Ena Dusimaki Au na Turaga

Droini mai vei Allen Garns

Au a tubu cake ena lagasere ka vakavolivoliti tu ena sere ivakatagi. Na noqu tadra niu se gone meu dua na kenadau ena lagasere. Au a qaqa talega ena vica na veisisivi lagasere. Ia ena so na gauna ena noqu bula, au vakila niu a tawayaga niu vakasamataka na inaki e solia vei au na Kalou e sega kina niu na kilai se vakacaucautaki mai vei ira tale eso.

Na kena isa dau tu ga vei au na kosipeli i Jisu Karisito sa vukei au meu tudei ena vakabauta ena gauna ni veilecayaki. Sa vukei au talega meu kila ni vinakata na Tamada Vakalomalagi meu vakayagataka na taledi a solia vei au o Koya meu toro voleka yani Vua ka vakalagilagi Koya.

E dina niu sa laiva na noqu tatadra, au vakila ni dodonu meu lagasere tikoga ka vulica na sere kei na ivakatagi.

Niu se qai yabaki 25, sa oti na noqu vuli droini vale ka vuli talega ena BYU–Pathway Worldwide kei Brigham Young University–Idaho, ka vukei au meu vakavinakataka na noqu rawa ni vosa Vakavalagi.

A qai yaco vakasauri e dua na ka veivakurabuitaki.

Au a ciqoma e dua na veisureti meu daukaulotu ni sereivakatagi me tiki ni Parokaramu ni Vakaitavi ena Matasere ni Tabernacle Choir. Au sega ni kila, ia na veika kece au a cakava tiko ena vica na yabaki sa veivuke ena noqu vakarautaki au ki na gauna oqo. Na veisureti e isau ni noqu masu kei na gagadre. E kila tu na Tamada Vakalomalagi na kena itinitini mai na ivakatekivu ka vakatara meu lagasere vata kei na Matasere ni Tabernacle ena Lomanibai ni Valetabu ena koniferedi raraba ni Okotova 2024.

Mai na veika oqo, au rawa ni vakadinadinataka na kaukauwa ni kena liutaki au na Yalo Tabu, ena vosota, ka vakabauta ni tiko na inaki ni Kalou, e dina ga ni da na sega beka ni kila na inaki oya. Me vaka na yalayala vei keda “Ena sega beka ni matata sara na salatu vakusakusataki, ia e rawa ni da muria na iVakabula ena vakabauta ni noda ilakolako ena totoka ka qaqa na kena itinitini baleta ni na tuberi keda yani o Koya ki na vanua eda gadreva meda tiko kina.”

Kivei ira era vakasaqara tiko na nodra salatu e liu, era kila ni sa vakarautaka tu na Turaga vei iko e dua na ka e cecere cake mai na kena o rawa ni vakasamataka. Kevaka meda muri Koya, eda na ciqoma na veika sa vakarautaka tu o Koya me baleti keda. E sega beka ni matata na salatu, ka na rairai dredre na bula, ia na Turaga e se cakacaka mana tikoga vei ira na Luvena.

Au sa vulica mai na vakabauta, talairawarawa, dauvosota, kei na masu, ena tuberi au na Turaga.