Yalodina kei na Parofita—Gauna Sa Oti kei na Gauna Oqo

E kena ivakarau, sa dau segata tu ga o Setani me vakabuwawataka na nuidei vei ira na parofita kei na iapositolo. Me vaka, ena itukutuku makawa sai ira na ivakadinadina taumada ni yaca i Jisu Karisito ki vuravura taucoko (raica na Vunau kei na Veiyalayalati 107:23).

Ena noda gauna oqo, sa segata na vunica me vakasugusugu ki na ka e vakatoka o Peresitedi Russell M. Nelson “na ka bibi duadua sa yaco tiko e vuravura nikua,” na vakasoqoni vata kei Isireli, ka dodonu me liu ni bera na iKarua ni Lako Mai i Jisu Karisito. Sa tu vei ira na parofita kei na iapositolo na idola ni vakasoqoni vata oqo. O koya gona, era dau sotava tu ga na veisaqasaqa.

Se mai na gauna makawa se ena gauna e muri oqo, sa kunea talega o Setani na sala eso me cavilaki kina eso na luve ni veiyalayalati ni Kalou me ra veivala kei ira na iApositolo ni Lami e liu kei na gauna oqo (raica na 1 Nifai 11:34–36).

Oqo e lima na ivakavuvuli ka rawa ni vukei keda meda levea na lutu ki na dai oqo.

Vakabauta na Turaga o Jisu Karisito

Na imatai ni ivakavuvuli oqo sa imatai talega ni ivakavuvuli ni kosipeli: vakabauta na Turaga o Jisu Karisito kei na Nona Veisorovaki.

Na vakabauta e veidusimaki. E vakavuvulitaka o Peresitedi Jeffrey R. Holland, Na Peresitedi Vakatawa ni Kuoramu ni iApositolo Le Tinikarua, ni vakabauta ena dusia tikoga na veisiga ni mataka.

Ni sa tubu cake na noda vakabauti Karisito ka nuitaka na Kalou, eda “vakanamata ki liu ena mata ni vakabauta ka raica” Sa vakayacori na nodra yalayala (raica na Alama 5:15; raica talega na Mosaia 18:21; Alama 32:40). Ena soqo ni marau ni “Dou Duabau” ka vakananumi kina na ika 40 ni yabaki ni ivakatakila ni 1978 me baleta na matabete, a sureta kina o Peresitedi Dallin H. Oaks, na iMatai ni Daunivakasala ena Mataveiliutaki Taumada me ra “nanamaki ki liu ena duavata ni noda vakabauta ka nuitaka tiko na yalayala ni Turaga [raica na 2 Nifai 26:33].”

Sa tosoi keda tiko yani ki liu na kena sa mai yaco na yalayala nei Peresitedi Nelson ena “vakacegu kei na lomavata” na siga, me vaka e vakavulica o Peresitedi Henry B. Eyring, iKarua ni Daunivakasala ena Mataveiliutaki Taumada,“na Turaga o Jiova ena lesu tale mai me laki bula vata kei ira era sa yaco me Nona tamata ka na kunei ira, ni dua na uto, duavata kei Koya kei na Tamada Vakalomalagi.”

Na kena veibasai, sa saga o Setani me vakaukauwataki ira na luvena na Kalou me ra tao tu ena dua na raivuki, ka vakanamata ena veigauna sa oti, itukutuku, se ivakavuvuli—na kena sara mada ga era a vakamatatataki mai vei ira na parofita kei na iapositolo e muri. Me vaka “na nodra veibeitaki vei ira na wekada … siga kei na bogi ” (Ai Vakatakila 12:10),o koya e yavalata na veivakacacani tudei vei ira na parofita kei na iapositolo kei na nodra ivakavuvuli. Na vakacacani vakaca oqo e vakamalumalumutaka na vakabauta ena inaki ni nodra ivakadinadina, o Jisu Karisito—na nona inaki matalia.

iTukutuku ni duavata, E matata tu na veivinakati, kei na lomavata mai vei ira na iApositolo ena gauna oqo ni sa rui vuku o Setani ena veileti kei na tawakilikili, oqo na gauna vei ira kece na luvena ni veiyalayalati na Kalou (raica na 1 Nifai 11:34–36) me ra duavata ka cakacakataka yani na dina tawamudu sa vakatakila na Kalou mai vei ira na Nona parofita kei na iapositolo. Ni da vakayacora vakakina, eda sa na rawa ni duavata, mamarau, qaqa, veiyalayalati, vakasinaiti ena vakabauta ka sega ni duidui vakamatamata, tagane se yalewa, se na iyaya tale eso.

