Na Masu e Yaloqu

Droini mai vei Allen Garns

Niu vuli ena paraimari, e dau solia vei au o tinaqu na kequ ivakasigalevu, reguca na yadrequ, ka kaya, “Solia nomu vinaka duadua nikua, ka nanuma mo masu tiko e yalomu.” A tukuna o koya na ka vataga oqo ena veimataka, me yacova yani na vuli torocake.

Na ka dina, “mo masu ena vu ni yalomu” sai koya na iotioti ni ka a tukuna vei au ena gauna au a vodo kina ena dua na waqavuka meu gole ki na noqu kaulotu yabaki rua ki Florida. Sa matau sara e daligaqu na rogoca tiko na vosa oya au sa sega kina ni dau vakasamataka niu tubu cake tiko. Au nanuma ni dua ga na ka era dau kaya na nona itaba, me vaka “ kalougata na siga nikua.”

Niu daukaulotu tudei, au a vulica meu vosa vaka-Sipeni niu veiqaravi tiko mai Miami, Florida, e Amerika. Au sa qai kila ni o ira na neitou itokani vou, e vuqa mai Cuba kei Puerto Rico, era a vakataki tinaqu sara ga. Na veimatavuvale yadua keitou sikova era talaci keitou yani ena vosa ni loloma ka tautauvata: “Vaya con Dios” (Lako vata kei na Kalou).

Niu sa qai tekivu kila na ibalebale ni ka e vakaibalebaletaka o tinaqu, au sa tekivu vaqara na sala meu maroroya vakaidina kina e yaloqu e dua na masu. Niu vakayacora vakakina, sa tubu cake na noqu vakavinavinaka vua na Tamada Vakalomalagi kei na Luvena o Jisu Karisito. Au sotava e dua na iwase titobu ni vosota ena gauna ni veivakatovolei kei na dredre. Au vakila e dua na loloma cecere vei rau na noqu itubutubu ka vakavinavinakataka na solibula erau a cakava vei au.

Ena dua na siga au a wilika me baleta na nona veisiko na iVakabula vei ira na Nifai ni oti Nona Tucaketale. Ena ikarua ni siga ni Nona veisiko, “a vakaroti iratou na nona tisaipeli me ratou masu.” Ni ra masu, a masu talega na iVakabula, ni cavuta na vosa “cecere ka vakasakiti”. Ni sa oti, a vakarota o Koya vei ira na lewevuqa “me kakua sara ni mudu na nodra dau masu e lomadra” (3 Nifai 19:17, 34; 20:1).

E dua na sala ni kena caka oqori sai koya me da vakasamataka na masu me iyaloyalo ka wavolita tu na noda cakacaka ni veisiga. Na veimasulaki oya, salavata kei na loloma kei na vakavinavinaka, e vukei keda me da vakanamata ga vua na iVakabula ka maroroya na noda veiyalayalati.

Au vakavinavinakataka na ivakasala e veisiga nei tinaqu meu “kakua niu dau guce ena masu” e yaloqu. Na ka oya e sa vakayacora e dua na duidui levu ena noqu bula.