Sega ni Yali vua na iVakabula

Droini mai vei Allen Garns, ena veivakadonui me vakatakarakarataki na droini nei Del Parson Na Lami Yali

E dua na lewe ni matavuvale kei watina erau nakita ena dua na gauna walega qo me rau biuta na Lotu, vata kei ira na luvedrau lalai. Na itukutuku a veivakalomaleqataki kina neitou matavuvale. Ena vica na macawa ka tarava, keitou a saga ni vakaraica na neitou iwalewale vou.

Na veisiga salamuria na kena irogorogo a vakavuna tu na yaluma, wainimata, kei na masu vakilaiyalo vua na Tamada Vakalomalagi. E dua na isau ni taro totolo sara ni noqu masumasu oya ni sa dodonu meu sokalou ena valetabu ena veimacawa. Vaka gonevuli ka marama ka tina cakacaka voli, au raica ni veibolei toka na isaunitaro oya, ia au sa vakadeitaka meu na talairawarawa sara kina veivakauqeti oya.

Dua na yakavi ni oti e dua na siga drakidrakita ni cakacaka, au a vakila kaukauwa ni sa dodonu meu gole kina valetabu ena bogi oya. Au kerea na luvequ tagane me tomani au me caka inisitori.

Ni keirau yaco tu kina valetabu, keirau sa veitawasei sara. Niu qarava tu na cakacaka veisosomataki ni vicavata na marama ka rogoca tu na nodra veivakalougatataki yalataki, au luvuci vakalevu sara. E sega ni yali rawa mai na noqu vakasama na lewe ni neitou matavuvale ka lako sese tu.

Ni cava noqu itavi, au vakaisulu, gole kina rumu ni wawa, ka dabe sobu. Vakalailai ga, au vakila ni dodonu meu veisautaka na vanua au dabe koto kina me rawa niu raici luvequ ni gole tani mai na rumu ni veisau na turaga.

Au toso ka sega ni lomavinaka ena vanua kecega au dabe kina—me yacova niu sa dabeca tu e dua na idabedabe ka qara i lalaga volekata na icurucuru ni valetabu. Au tomika cake ga na ivolanikalou, niu saga meu vakamalumutaka na lomaqu, niu sa dagava cake tu na lalaga.

E kea, au raica kina e dua na droini ni tuvaki taucoko ni iVakabula ni taura tu e dua na lami lailai e Ligana. A vakananuma vakasauri vei au na Yalotabu ni gauna e vaka me yali tu kina mai vei au na lewe ni noqu matavuvale lomani, era sa sega ni yali kivua na noda iVakabula.

“Ko cei vei kemudou na tamata, sa dua na drau na nona sipi, kevaka sa vakayalia e dua vei ira, ena sega beka ni biuta laivi tu na ciwasagavulu ka ciwa ena veico, ka laki vakasaqarai koya sa yali, me kunea mada?

“Ia ni sa kunea, sa viribale ki domona, ka reki” (Luke 15:4–5).

Eda tomana ni lomani ka masulaki ira na lako sese tu. Ia ni sa ulabaleti au na rarawa, au vakananuma na ka oqo, ena vakanuinui ni dua na siga, era na raica lesu tale na nodra sala na lako sese tu, ena veivuke ni iVakabula dauloloma.