Na nodra ivakavuvuli na parofita kei na iapositolo ena vakauqeta na duavata oqo ka vakadeitaka na vakabauti Jisu Karisito, ka na dau tosoi keda ki liu.

Ni raica tu na noda gauna, a vakavulica o Moronai na sala eda rawa ni vakabulai kina mai na noda yaco me vakalewai ira na parofita kei na iapositolo: na ivakavuvuli ni sega ni veivakacacani se vakalelewa.

“Dou kakua ni vosa vakacacataki au ena vuku ni noqu malumalumu,” a kaya o Moronai, “se vosa vakacacataki tamaqu ena nona malumalumu se ko ira ka a volavola e liu vua ia mo dou vakavinavinaka ga vua na Kalou ni sa vakatakila vei kemudou na neimami malumalumu mo dou vuku cake kina mai vei keimami” (Momani 9:31; vakaikuritaki).

Ena dua tale na kena itukutukuni, eda vakanamata ka vuli mai na nodra ivakavuvuli na parofita kei na iapositolo ka vakadinadinataki Karisito kei na Nona kosipeli ka kakua ni vaqara na nodra malumalumu. Ena itukutuku makawa taucoko, sa vakatakila na Kalou eso na duidui oqo me yaga vei keda ka vukei keda me da vuli me da yalomatua vakalevu cake. Au vakavinavinaka Vua ni cakava vakakina.

Ia, e dodonu meda qarauna. Ena koniferedi raraba ni Epereli 2019, a cavuta kina o Peresitedi Eyring na ivakavuvuli oqo nei Peresitedi George Q. Cannon (1827–1901), iMatai ni Daunivakasala ena Mataveiliutaki Taumada: “Sa digitaki ira na Nona italai na Kalou. E taura me Nona dodonu me cudruvi ira kevaka era gadreva na veicudruvi. E sega ni solia vei keda na tamata yadua meda vakalewa ka cudruvi ira. E sega ni dua na tamata, me vakacava sara na kaukauwa ni nona vakabauta, se na cecere ni Matabete, me rawa ni vosa vakacacataka e dua sa ilumuti ni Turaga ka vakasaqara na cala ni kaukauwa ni Kalou ena vuravura oqo ka vakavuna na Nona cudru. Na Yalo Tabu ena vakasukai koya mai na tamata vakaoqo, ka na gole yani okoya ki na butobuto. Me vaka oqo, o sega beka ni raica na kena bibi meda qaqarauni?”

O iko kei au e tiko na nona veivakalougatataki kei na ivakaro na Turaga me baleta na ivakavuvuli vakaparofita kei na ivalavala, oka kina na veika kecega eda rawa ni kunea ni dredre me da kila se ciqoma:

“Raica sa kilikili sara mo dou muria na lewe ni lotu na vosa kei na ivakaro kecega sa vakatakilai vua me tukuna vei kemudou, ia mo dou caka dodonu kina e mataqu;

“Ni dou na rogoca na nona vosa, me vaka ga ni dou rogoca mai gusuqu, ena yalovosota kei na vakabauta” (Vunau kei na Veiyalayalati 21:4-5

Vakadua tale, eda sega ni veivakacacani se veivakalewai (raica na Maciu 7:1–2). Niu toso ki liu ena vakabauti Jisu Karisito kei na vakavinavinaka ena veivakalougatataki ni parofita kei na iapositolo, au sa vakalougatataki vakalevu (raica na Vunau kei na Veiyalayalati 21:6).

E dua tale na ivakavuvuli bibi me da levea na kaukauwa ni nanuma noda itavi e sega ni tu vei keda. Era vakacalai keda na vakanananu vakakilakila vakaoqo ena noda vakasama, ka dau yaco mai na noda raica vakayago na nodra ivakavuvuli na parofita kei ira na iapositolo. Ni da vakacacani ira na parofita kei na iapositolo, okati kina o ira mai na veigauna sa oti, e matata ni sa sivia vakalevu sara na noda dodonu ni vakatulewa, ni Turaga e maroroya na kaukauwa oqori me Nona duadua ga. E dei na yaloqu ni noda iVakabula dau loloma ka loloma cecere e kila na ka kecega, ka sa tukuna oti ka na tukuna tale ni na vosota na cala ca cava ga ka yaco ena veigauna sa sivi, na kena eda nuitaka ni na vakayacora vei keda ena gauna oqo.

E dua tale na ivakaraitaki ni noda sa ulabaleta na noda dodonu ni vakatulewa sai koya me da nanuma me da dusimaki ira na parofita kei na iapositolo me vaka na ivakarau e dodonu me vakayacora na Lotu se ivakarau e dodonu me lewai kina. Oqori na itavi ni Turaga, sega ni noda (raica na Vunau kei na Veiyalayalati 28:2–7). Se cava ga na vinaka ni noda inaki, meda veivakacacani ka lewa meda dusimaki ira na parofita kei na iapositolo e vu mai na dokadoka ka na kauti keda ki na veivakacalai kei na druka me da muria na dodonu vakaparofita.

