Fausia i Luga o le Papa: Faamaloloina o le Tagata Natura E Ala i Le Faamanatuga

“O le taimi lenei tatou te faatinoina ai taitoatasi ni fuataga tulagaese.”

I se lalolagi taamilomilo ma le le mautonu, o upu a Peresitene Nelson na motusia ai le pisapisao e pei o se faailoilo. Sa ia uunaia i tatou e faia ni faiga uiga ese e faamalosia ai o tatou faavae faaleagaga, ni faiga atonu tatou te le i faia muamua lava. Aua a oo ina afatia le olaga, tatou te manaomia le sili atu na o faamoemoega lelei, tatou te manaomia se faavae e fausia ia Iesu Keriso.

Helamana 5:12 ua faamanatu mai ai ia i tatou:

“Ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua; e ao ona oulua atiinaa‘e ai lo oulua faavae; pe a auina mai e le tiapolo ana matagi malolosi, ioe, ana u fanafana i le asiosio, ioe, pe a pesi mai ia te oulua ana uato‘a uma ma lana afa malosi, o le a leai sona mana i o oulua luga e toso ifo ai oulua i le to o le pagatia ma le malaia e le gata, ona o le papa lea ua oulua atia‘e ai i luga, o le faavae mautinoa lea, o se faavae lea afai e atia‘e ai tagata e le mafai lava ona pa‘u‘u i latou.”

Matau le faaupuga: e “ao ona atiina‘e.” O lena faavae e le tuulima maia ia i tatou, e manaomia ai se taumafaiga, faamoemoega, ma o nisi taimi, o se toeiloiloga tiga o le mea o tatou tutu ai.

Ia tatou faamaoni—e tiga na matagi. E oo mai i tulaga tau mafatiaga tau tupe, gasegase, faigata tau mafutaga, masalosalo i aoaoga faavae, popolevale, ma le atuatuvale. Latou te taia i tatou i malosi o afa ma afai tatou te le taula ia Keriso, latou te tosoina i tatou i lalo i le vanu o le malaia ma le to e le gata.

Na aoao mai le Tupu o Peniamina:

“Ona o le tagata natura o se fili i le Atua, ma sa faapea lava mai le pa‘ū o Atamu, ma o le a faapea lava, e faavavau faavavau lava, vagana ai ua gaua‘i atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, tumu i le alofa, loto e usiusitai i mea uma ua silafia e le Alii e tatau ona faaoo mai i ona luga, e faapei ona usiusitai o se tamaitiiti i lona tamā.” Mosaea 3:19 (ua faaopoopo le faatusilima).

O le taua moni lena i le olaga: e le o a‘u e faasaga ia Satani, ae o le au paia i totonu o a‘u e faasaga atu i le tagata natura oi totonu ia te a‘u. E pei ona aoao mai e Liae (2 Nifae 2:16), faatosina le tasi poo le isi. O se vaega o a‘u e fiafia i le malamalama, o le isi vaega—le tagata natura—e teenaina.

I taimi anamua sa aumaia ai manu i le malumalu o ni taulaga mu. Ou te vaaia lenei mea o se faailoga e ao ona tatou aia le manu oi totonu o i tatou. I le mavae ai o Lana Togiola, na fetalai ai le Faaola:

“Ioe o a outou taulaga ma a outou taulaga mu ia faauma ese . . . . Ma ia outou osi mai mo se taulaga ia te au le loto momomo ma le agaga salamo. Ma o soo se tasi e sau ia te au ma le loto momomo ma le agaga salamo, o ia lea o le a ou papatisoina i le afi ma le Agaga Paia. . .” (3 Nifae 9:19–20).

O le Taulaiga a le Eria o le Pasefika 2025 ua valaaulia ai i tatou e faapotopoto i le sauniga o le faamanatuga. O se aafiaga paia ma faamalolo lea tatou te faamasaaina ai faafaatusa ma tanuina le tagata natura. E faamanatu mai e le tatalo o le faamanatuga ia i tatou e faapea ua faamanuiaina le falaoa ma le vai ma faamamaina i o tatou agaga a o tatou usita‘ia ia poloaiga a lo tatou Tama Faalelagi.

O ni nai tausaga ua mavae, sa ma feagai ai ma faigata ma lo‘u toalua ma se tasi o le ma fanau YSA. O se faasologa umi o mea na tutupu na tuua ai i ma‘ua ma lagona o le vaivai. Ou te manatua ma le salamo le faapea atu, “Ua uma a‘u ma na mea. Ua ou tapeina le ki ‘Ou te popole.” Mo ni nai aso, sa ou lagona le lelei, tuufua, faaitiitia le popole ma sa ou manatu sa ou maua le filemu.

Ona oo mai lea o le Aso Sa.

Sa ou faitauina talu ai nei le lauga a Elder Peter F. Meurs o le konafesi Aoao 2016, “E Mafai Ona Fesoasoani le Faamanatuga ia i Tatou ia Avea ma Tagata Paia.” Na ia fautua mai ni auala se lima e faaloloto ai la tatou tapuaiga:

1. Ia Muai Saunia

2. Ia Vave Taunuu

3. Usu ma Aoao mai Upu o le Viiga Faamanatuga

4. Auai i Tatalo o le Faamanatuga

5. Manatua Iesu ao tufaina mai faatusa o le Faamanatuga

Sa ou taumafai e faaaoga na aoaoga, ae sa mamafa pea lo‘u loto. Ona oo mai lea o le avanoa e aoao mai ai le viiga faamanatuga, o le fuaiupu lua sa tuia ai lo‘u loto:

“A o toe iloilo nei e o tatou mafaufau le taimi ua tuanai, ua tatou iloa e tatau ona tatou salamo. O le ala i lau afio o le amiotonu, le ala na faaalu ai lou soifua. O le faamagalo atu o se meaalofa mai le Atua, matou te sailia ma le faamaoni.”

O le taimi lava lena na liliu ai lo‘u loto e le na o le Faaola, ae o lo‘u atalii foi. Sa musumusu mai le Agaga ia te a‘u, valaau atu ma tau atu i a te ia ua e sese, faailoa atu e te alofa i a te ia.

I le mae‘a o le fonotaga, sa ou tesi atu: “O le a ou vili atu ia te oe i le aoauli nei, ou te manao e talanoa atu. Faamolemole ia tali mai, ou te folafola atu o le a ou le faalavelave ia te oe.” Sa ou valaau atu ma faapea atu, “Ou te alofa ia te oe atalii, faamolemole faamagalo mai a‘u.” Sa filemu i se taimi, ona faapea mai lea o lona leo: “Oi, o le mea lena? Lelei mea uma, Ou te alofa foi ia te oe. Ua ou sese foi, na faapefea mai lou aso?”

Na paia lena taimi. Sa faamaloloina, o le pulu pasama a le Faaola ma sa oo mai ona sa ou taumafai, e ui lava i le le atoatoa, e fausia i luga o le papa.

E leai se tapulaa i Lona gafatia e fesoasoani ia te oe. O Lana Togiola e le i‘u e mo oe, o le a Ia faamagaloina oe, O le a Ia faamaloloina oe ma o le a Ia siitiaina oe.

O lea faaalu le taimi e taofi ai ma toeiloilo. Ia avea le faamanatuga ma ou malumalu, ia avea le Faaola ma ou malosiaga ma afai e oo mai afa, aua o le a oo mai lava, o le a e le pa‘u lava, aua ua fausia oe i luga o le papa, o Ieu Keriso lea.