Taqomaki ena Kosipeli Vakalesui Mai i Jisu Karisito

Mai vei Sister J. Anette Dennis

Matai ni Daunivakasala ena Mataveiliutaki Raraba ni Soqosoqo ni Veivukei

Na salatu ni lesu vua na Kalou sa kilai tu vakamatata kevaka eda vakabauta ka nuitaka na noda iVakabula.

mawe ni yava ni tamata lako sobu tiko e gaunisala

Ena vuku ni keda ituvaki lutu kei na veika ni bula vakayago, eda sa dau rawai taucoko ni lako tani mai vua na Kalou eda kila ka lomana ena noda bula taumada. Sai koya na ivakarau ni bula vakayago. Oya, sa solia kina vei keda o Koya na sala me da taqomaki tu kina ki Vua, meda vauca na yaloda ki Vua, ka vukei keda ni toso ena veitaqomaki vinaka duadua ena buturara ni gasaukuro ni bula vakayago oqo.

Donuya na ivalu levu ni vuravura, era na vunitaka na mataivalu na gasaukuro bulu, se na gasaukuro kacabote, e botoniqele. Era tiko na lomanibai levu eso ni gasaukuro bulu, ka rawa ni ra yabeta tawakila tu na mataivalu na buturara ka kacabote vei ira.

Ni oti na ivalu, e udolu na gasaukuro tawakacabote se tiko ga, ka vuqa na tamata, oka kina na gone, era sa vakayalia na nodra bula se na tiki ni yagodra ni ra lakova tawakila tu na buturara ni gasaukuro bulu. Na isoqosoqo era lesi mera raica ka vakatakila na gasaukuro ena veibuturara oya sa vakabula e vuqa na tamata.

Na bula oqo e vaka e dua na buturara ni gasaukuro. Na vunica e sa rui matai ni vakamatavulotaka na veika rerevaki me rairai vinaka ka veisureti, vaka e dua na lomanibai totoka. Sa udolu na yabaki na nona cakava tu mai na ka oqo. Sa kenadau o koya ena caka gaunisala e veisureti tu ka muataki ki na veika rerevaki ka vakamosiyalo.

Tuberi Vinaka ki Vale

Sa kila tu na Tamada Vakalomalagi na sala me taqomaki keda kina ka sa vakatakila na sala me muataki keda vinaka tu ki vale. E dina sara, sa levu na veika rerevaki ka dredre esa tiki tu ni noda bula vakayago oqo. Ia eda rawa ni levea na digidigi e rawa ni vakavuna na lomaocaoca kei na mosi ni yalo e sega ni gadrevi.

Oqori na vuna sa solia kina vei keda na Tamada na ivakaro, na isolisoli ni Yalo Tabu, ira na parofita me dusimaki keda, kei na isema kaukauwa ni veiyalayalati vata kei Koya kei na noda iVakabula ena cakacaka vakalotu kei na veiyalayalati ni valetabu. Ena Lotu vakalesuimai i Jisu Karisito eda na raica ga kina na ivakatakilakila kaukauwa kece qori kei na veitaqomaki e rawa ni tuberi keda tu ki vale.

Sa ka levu na veivakalougatataki nira tiko na parofita ena gauna oqo. E tukuna o Peresitedi Hugh B. Brown (1883–1975), e dua na daunivakasala taumada ena Mataveiliutaki Taumada, na veivosaki a vakayacora kei na dua na lewe ni House of Commons e Peritania ka a turaganilewa tu e liu. E kaya na turaga oqo ni nanuma ni a sega ni vosa na Kalou vei ira na tamata e vuravura mai na matai ni senijiuri, ka sauma o Peresitedi Brown ena nona vakamacalataki Josefa Simici kei na Veivakalesuimai.

“A dabe ka vakarorogo vinaka na turaganilewa,” a nanuma lesu o Peresitedi Brown. “A taroga o koya eso na taro doudou ka qaraka, ia ena icava ni veivakatarogi a kaya o koya, ‘Mr. Brown, au vakilakila tiko ke ra taleitaka tu na nomu tamata na bibi ni nomu itukutuku. O iko? Ke dina na ka o tukuna vei au, esa itukutuku levu duadua e basika tu ki vuravura mai na gauna era a kacivaka kina na agilosi na sucu i Karisito.’”

Sa kacivi ira na parofita na Kalou baleta ni lomani ira na Luvena. Mai vei ira na Nona italai, na parofita, sa vakaraitaka o Koya na Nona ituvatuva ni veivakabulai, na Nona ituvatuva ni bula marau me tuberi ira na Luvena. Sa vakaraitaka na Turaga vei ira na parofita, daurairai, ka dauvakatakila na veika era sega ni raica rawa eso. Era sa ivakatawa ena vale cere (raica na Isikeli 33:1–7) ka rawa ni ra rai vakayawa ka vakarogoya na ivakasala vei ira kece ka na vakarorogo, vakavuqa ena veiyabaki vakailiu. E tiko vei ira e dua na gauna vinaka e sega ni tiko vei keda baleta na nodra veitaratara kei na Kalou me vaka na Nona italai vakadonui. Sa ka bibi sara meda rawata kece na ivakadinadina titobu, noda ivakadinadina me baleti ira na noda parofita, daurairai, ka dauvakatakila ena gauna oqo.