Mai na 1820 me yacova mai oqo, sa dau vakavulici ira tikoga na Nona parofita, daurairai, ka dauvakatakila na Turaga ena ivakarau ni ivakatakila ka liutaka kina na Nona Lotu.

E vakavulica o Peresitedi Nelson:

“ Ni keimami soqoni vata vaka Matabose ni Mataveiliutaki Taumada kei na Kuoramu ni Le Tinikarua, na neimami rumu ni bose sa yaco me rumu ni ivakatakila. Na Yalotabu e vakilai sara ni tiko. E rawa ni duidui na neimami rai taumada, ia na loloma keimami dui veiwaseitaka e tudei tu. Na neimami duavata e vukei keimami me keimami kila na lewa ni Turaga ki Nona Lotu.

“Ena neimami soqoni, na lewe levu e sega ni lewa. Keimami veirogorogoci ena yalo masumasu ka veivosaki vata yadudua me yacova ni keimami sa duavata.”.

A raica o Elder D. Todd Christofferson ena Kuoramu ni iApositolo Le Tinikarua: “Ni kena inaki oqo e sega ni nodra duavata ga na lewe ni matabose ia na ivakatakila mai vua na Kalou. E dua na iwalewale e oka ruarua kina na ivakamacala kei na vakabauta me baleta na kena rawati na nanuma kei na lomana na Turaga.”.

Na ivakavuvuli vakalesui mai, ka sa vagatari vinaka oqo ni veitaqomaki e vakalevutaka na yalodei ena nodra rawata na noda iliuliu ena gauna oqo me ra liutaka tikoga na Lotu me vaka na loma ni Turaga.

E dina sara, o Jisu Karisito e tu ena ulu ni Nona Lotu, ka dusimaki ira na Nona parofita o Koya. Na ka eda na raica ni malumalumu ena nodra vosa se ivalavala e rawa, vakaidina, ni vakaraitaka na malumalumu ena noda ivakarau ni rai se kila vakatamata. Ni da nanuma tiko ni sala ni Turaga e cecere cake mai na noda sala ka cecere cake Nona vakanananu mai na noda vakanananu (raica na Aisea 55:8–9) e vakatarai keda meda levea na dau vakalewai ira na parofita, oka kina o ira ena veigauna sa oti. Na ivakarau ni yalomalumalumu oqo sa rawa kina vei keda meda muria na nodra vosa na parofita bula “ena vosota kei na vakabauta” (Vunau kei na Veiyalayalati 21:5; raica talega na 1:28).

E vukei keda talega meda ciqoma na ivakatakila levu cake, inuinui, kei na vakabauti Karisito ena dua na vuravura sa toso cake tikoga na kena dredre. A vakatavulica o Jekope,“Keimami a vakasaqarai ira na parofita, ka sa vuqa na ivakatakila kei na yalo ni parofisai; ia ni keimami sa kila na ivakadinadina kece oqo, keimami sa rawata na inuinui ka sa dei na neimami vakabauta” (Jekope 4:6). Kevaka eda sa yalomalumalumu, na veika tabu oqo e rawa ni kauta tani mai vei keda e dua na gagadre me da vakamatautaki keda vei ira na parofita kei na iapositolo, oka kina o ira ena veigauna sa oti (raica na Vunau kei na Veiyalayalati 88:124; 136:23). Na yalomalua ena vukei keda meda “vakasaqarai ira na parofita” me baleta na dina e vakalevutaka na noda reki kei na vakacegu ka sega ni vakasaqara na malumalumu.

Ena yalo vata oya, au wasea na noqu ivakadinadina bula ni o ira na parofita mai vei Josefa Simici ka lako sobu mai, era parofita ni Kalou ka sega ni cavuka na nodra veisosomitaki me yaco mai ka okati kina o Peresitedi Russell M. Nelson. Sa dua na veivakalougatataki bibi vei au meu “vakasaqarai ira na parofita ” ka toro voleka yani vua na Kalou mai na nodra ivakavuvuli yadua.

Au vakadinadinataka ni o ira era sa kacivi ki na ilesilesi vakalou ena nodra veidusimaki na parofita oqo era sa ivakadinadina digitaki ni yaca i Jisu Karisito e vuravura taucoko. Sa dua na madigi vinaka meda rai ka toso ki liu vei Jisu Karisito mai na nodra ivakavuvuli na ivakadinadina oqo.