotavi kina na leqa.
Na Vakasaqarai ni Nona Rarama Sai Matai ni Kalawa
Ena gauna ni Veibuli—na itekitekivu ni veika kece eda kila—sa vakamacalataki na vuravura ena dua na ituvaki leqa ka veilecayaki: “A sa sega ni vakacokotaki ko vuravura, a sa lala tu; a sa tu na butobuto e dela ni wasa titobu” (Nai Vakatekivu 1:2). Na leqa kei na nuiqawaqawa ni butobuto oqo sa sala e rawa ni vakananumi keda kina na vunica nida caka cala se digitaka na veika e veicalati kei na ka eda vakamareqeta. Dau taleitaka o koya meda coko ena nona lawaki ka vakayaloqaqataki keda meda vuni.
Ia me vaka e vakavuvulitaka o Sisita Tamara W. Runia, na Matai ni Daunivakasala ena Mataveiliutaki Raraba ni Goneyalewa: “Sa vu ni rarama o Jisu Karisito vei ira ka dabe tu ena butobuto. Ia, ena veisiga o vakila kina na domo oya ni tukuna vei iko mo vuni, ni dodonu mo vuni ena dua rumu butobuto vakai iko, au sureti iko mo yaloqaqa ka vakabauti Karisito! Lako yani ka waqaca na Cina—noda Rarama Uasivi ni iNuinui.”
Ena veidusimaki ni Kalou, ena gauna ni Veibuli na matai ni ka a cakava ko Jisu Karisito me vakaseyavutaka kina na butobuto ni leqa oya me kauta mai na rarama (raica Nai Vakatekivu 1:3; Mosese 2:2–5). Mai kea, a lako yani o Koya me tauyavutaka na veitikina luluqa yadua, mai na lomalagi rabailevu ki na sorenikau lailai duadua.
Ke rawa tu Vua me vakacokotaki vuravura, raitayaloyalotaka na ka ena yaco nio gole kivua na Luvena ena kaukauwa ni veivakabulai kei na veivueti ena veisiga yadua. Na gauna o vakila kina nio vakaogai tu ena dredre kei na butobuto ni vuravura, na yacovi ni rarama i Karisito sa imatai ni kalawa kina vakacegu kei na isoqosoqo vakalou.
Tarava, Nanuma Tiko o Cei O Iko.
Ni oti na tauyavutaki kei na cokoti vata ni lomalagi kei na vuravura, a vakarautaka na Tamada Vakalomalagi na sala vei ira na Luvena vakayalo me ra lako mai i vuravura ka mai vakayago. Ia ena noda gauna e vuravura, e dau cakacaka vakaukauwa na vunica me rawa nida guilecava o cei o keda.
Eda rawa ni raica na nona sasaga me vayawaki keda mai na keda ivakatakilakila vakalou ena gauna e vosa kina na Kalou vua na parofita o Mosese ka wasea vua na kilaka. Ena Mosese 1, sa vosa vei Mosese na Kalou ena yacana ka vakatokai koya tikoga me Luvena.
Ia ni sa lako tani na Kalou, sa rairai mai o Setani ka vakatokai Mosese me “luve ni tamata” (Mosese 1:12), ka temaki koya me guilecava se o cei dina o koya.
E vinakata o Setani meda guilecava se o cei dina o keda. E vakauqeta na vakatitiqa ena noda rawa ni veisau. E vinakata o koya meda vakabauta ni da sa turaga ka marama tawaveisau rawa ka vaka tu ga kina.
Ia e vakananumi keda o Elder Patrick Kearon ena Kuoramu ni iApositolo Le Tinikarua: “O rawa ni lako vei Karisito ena yalodei ena Nona yalololoma ka ciqoma na Nona isolisoli kece sara ni reki, vakacegu, inuinui, rarama, dina, ivakatakila, kilaka, kei na vuku. O iko e dua na luvena yalewa lomani na Kalou, o iko e dua na luvena tagane vakamareqeti na Kalou, ka sa solia vei iko o Koya na Luvena savasava uasivi sara me vueti iko, vakadonui iko, ka vakasavasavataki iko.”
Na veivueti e dua na ka ena sega vakadua ni cakava o Setani. Nida vakararavi tu kina noda ivakatakilakila vakayalo, eda rawa ni kaya, me vakataki Mosese:
“Ko cei ko iko? Raica koi au oqo e dua na luve ni Kalou; au sa tautauvata kei koya na nona Le Duabau ga.
“Mo lako tani vei au Setani; kakua ni mai vakatovolei au; raica sa kaya vakaoqo vei au na Kalou: Ko sa tautauvata kei koya na noqu Le Duabau ga” (Mosese 1:13, 16).
Kevaka sa lomaleqa na bula, cegu mada. Nanuma na nomu ivakatakilakila vakalou. Me dreti iko tu ki lomalagi na dina oya, nio sa luvena lomani na Kalou. Rai vei Jisu Karisito me rawa ni vakataudeitaka nayalomu.
Kena itinitini, Vakatarai Karisito me Vukica na Leqa kina Vakacegu
Ni rau biuta na Were ko Iteni o Atama kei Ivi, na ka rawarawa erau dau kila tu ekea esa sosomitaki ena dua na vuravura liwalala ka galili. Ia sa yalataka na Tamada Vakalomalagi ni rau na rawata na vakacegu baleta ni sa vakarautaka e dua na iVakabula me vueti rau mai na nodrau ivalavala ca kei na rarawa (raica na Mosese 5:7–10).
Nio loma vadrukai tu ena bula oqo, nanuma tiko na dina oqo: Sa kila tu na Tamada Vakalomalagi ni da na sotava na veitemaki, caka cala, kei na ivalavala ca ena ilakolako lesu ki vale ki Vua—oqori e tiki taucoko ni tuvatuva.
Ena vosa tale eso, sa rawa ni vukei keda tu ga na Tamada Vakalomalagi ena vuku i Jisu Karisito meda vakasava na kaukauwa ni butobuto ni bula ka sosomitaka ena rarama. Se cava sara na levu ni gauna eda vakacalaka kina, ena vuku ni noda iVakabula, sa rawa ni da veisautaka na leqa ki na vakacegu ena vu ni yaloda nida veivutuni.
A vakadinadinataka o Peresitedi Russell M. Nelson:
“Ena vaqaqacotaki iko o [Jisu Karisito]. Ena vakalougatataki iko ena vakacegu, ena loma sara mada ga ni leqa.
“A taura vakai Koya o Jisu Karisito na nomu ivalavala ca, nomu mosi, nomu lomaleqa, kei na nomu malumalumu. E sega ni dodonu mo colata duadua! Ena vosoti iko o Koya nio veivutuni. Ena vakalougatataki iko o Koya ena veika o gadreva. Ena vakabula o Koya na mavoa ni yalomu.”
Se cava ga na ka o sotava tiko, ni ko gole vua na Tamada Vakalomalagi kei Jisu Karisito me baleta na veivuke, Rau sa rawa ni vakalesuya mai na ka e veilecayaki tu, sereki iko mai na leqa ni valavala ca kei na veitemaki, ka vakarairaivinakataka na nomu bula.
Rau sa vakayacora tu ena veigauna.