Ia Tofusia Faatasi ai Outou i le Amio Atua

I le fono i le muai olaga, sa tuuina mai ai e le Tama Faalelagi i Ana fanau agaga Lana fuafuaga mo lo latou alualu i luma ma le fiafia e faavavau.

“O le a tatou faia se lalolagi e nonofo ai i latou nei;

“Ma o le a tatou tofotofoina ai i latou, e vaai pe latou te faia mea uma o soo se mea e poloaiina ai i latou e le Alii lo latou Atua;

Ma o i latou o e e tausia lo latou esetete muamua, o le a faaopoopoina i ai; ma o i latou o e e lē tausia lo latou esetete muamua o le a latou lē maua le mamalu i le malo faatasi ma i latou o e e tausia lo latou esetete muamua; ma o i latou o e e tausia lo latou esetete lona lua o le a faaopoopo i luga o o latou ulu le mamalu e faavavau ma faavavau lava.

“Ma sa fetalai mai le Alii: O ai Ou te auina atu? Ma sa tali mai se tasi e pei o le Atalii o le Tagata: O Aʼu lenei, auina atu aʼu. Ma sa tali mai le isi ma fai mai: O aʼu lenei, auina atu aʼu. Ma sa fetalai mai le Alii: O le a Ou auina atu le muamua.

“Ma sa ita le lona lua, ma sa lē tausia lona esetete muamua; ma, i lena aso, e toatele na mulimuli atu ia te ia” (Aperaamo 3:24–28).

Ia matau e na o le tasi le fuafuaga na tuuina atu i le fono i le muai olaga—o le fuafuaga a le Tama. E lei tuuina mai e lo tatou Tama Faalelagi le fesili, “O le a se mea tatou te faia?” Na te lei sailia ni manatu, talosagaina ni fautuaga, pe talosagaina ni talosaga. Ae, sa Ia tuuina mai elemene faavae o Lana fuafuaga ma fesili atu, “O ai ou te auina atu?” O le ute o Lana fesili na taulai atu i le tagata e tatau ona auina mai e faatino tuutuuga ma tulaga o Lana fuafuaga.

O taunuuga o le fouvale o le fili o loo faamatalaina foi i tusitusiga paia.

“O le mea lea, ona sa fouvale Satani ia te a’u, ma saili e faaumatia le faitalia a le tagata, lea … na tuu atu e A’u, ia te ia, ma lea foi, ia Ou avatu ia te ia Lo’u lava mana … , na Ou faia ai ia lafoaiina i lalo o ia;

“Ma sa avea o ia ma Satani, … o le tiapolo lava lea, o le tamā o pepelo uma, e faasese ma faatauaso tagata, ma ta’ita’i faatagataotaua i latou i lona loto, le toatele lava lea o i latou o e e le faalogo mai i Lo’u leo” (Mose 4:3–4; ua faaopoopo le faamamafa).

E lei tuuina atu e Lusifelo se fuafuaga sa palotaina tetee e le toatele o tagata auai i le fono i le muai olaga. E le o ia o se tagata agamalu na faiaina i se palota. Sa fouvale o ia! O le faamaualuga, faasausili, ma le manatu faapito na faaosofia ai lona tetee atu i le fuafuaga a le Tama.

O loo faamatala mai i le fuafuaga ia galuega a le Tama ma le Alo lea e faaavanoaina mo tagata uma ia faamanuiaga o le ola e faavavau.

O le talalelei a Iesu Keriso e aofia ai le ala e mafai ai ona tatou maua faamanuiaga folafolaina i le fuafuaga a le Atua, e oo lava i aoaoga faavae, mataupu faavae, sauniga, ma feagaiga e tatau i alii ma tamaitai ona talitonu ma mulimuli ai. Sa tusia e Nifae, “E leai se isi lava suafa ua tuuina mai i lalo o le lagi vagana ai Iesu Keriso lenei … e mafai ona faaolaina ai le tagata” (2 Nifae 25:20). E moni, o le Alii o Iesu Keriso o le “ala, ma le upu moni, ma le ola: e le alu atu lava se tasi i le Tama, pe a le ui mai ia te [Ia]” (Ioane 14:6; faaopoopo le faamamafa).

