Na Veivutuni e Sega walega ni Baleta na Vorati ni iValavala ca

Ni bera na noqu kaulotu, e sega ni taucoko sara na noqu bula, ia e vinaka. Au taleitaka na vuli torocake kau sa tauyavutaka na veitokani vinaka duadua e se qai bau yaco vei au. Au marautaka.

Au kila ni kaulotu ena veibolei sara. Ia, au a namaka tiko na kaulotu me 18 na vula vinaka duadua ni noqu bula—ka lailai sara na kena dredre.

Ia ni oti e ono na vula e loma, sa yaco na vakamau nei noqu itokani me itukutuku vou ena dua na lisi ni veika dredre au a sega ni namaka. Na toso ki na dua na matanitu ka vulica e dua na vosa vou e vakavuna meu galili ka lomaleqataka. Na veibiliraki a yaco ka tiki ni bula ni kaulotu e sa veivakaocai sara ga ena vakasama. Na ka dina, niu sa vinakata ga meu lako ki vale.

Au a oca ka lomaleqa, kau sega ni vakila ni solia tiko vei au na Kalou na inuinui kei na marau au gadreva dina tu. Ni sa oti taucoko na veika au nanuma meu goleva au sa qai gole ki na dua na yalayala mai na noqu veivakalougatataki vakapeteriaki: niu na vakila na loloma ni Tamada Vakalomalagi mai na ivolanikalou.

Niu vakasaqaqara ena ivolanikalou, au raica niu sa dau vakananuma vakatitobu na italanoa kei Ivi. E a biu vakatikitiki mai parataisi ka gole ki na dua na lekutu butobuto liwalala, ka vaka meu vakila voli. E tautauvata kei na veika au a sotava, na veisau e yaco vei Ivi e yaco mai baleta e dua na digidigi. Au vakataroga kevaka a veivutunitaka na nona digidigi, me vaka na noqu sa tekivu veivutunitaka noqu digidigi meu veiqaravi.

Ia o Ivi e yalomatua cake sara na nona rai mai vei au. E dina ga ni sa mai yali na veika kece, ena nona vulica ni tiko e dua na iVakabula, e a “marau, ka kaya: Kevaka keirau a sega beka ni talaidredre keirau … na sega talega ni kila na vinaka kei na ca, kei na reki ni noda vakabulai” (Mosese 5:11).

A sega ni veivutunitaka na nona digidigi. A vakavinavinakataka o koya! E dina ga ni rau sa biu tani mai parataisi o koya kei Atama, e kamica cake na reki ni nona vueti mai na mosi ni nona yali. Na ka dina, ni vaka e a kauta mai na reki levu cake na nona vueti, vakatauvatani kevaka a sega sara ga ni gadreva me vueti mai kina.

E rawa vakacava oqo?

Eda na nanuma beka ni veivutuni e baleta walega na kena kau laivi na ivalavala ca kei na itovo ca mai na noda bula. Na iwalewale ni kena vagalalataki oya e rawa ni dredre ka mosimosi ena so na gauna, ka vakarawarawataka na kena vakabiri yani e dua na ikuri ca ni vosa.

Ia na veivutuni e sega walega ni baleta na noda sega ni ivalavala ca. Sa baleta talega na noda yaco me da va-Karisito vakalevu cake.

Noda vuki Vua—veisautaka na noda ivakarau ni rai ka vakasotara vata na noda rai kei Na Nona—sa iwalewale talega ni veivutuni.

Au qai kila ni ena noqu cudru kei na galili, sa qiqo kina na noqu rai. Au sa vakanamata tikoga ena veika au sa calata tiko kau sega ni raica rawa na veika au sa rawata: e dua na isema voleka ni veiwekani kei na noqu iVakabula.

Au vakila ni gadrevi meu veivutuni me baleta na noqu ivakarau ca ni rai. E taura na gauna, ia niu kerea na veivuke ni noqu Dauveivueti, a vakadeitaka vei au ni “au na reki ena bula oqo ” (Mosese 5:10).

Au se rarawa voli ga niu calata na vakamau nei noqu itokani, ia ena gauna vata oya, a sauma na Turaga na noqu masu. Au marau vakalevu ena vuku ni noqu itokani, kau kunea na reki levu ena noqu ivakadinadina ni Tamada Vakalomalagi e dau raica ka lomani ira kece na Luvena. Au a rawata vakalevu cake sara mai na veika au a calata.

E vakavulica o Sisita Kristin M. Yee, iKarua ni Daunivakasala ena Mataveiliutaki Raraba ni iSoqosoqo ni Veivukei, “Na veivutuni ena rawa kina vei keda meda vakila na loloma ni Kalou ka kilai Koya ka lomani Koya ena sala eso eda na sega vakadua ni kila.”

Ena vuku ni veivutuni, au sa kila oqo ni gauna au toro voleka kina vei Karisito, “ena cakava o koya na [noqu] lekutu me vakataki Iteni, kei [na noqu] vanua dravuisiga me tautauvata kei na were ni Turaga; na reki kei na marau ena kunei kina” (Aisea 51:3).

Niu lesu mai vale ena noqu kaulotu, au a sega ni lesu tale ki parataisi. Na bula ni oti mai na kaulotu sa dua na lekutu vou meu vakabulabulataka. E sega ni rawarawa, ka so na gauna au se calata tikoga na noqu bula ni bera noqu kaulotu.

Ia au kila ena vukui Karisito, ena titobu cake na noqu reki niu kila na noqu vueti.