Na dina e tiko vei Jisu Karisito

Sa dredre tikoga me kilai na ka dina ena noda vuravura nikua. E vuqa sara na domo e basika mai ena veiyasana vuqa—Instagram, TikTok, Facebook, X, podakaseti, itukutuku ena keveli, kei na so tale. Vakakina ena vuku buli, se VB (AI), ena yaloyalo, esa dredre sara me kilai na ka dina kei na ka e sega—se cava sara mada na ka dina! Na vidio titobu ca lasutaki e rawa ni vakaraitaka tu ni dua e tukuna se cakava e dua na ka era a sega ni cakava. Ena dredre sara me kilai na ka dina mai na ka lasu ena veiyabaki mai muri.

Donuya na matai ni nona koniferedi vaka-Peresitedi ni Lotu ena Epereli 2018, a vakatavulica o Peresitedi Russell M. Nelson:

“Au sa yalodei tu baleta na veigauna mai liu. Ia au sega talega ni lecaika tu baleta na veigauna mai liu. Eda bula ena dua na vuravura e vereverea tu ka veiqati tikoga. Sa vaogai keda na veitukutuku tawacegu rawa ena tikori dei ni vakauitukutuku veimaliwai kei na curumaki tukutuku 24 na aua. Kevaka me tiko vei keda e dua na inuinui ni tavulona curuma na domo e vuqa kei na vuku vakatamata e valuta na ka dina, sa dodonu meda vulica ni ciqoma na ivakatakila.

Na noda iVakabula ka Dauveivueti, o Jisu Karisito, ena vakayacora eso na Nona cakacaka levu sara ena maliwa ni gauna oqo kei na Nona lesu tale mai. Eda na raica na ivakatakilakila veivakurabuitaki eso, ni Kalou na Tamada kei na Luvena o Jisu Karisito, sa vakatulewa tu ena Lotu oqo ena veidokai kei na lagilagi. Ia ena veisiga eliu, ena sega ni rawa na bula tiko vakayalo ke sega na veituberi, veidusimaki, veivakacegui, kei na veivakayarayarataki dei ni Yalo Tabu. …

“… Au vakamasuti kemuni mo ni vakalevutaka na nomuni tuvaki vakayalo me ciqomi kina na ivakatakila. Digitaka mo kitaka na cakacaka vakayalo e gadrevi mo marautaka kina na isolisoli ni Yalo Tabu ka rogoca wasoma ka vakamatata sara na domo ni Yalotabu.”

Ena ivola ni Veiyalayalati Makawa i Emosi 3:7 eda wilika, “E dina ena sega ni vakayacora e dua na ka na Turaga ko Jiova, ia ena vakaraitaka mada ga na nona vosa vuni vei ira na nonai talatala na parofita.” Ni sa rogolevu tiko na domo eso e vuravura ka veivakayarayarataki tu, sa gadrevi meda dui rogoca na domo malumu ni Yalotabu vakawasoma ka vakamatata sara me rawa ni da rogoca ka muria na veidusimaki ni Turaga mai vei ira na parofita bula.

Na Kalou sa Lomani Ira Taucoko na Luvena

Ena Veiyalayalati Vou kei na iVola i Momani, eda wilika ni Kalou sai koyakoya tikoga ena siga sa oti, kei na siga edaidai, kei na veisiga emuri (raica na Iperiu 13:8; Momani 9:9). Sa lomani ira na Luvena na Kalou ena noda gauna me vaka ga na Nona lomani ira na Luvena ena veigauna sa oti, ia baleta ni sa lomani ira na Luvena, sa vakayacora o Koya ena gauna oqo na ka a vakayacora ena gauna ko ya. E vakaraitaka o Koya na buturara ni gasaukuro bulu ni bula oqo ena ivunau me taqomaka na noda ilakolako, mera vakarogoya na parofita na domo ni veivakaroti ni ra raica tu na veika rerevaki; kei na veiyalayalati ni matabete e semati keda vakavinaka sara kivua na Kalou.

Ni da vakabauta na iVakabula ka vakararavu ki Vua, ena tuberi keda vinaka ki vale o Koya ena vakasolokakana ni Yalo Tabu; mai na ivolanikalou ni gauna eliu kei na gauna oqo; mai na domodra na parofita, daurairai, kei na dauvakatakila ena gauna oqo; kei na isema titobu kei Koya kei na Tamada mai Lomalagi e rawa tu ena cakacaka vakalotu kei na veiyalayalati ni valetabu.

raica na yava ni iVakabula ni taubale voli ena nuku

E sega tale ni dua na vanua e levu tu kina na veituberi kei na veidusimaki, veimaroroi kei na veitaqomaki, vakacegu, sautu, kei na inuinui vei Karisito me tautauvata kei na kosipeli vakalesui mai i Jisu Karisito kei na Nona Lotu vakalesui mai.