Na faamatala mai e Peresitene Russell M. Nelson:

“O le fuafuaga sa manaomia ai le Foafoaga, ma ona o lena mea sa manaomia ai foi le Pā’u ma le Togiola. O itutino faavae nei e tolu o le fuafuaga. O le foafoaina o se paneta faaparataiso e mai le Atua. Na oo mai le olaga faitino ma le oti i le lalolagi e ala i le Pā’u o Atamu [tagai 2 Nifae 2:25Mose 6:48]. O le tino ola pea ma le mafai ona ola e faavavau, na saunia e le Togiola a Iesu Keriso [tagai 2 Nifae 2:21–28]. …

“… Ua tatou o mai i le lalolagi mo se vaitau puupuu, e onosaia o tatou tofotofoga ma faigata, ma sauniuni ai e agai i luma ma luga i se taunuuga mamalu i le aiga [tagai Salamo 116:15; Alema 42:8]. O o tatou mafaufauga ma galuega a o [i ai i le olaga nei] o le a mautinoa lava le aoga pe afai tatou te malamalama i le fuafuaga a le Atua ma e faafetai ma usiusitai i Ana poloaiga” [tagai i le Mataupu Faavae ma Feagaiga 59:20–21].”

Tatou te aoaoina upumoni taua e ala i le faailoaina ma le suesueina o le tele o faalagiga eseese mo le fuafuaga a le Tama i le Tusi a Mamona: O Se Tasi Molimau ia Iesu Keriso. Mo se faataitaiga, mafaufau i faataitaiga nei o faalagiga ua filifilia:

“O le fuafuaga alofa mutimutivale a le Foafoa silisiliese” (2 Nifae 9:6).

“O le fuafuaga a lo tatou Atua” (2 Nifae 9:13

“O le ata o le faaolataga” (Iaroma 1:2; Alema 24:14).

“O le fuafuaga o le togiolaina” (Alema 12:25, 26, 30, 32, 33; 42:11, 13).

“O le fuafuaga o le toefuataiga” (Alema 41:2).

“O le fuafuaga o le fiafia” (Alema 42:16).

“O le fuafuaga sili o le alofa mutimutivale” (Alema 42:31).

O nei faalagiga taitasi e fesoasoani tatou te malamalama manino atili ai i folafolaga taua o le fuafuaga a le Tama ma faatamaoaigaina ai la tatou vaaiga e uiga i faamoemoega ma uiga o o tatou olaga faaletino.

O le mea maitauina, o le faalagiga e sili ona faaaoga soo mo le fuafuaga a le Atua i le Tusi a Mamona e taulai atu i le togiolaina lea ua mafai ona o le Togiola a Iesu Keriso.

Na folafola mai e Alema, “O lenei, a na leai le fuafuaga o le togiolaina, lea na faataatia mai le faavaega o le lalolagi, po ua lē mafai ona i ai o se toetutu mai o e ua oti; peitai sa i ai se fuafuaga o le togiolaina na faataatia, lea o le a faataunuu ai le toetutu mai o e ua oti” (Alema 12:25).

Na ia apoapoai mai foi, “Amata ona talitonu i le Alo o le Atua, o le a afio mai o Ia e togiola Ona tagata, ma o le a mafatia ma maliu o Ia e togiola mo a latou agasala; ma o le a toetu mai o Ia mai le oti, lea o le a faataunuu ai le toetutu, o le a laulaututu ai tagata uma i Ona luma, e faamasinoina i le aso faamasino mulimuli, e tusa ma a latou galuega” (Alema 33:22).

E tatau ona maena a’e o tatou agaga ma le lotofaafetai a o tatou mafaufau i le fuafuaga sili o le faaolataga a le Atua, togiola, toefuataiga, alofa mutimutivale, ma le fiafia. O le malamalama i Lana fuafuaga e maua ai se vaaiga taua, faatamaoaigaina ai lo tatou olioli, ma faamalosia ai i tatou e faatoilalo o tatou luitau ma faigata.

E naunau le Tama Faalelagi mo i tatou e toe foi atu ia te Ia. Na te valaaulia ma folafola mai faamanuiaga, ae o le a Ia le faamalosia lava, uunaia, pe taofiofi lo tatou faaaogaina o le faitalia sa Ia tuuina mai ia i tatou. E tatau ona tatou galulue ma filifili e toe foi atu ia te Ia e ala i le mulimuli i le faataitaiga a Lona Alo Pele.

O Loo Faaloaloa Atu Pea Lona Aao, saunia e Elizabeth Thayer

“Ua uma ona sauniale ala , ma afai tatou te tepa atu, e mafai ona tatou ola e faavavau” (Alema 37:46; faaopoopo le faamamafa).

Ou te molimau atu ma le fiafia o le Tama Faalelagi o le tusitala o le fuafuaga paia mo Ana fanau. O Iesu Keriso o lo tatou Faaola ma le Togiola. Ma i le avea ai ma se tasi o Aposetolo a le Alii i aso e gata ai, ou te molimau atu e moni lava o Ia “o le ala, le upumoni, ma le ola” (Ioane 14:6; faaopoopo le faamamafa).